Matiyo 23

Jizọsị Oloko Tolumapụ Ma Na Farịsiiapụ Ma Na Gotẹ Ḅeri Nụnụm

(Mak 12.38-39; Luk 11.43,46; 20.45-46)

1Anịtẹso Jizọsị ẹkwẹn tomina-ogbo, ogbo ma na ò ḍukamẹnjịapụ ma na pịrịm. 2“Oloko Tolumapụ ma na Farịsiiapụ ma na, anie Mozizi tọrụ ḍima tẹ, Oloko mẹ ḍuko finji kụrọ mẹ ḅara ḅụ simearị apụ. 3Mie ḅụ ịn ḍuko ọ́ pịrị ye, pịrị ye ó poki tẹ anị ḍukamẹnjịị, anịsọ ọmịnị ịn mịẹarị ḅara ḍikima mịẹ ma, kẹ gotẹ ọkọ ḅẹẹarị, inima in tolumarị ḅara ini ọkọ ḍiki mịẹ-a. 4Ini ikuarị tẹ tomḅọ inetẹ dogi ḅịa dogiye kẹ tomi pịrị dogiarị, kụma ịn ḍụkụ tẹ gbọrụ ḅara-tụngbalị kịngẹ sọ sụn-pakama tẹ kẹ ḅara sụa tẹ anị saakị ịn pịrị dogi-a. 5#Mat 6.1; Dit 6.8; Kịẹ 15.38Ịn mịẹarị ye goyegoye tomi ini ẹrị ḅẹ ḅara mie in gotẹ mịẹarị. Fịafịa Ḍiri mẹ ḅio paka-ḅo ẹkwẹn kẹ gbin, tẹ ịn kẹ ịna afụḅara ḅọkọ na ḅara-kọngọ na kpọọ wararị ịrụ-ịrụtẹ apara igbe ma tẹ ịn Tamụnọ ẹkwẹn-aḅịḅị kẹẹ su wararị aị ma badara la ḅara ḍikii! Pịkị ịn kẹ ịna akpa suku pono wararị ịsịramụ ma nangwọ la ḅara ḍikii! 6Alalị fị kiri ḅụ na, ama-awarị ma ḅio na ḅụ, iḅitẹịn akiri sikima ịn pịrị lẹgị mie ịna ḅụụ-ḅẹlẹ, ḅẹlẹ ye; 7ogumaḅiri ḅụ tomi kụn ḅara na, ‘Ye-tolumaḅọ’ na kẹ ịn sịn anie ịna ḅioḅẹlẹmarị ye. 8Kụma ọmịnị, ọ́ ḍụkụ tẹ kịnị ‘Ye-tolumaḅọ’ kẹ ọ́ sịn ma, ọmịnị-mgba mịnapụ, mịnapụ, tẹ gbọrụ ‘Ye-tolumaḅọ’ kịngẹ mie ọ́ nyana ye ẹrẹsị. 9Mị tomikiri ḅụ ọ́ gbọrụḅọ-sọ kẹ Ḍaḅọ sịn ma, anie So-ḅio simearị gbọrụ Ḍaḅọ ḅe ngẹrị mie ọ́ nyana ye ẹrẹsị. 10‘Sịḅịdaḅọ’ sọ ịn kẹ ọ́ sịn ma; gbọrụ sịḅịdaḅọ ngẹrị mie ọ́ nyana ye ẹrẹsị, anie Mẹsaya ḅee. 11#Mat 20.26,27; Mak 9.35; 10.43,44; Luk 22.26Ọmịna ogboku ḅụ opuḅọ so tẹịnḅọ ọmịna fịrịmẹnjịḅọ sọọ. 12#Luk 14.11; 18.14Amịna ḅụụ-gelemarị ḅọ, ini mḅọ iderima ḅa, amịna ḅụụ iderimarị ḅọ ini mḅọ kẹ opuḅọ mịẹ ḅa.

