Jọsụwa 21
21
Livayị Furo-ḅẹ-apụ Ma Opu Ama Ma
1Anịtẹso Livayị furo mẹ ḅẹ ḍa awarị-warị asịḅịdapụ ma nwẹnị Ẹlịyeza agbamịẹḅọ ḅe na, Jọsụwa Nọnị owiḅọtụḅọ ḅe na, Izirẹlị ḅẹ ḍa awarị-warị asịḅịdapụ ma na ḍọkụma-ḅo. 2#Kịẹ 35.1-8Ịn nwẹnị Kenanị ḅẹ ama mẹ ḅio, Silo ḅụ ịn ḅẹẹ, “KỊNỊNYANAḄỌ ḅe Mozizi ḅụụ ḅọrọtẹ tọnm mịnẹ ịn wa anga ḅẹ opu ama ma kẹ wa pịrị, wa kẹ wamịna opu anama ḍikiḍiki ḅẹ osuka-akiri na kẹ arị ḅụ sụa.” 3Anieḅụ KỊNỊNYANAḄỌ ḅe tọn ḅara ḅụ, Izirẹlịapụ ma nwẹnị ịna sime anga ḅụ mịna opu ama ma na, osuka-akiri ma na kẹ Livayị furo-ḅẹ-apụ ma pịrị.
4Apịan mẹ paka-ḅo Kohatị afuro ma pịrịm Anieḅụ arị Livayị furo-ḅẹ-apụ ma tẹ Erọnị agbamịẹḅọ ḅẹ ḅụụ ḅụ paka-ḅo, apụ ma apịan sụa ḅụ Juda na, Simiyọnị na, Benijamịnị na afuro ma ḅụ oyi tẹra opu ama finji ọkịm.
5Anịsakị Kohatị afuro ma ḅụ kirikọn-apụ ma anie Iferemu furo mẹ ḅẹ afuro ma na, Danị furo mẹ na, Manasẹ furo mẹ kẹ maa anga ḍiya ḅẹ gbọrụ anga mẹ na ḅụ, apịan sụa ḅụ oyi opu ama ọkịm.
6Gasọnị afuro ḅẹ apụ ma apịan sụa ḅụ, Ịsaka furo mẹ ḅẹ afuro na, Asa furo na, Nafutali furo na, pịkị Basani ḅụ sime Manasẹ furo mẹ kẹ maa anga ḍiya ḅẹ gbọrụ anga mẹ na ḅụ oyi tẹra opu ama finji ọkịm.
7Mẹrarị furo-ḅẹ-apụ ma ịna afuro ma wẹrịtẹ sime-ḅara ḅụ apịan sụa ḅụ Rubẹnị furo na, Gadi furo na, Zẹbulọnị furo na ḅụ oyi maa opu ama finji ọkịm.
8Mịna opu ama ma na arịḅẹ osuka-akiri ma na Izirẹlịapụ ma apịan sụa ḅụ KỊNỊNYANAḄỌ ḅe Mozizi ḅụụ ḅọrọtẹ tọn ḅara ḅụ kẹ Livayị furo-ḅẹ-apụ ma pịrịm.
9Juda furo mẹ ḅụ na, Simiyọnị furo mẹ na ḅụ ịn mịna ẹrẹ go ḅẹ opu ama ma pịrị pakamam; 10arị ama ma tẹ ịn kẹ Erọnị ḅụụ paka-ḅo apụ, Kohatị furo-ḅẹ-apụ ma ḅẹ gbọrụ furo tẹ sime Livayị furo-ḅẹ-apụ pịrị ye mẹ, pịrị wararị aị ma, sụa apịan mẹ tarị koro ịn pịrịm ḅẹẹ-sakị. 11Ịn Kiriyati-aba anie Hẹbụrọnị kẹ ịn pịrịm (Aba anie Anakị ḍa) anị ikelema-koro osuka-akiri ma na kẹ sụa Juda tụndụ ọgọnọ ḅẹ opu sịẹ mẹ ḅio ḅụ. 12Kụma opu ama mẹ ḅẹ apiri ma na, anị ḅẹ kala-ama ma na ịn kẹ Jefune owiḅọtụḅọ Kẹlẹbụ pịrị tẹ ò nye ḅara ḅụ.
13Anịsakị ịn kẹ Erọnị, agbamịẹḅọ ḅe ḅụụ paka-ḅo apụ ma pịrị opu ama, anie Hẹbụrọnị ḅụụ ḅọị yọ sọ kẹ kịnị-ḅaḅọ ḅe pịrị opu ama mẹ, anị ḅẹ osuka-akiri na kẹ sụa Libina na anị ḅẹ osuka-akiri na kẹ sụa. 14Jataya na, anị ḅẹ osuka-akiri na kẹ sụa, Ẹsịtẹmoha na anị ḅẹ osuka-akiri na kẹ sụa. 15Holonị na, anị ḅẹ osuka-akiri na kẹ sụa, Dẹbaya na, anị ḅẹ osuka-akiri na kẹ sụa, 16Ayini na anị ḅẹ osuka-akiri na kẹ sụa, Juta na, anị ḅẹ osuka-akiri na kẹ sụa, Bẹtị-semesi na anị ḅẹ osuka-akiri na kẹ sụa — mịna maa afuro ma ḅụ eseni opu ama, 17anịtẹrẹmẹ Benijamịnị furo ḅụ Gibiyọnị na, anị ḅẹ osuka-akiri na kẹ sụa, Geba na, anị ḅẹ osuka-akiri na kẹ sụa, 18Anatọtị na, anị ḅẹ osuka-akiri na kẹ sụa, Alịmọnị na anị ḅẹ osuka-akiri na kẹ sụa — inia opu ama. 19Erọnị, agbamịẹḅọ ḅe ḅụụ ḅụ paka-ḅo apụ ma opu ama ma arịmgba oyi tẹra ama finji na, arịḅẹ osuka-akiri na kẹ sụa.
20Livayị furo-ḅẹ-apụ ma ḅẹ Kohatị furo-ḅẹ-apụ ma ḅụ kirikọn Kohatị afuro ma kụma, sime ịn pịrị tẹ ịn kẹ ịn pịrị opu ama ma Iferemu furo mẹ ḅụ paka-ḅom. 21Ịn kẹ ịn pịrị ye, Sẹkẹmụ sime kịnị-ḅaḅọ ḅe ḅụụ ḅọị pịrị opu ama mẹ na anị ḅẹ osuka-akiri na kẹ sụa, Iferemu tụndụ ọgọnọ ḅẹ opu sịẹ mẹ ḅio, Geza na, anị ḅẹ osuka-akiri na kẹ sụa, 22Kibizayimu na, anị ḅẹ osuka-akiri na kẹ sụa, Bẹtị-horoni na, anị ḅẹ osuka-akiri na kẹ sụa — inia opu ama. 23Danị furo mẹ ḅụ, Ẹlitikẹ na, anị ḅẹ osuka-akiri na kẹ sụa, Gibẹtọnị na, anị ḅẹ osuka-akiri na kẹ sụa, 24Ahijalọnị na, anị ḅẹ osuka-akiri na kẹ sụa, Gatị-rimọnị na, anị ḅẹ osuka-akiri na kẹ sụa — inia opu ama, 25Anịsakị Manasẹ furo mẹ kẹ maa anga ḍiya ḅẹ gbọrụ anga ḅụ, Tanakị na, anị ḅẹ osuka-akiri na kẹ sụa na, Gatị-rimọnị na, anị ḅẹ osuka-akiri na kẹ sụa — maa opu ama. 26Kohatị furo-ḅẹ-apụ ma ḅẹ kirikọn afuro ma ḅẹ apụ ma opu ama ma arịmgba oyia opu ama na arịḅẹ osuka-akiri na kẹ sụa.