Jizọsị Mịẹ-tomi-ḍie Amịẹaị Si Ḅara Ḍukom

(Mak 12.40; Luk 11.39-42,44,52; 20.47)

13“Ọmịnị Oloko Tolumapụ na, Farịsiiapụ na, ọ́ tẹkẹlẹtẹ ḅara ḍikii! Mịẹ tomi ḍie apụ! Ḅọrọ sọ-mu Tamụnọ Ama-da suku-ḅio simearị atomi sọ ḅọkọ mẹ, ọ́ sọ-mu ḅẹ apụ ma tọrọkọ anị gbaịn tẹ; ọ́ sọ-mu ḍụkụ-a, kụma ọ́ pịkị ḍụkụ tẹ ḅụụkụrọma sọ-mu ḅẹ ḍọkịarị apụ ma sọ sọ-mu mu-a! 14Ọmịnị Oloko Tolumapụ na, Farịsiiapụ na, ọ́ tẹkẹlẹtẹ ḅara ḍikii! Mịẹ tomi ḍie apụ! Ọ́ mịẹ ḅẹ ọkụ ofori diapụ-fịtẹ-ereme ma awarị fọịn ọkị fama tẹ nangwọ tẹ epele atẹkẹ kọn-kọn ịn pịrịarị. Miemẹ gotẹ ọ́ daa ḅarị fomu-ḅara ḅaka ḅa.

15“Oloko Tolumapụ na, Farịsiiapụ na ọ́ tẹkẹlẹtẹ ḅara ḍikii! Ọ́ tọrụ-kọngọ kana dọkụ, tẹ pịkị kiri ọgọnọ mamgba mẹnjị ikelemarị ọ́ paa gbọrụ tomḅọ ngẹrị sọ pịkị Tamụnọ nimi ḅọ sọma ḅarị ḅoto, tẹ ọmịnị inetẹ gbọrụḅọ nyana ḅo ḅoo ọmịnị mḅọ kẹ ò sime-ḅara mẹ ḅẹ maa kiri kẹ ẹlị ḅio sọ ḅẹ ḅọ sọmam.

16“Ọmịnị tọrụ pụụn wararị tẹ etela kẹ kịnị ḍiearị apụ, ọ́ tẹkẹlẹtẹ ḅara ḍikii! Ó tolumarị, ‘Tomḅọ Tamụnọ-warị mẹ kẹ ye karị, karị, mḅọ karị ye mẹ mḅọ ọlọ ḅịa; kụma mḅọ Tamụnọ-warị mẹ ḅio simearị golu mẹ kẹ ye karị karị, anịsakị rẹ anị mḅọ ọlọ tẹ!’ 17Tọrụngbọ-pụụntẹ oḅori amẹẹ! Ndẹẹ kụrọ nyana osi ye nẹngị ye, golu mẹ mụnọọ, Tamụnọ-warị mẹ tẹ golu mẹ wẹrị fịafịamarị ye mẹ? 18Ọ̀ pịkị tolumarị, ‘Tomḅọ agbamịẹ-anga mẹ ḅụ ye karị karị, anị mḅọ ọlọ ḅịa; kụma mḅọ agbamịẹ-anga mẹ ọgọnọ simearị ịn kẹ agba mịẹ ḅẹ ḅo ye mẹ ḅụ ye karị karị, anị mḅọ fịna tẹẹ.’ 19Ọmịna atọrụngbọ pụụntẹ ḅara ḍikii! Ndẹẹ kụrọ nyana osi ye nẹngị ye, kẹ agba mịẹ ḅẹ ḅo ye mẹ mụnọọ, agbamịẹ-anga mẹ tẹ anị wẹrị fịafịamarị ye mẹ? 20Ọkọẹrẹsị, tomḅọ nwẹnị agbamịẹ-anga mẹ ḅụ ye karị karị, mḅọ anị na anị ọgọnọ simearị aị ma na kẹ sụa karị tẹẹ; 21tẹ tomḅọ Tamụnọ-warị mẹ ḅụ ye karị karị, mḅọ anị na Tamụnọ tẹ anị ḅio angarị ḅọ ḅe na ḅụ ye karị tẹẹ; 22#Ayị 66.1; Mat 5.34tẹ tomḅọ So mẹ ḅụ ye karị karị, mḅọ Tamụnọ emine mẹ na anị ọgọnọ lẹgịarị ḅọ ḅe na ḅụ ye karị tẹẹ.

23 # Lẹv 27.30 “Ọmịnị Oloko Tolumapụ na Farịsiiapụ na, ọ́ tẹkẹlẹtẹ ḅara ḍikii! Mịẹ tomi ḍie apụ! Ịn kẹ fụlọ ḅẹlẹmarị ọgụ ma tẹ ịn kẹ minti na, dili na, kumini na sịn aị ma sọ ọmịnị arị kẹ oyia akiri ḍiya ḍiya tẹ gbọrụ kiri kẹ mu Tamụnọ pịrịarị, Oloko mẹ koko gotẹ, kụma Oloko mẹ ḅẹ karakara tẹ pịkị kụrọ nyana wararị pakịrị mẹ ọ́ kẹ ye-sịn-a, anie karakara mịẹ na, ọkụrụkụrụ nyana jen-apụ pịrị na, kịnị mingirima-a amịẹaị na. Mịna aị ma rẹ mie ọ́ sụntẹ mịẹ na-iḅi aị, osi-aị ma ḍiki-tọrụ sin-a ḅara ḅụ. 24Tọrụ pụụn wararị tẹ etela kẹ kịnị ḍiearị apụ! Ó ḅuu ḅẹ iru ḅụ ọmọmọ kalịye sọ ọmịnị ẹkẹma sin-arị, kụma ó bebe nambulo sịẹma mẹnịarị!

25“Oloko Tolumapụ na Farịsiiapụ na, ọ́ tẹkẹlẹtẹ ḅara ḍikii! Mịẹ tomi ḍie apụ! Ọmịna kọpụ mẹ na, ẹfẹrẹ mẹ na ọḅụjụ mie ọ́ sịkịrị fịafịamarị ye, tẹ ḅioju mẹ ḅụ kụrọ-ḅara kẹ ọkị aị na, tọrụ-kpọ na mie ọ́ kẹ sụa ye. 26Tọrụngbọ-pụụntẹ Farịsiiapụ! Ọ́ tarị ḅio mẹ sịkịrị fịafịamaa, anịsakị ọḅụ mẹ sọ fịafịa ḅa.

27 # Fịr 23.3 “Ọmịnị Oloko Tolumapụ na Farịsiiapụ na, ọ́ tẹkẹlẹtẹ ḅara ḍikii! Mịẹ tomi ḍie apụ! Ọ́ kịkarị ye anie pịna-pịna agba kẹ ọmbị wararị aḍuḅu, tẹ ọgọnọ, ḍiki-tọrụ ḅụ, iḅi wararị aị, kụma suku-ḅio ḅụ ḍụẹịn-mgbe na ḅụrụ-kọsịarị ḍụẹịn na emi aị. 28Mị gbọrụ ḅara mẹ ḅụ, ọgọnọ, ọgọnọ ọmịnị iḅi-apụ sọ wararị, ḅẹḅọ-ḅẹḅọ tọrọkọ, kụma ọmịna aḅụụ ḅio oḅori kẹ kịnị sịn akuroma na, si, si, si na, mie emi ye.

Jizọsị Mịẹ-tomi-ḍie Apụ La Ḅarị Fomu-ḅara Ḍukom

(Luk 11.47-51)

29“Ọmịnị Oloko Tolumapụ na, Farịsiiapụ na, ọ́ tẹkẹlẹtẹ ḅara ḍikii! Mịẹ tomi ḍie apụ! Ọmịnị iḅi aḍuḅu mịẹ-mịẹ tẹ kẹ ịkịankoroapụ ma pịrịarị, pịkị kẹ ịn kẹ ḅiokoroma ḅẹ aị ḅirima, ḅirima iḅi ḍumo kọn tẹ fịị apụ pịrịarị; 30tẹ ọ́ pịkị ḅẹẹarị mịnẹ ọmịna atẹngịapụ ma ḍumo sime ene mẹ ḅụ ọmịnị emi namịna, ịn mịẹ tẹ ịkịankoroapụ ma ḅaa ḅara mẹ ọmịnị ọkọ mịẹ ḅịa. 31Mie ḅụ, ọ́ ḅarana minini tẹ mịnẹ ọmịnị ma anie ịkịankoroapụ ma ḅaa apụ ma furo-ḅẹ-apụ ma. 32Ọkọẹrẹsị, ọ́ mịẹ ma-muu, tẹ ọmịna atẹngịapụ ma saakị kọrị kọrịnama mẹ kọrị famaa! 33#Mat 3.7; 12.34; Luk 3.7Ọmịnị ododo amẹẹ, pịkị ododo furo ḅẹ awọmẹ! Ndẹẹ ọ́ mịẹtẹ ḅẹrẹ-ḅarasii ḅụ so tẹ ẹlị ḅio sọ ḅịa ḅara? 34Tẹ anie ḅụ, à ḍuko ọ́ pịrịarị, mịnẹ àrị ịkịankoroapụ na, ye-nimi atomi na, ye-tolumapụ na kẹ ọ́ fịrịma ḅa; ịna ḅụ ọ́ ja apụ ḅaa ḅa, osi apụ kẹ ẹngbẹsẹ-sịn ḅụ ḅakụ ḅa, tẹ ama-awarị ma ḅio osi apụ fomu tẹ in dee mangịma ama, ama, mu ḅa. 35#Suk 4.8; 2 Pkị 24.20,21Miemẹ gotẹ fomu-ḅara ḅo ọ́ la ḅa, anie mịẹye-ofori apụ tẹ ọ́ ḅaa apụ ma ẹrẹsị, mịẹye-ofori ḅọ Ebẹlị tẹ ọ́ ḅaa ḅọ ḅe ọkị mu Zẹkaraya, Bẹrakaya tụḅọ ḅe tẹ Tamụnọ-warị mẹ na agbamịẹ-anga mẹ na ogboku ọ́ ḅaa ḅọ ḅe la. 36À gasịma ḍuko ọ́ pịrịarị: mịna ịn ḅaa apụ mamgba ḅẹ fomu-ḅara mẹ ḅo mịmgba mẹ ḅẹ atomi ma ọgọnọ gbana ḅa!

Jizọsị Nyana Jeruselemu Pịrị Ḅẹlẹma

(Luk 13.34-35)

37“Jeruselemu, Jeruselemu! Ị́yẹrị ịkịankoroapụ ma ḅaa tẹ pịkị ḍụḅarị kẹ Tamụnọ kẹ oku kẹ ị́ fịrịma apụ gbin-arị ama! Nda asakị à nwẹn kẹ ị́ atomi mamgba kobiri ì kuḅu ḅio suu ḅẹ ḍọkị tẹ, ịyọrọ ọḅọkọ pamba kẹ amịna awọmẹ gbaịn ḅara, kụma ị́ ḍụkụ ị̀ pịrị-a! 38#Jer 22.5Tẹ mie ḅụ, ị́ Tamụnọ-warị mẹ ini anị koroma mangị tẹ anị papaa gbiin-koro sime ḅa. 39#Dev 118.26Mịọkụ saakị tọrọkọ mu, à ḍuko ọ́ pịrịarị, ọ́ ḅarị jen-maaịn kẹ ị̀ ẹrị ḅịa nwenii ọ́ ḅẹẹ ḅa, ‘Tamụnọ, KỊNỊNYANAḄỌ ḅe ẹrẹ ḅụ ḅoarị ḅọ ḅe boma.’ ”

(C) The Bible Society of Nigeria

Aprann plis bagay sou FỊAFỊA BAỊBỤLỤ

Matiyo 23

Vèsè popilè nan Bib la ki soti nan Matiyo 23

Vèsè popilè nan Bib la ki soti nan
Matiyo 23