27Anịsakị Livayị furo-ḅẹ-apụ ma ḅẹ gbọrụ furo anie Gasọnị furo-ḅẹ-apụ ma Basani ḅio Golanị, ḅụụ ḅọị yọ sọ kẹ kịnị-ḅaḅọ ḅe pịrị opu ama mẹ na anị ḅẹ osuka-akiri na kẹ sụa mie ịn kẹ ịn pịrị ye — maa opu ama 28na Ịsaka furo ḅụ, Kisiyọnị na anị ḅẹ osuka-akiri na kẹ sụa, Daberatị na anị ḅẹ osuka-akiri na kẹ sụa, 29Jamutu na anị ḅẹ osuka-akiri na kẹ sụa, na, Ẹniganimu na, anị ḅẹ osuka-akiri na kẹ sụa — inia opu ama; 30anịsakị Asa furo ḅụ, Misalị na, anị ḅẹ osuka-akiri na kẹ sụa, Abidọnị na, anị ḅẹ osuka-akiri na kẹ sụa, 31Ẹlịkatị na, anị ḅẹ osuka-akiri na kẹ sụa, na Rehobu na, anị ḅẹ osuka-akiri na kẹ sụa — inia opu ama, 32anịsakị Nafutali furo mẹ ḅụ mie Galili ḅio Kẹdẹsị sime kịnị-ḅaḅọ ḅe ḅụụ ḅọị pịrị opu ama mẹ na anị ḅẹ osuka-akiri na kẹ sụa, na Hamọtị-dọ na, anị ḅẹ osuka-akiri na kẹ sụa, pịkị Katanị na, anị ḅẹ osuka-akiri na kẹ sụa paka-ḅo ye — tẹra opu ama. 33Gasọnị furo-ḅẹ-apụ ma ḅẹ kịrị-kịrị afuro ma opu ama ma arịmgba oyi tẹra opu ama finji na, arịḅẹ osuka-akiri na kẹ sụa.
34Anịsakị Livayị furo-ḅẹ-apụ ma ḅẹ kirikọn-apụ ma, anie Mẹrarị furo ḅẹ afuro ma, Zẹbulọnị furo mẹ ḅụ mie ịn Jokinihamụ na, anị ḅẹ osuka-akiri na kẹ sụa, Kata na, anị ḅẹ osuka-akiri na kẹ sụa, 35Dimina na anị ḅẹ osuka-akiri na kẹ sụa, Nahalalị na anị ḅẹ osuka-akiri na kẹ sụa, kẹ ịn pịrị ye: inia opu ama. 36Rubẹnị furo mẹ ḅụ, Biza na, anị ḅẹ osuka-akiri na kẹ sụa, Jehazi na, anị ḅẹ osuka-akiri na kẹ sụa, 37Kẹdẹmoti na, anị ḅẹ osuka-akiri na kẹ sụa, na, Mẹfatị na, anị ḅẹ osuka-akiri na kẹ sụa — inia opu ama. 38Gadi furo ḅụ, Gilẹdị ḅio Remọtị, kịnị-ḅaḅọ ḅe ḅụụ ḅọị opu ama mẹ, na anị ḅẹ osuka-akiri na kẹ sụa, Mehananemụ na, anị ḅẹ osuka-akiri na kẹ sụa, 39Ẹsịbọnị na, anị ḅẹ osuka-akiri na kẹ sụa, Jaza na, anị ḅẹ osuka-akiri na kẹ sụa, arịmgba inia opu ama. 40Mẹrarị furo ḅẹ kịrị-kịrị afuro ma ḅẹ apụ ama ma, anie Livayị furo-ḅẹ-apụ ma ḅụ kirikọn afuro ma kụma, ịn kẹ ịn pịrị aị ma, arịmgba anie oyi maa opu ama finji.
41Izirẹlịapụ ma nyana ye mẹ ogbo-ḅio ḅụ Livayị furo-ḅẹ-apụ ma opu ama ma arịmgba anie maa opu ama ofori opu ama mesi oyi finji na arịḅẹ osuka-akiri na kẹ sụa. 42Mịna opu ama ma gberie-gberie anị ḅẹ osuka-akiri anị ikelema-koro wararị, anị ḅara mie arị mịna opu ama mamgba ḅụ sime-ḅara.
Izirẹlị Ama Mẹ Ọkị Nyana Tẹ
43Mị-ḅara mie KỊNỊNYANAḄỌ ḅe ama mẹmgba tẹ ò ye karị ḅara kẹ minini ịna aḍapụ ma pịrị ama mẹ kẹ Izirẹlị pịrị ḅara; ini anị ọkị nyana tẹso, ini anịjụ koro angam. 44KỊNỊNYANAḄỌ ḅe ye karị ḅara kẹ minini ịna aḍapụ ma pịrị tẹ ḅara ḅụ, pakịrị-pakịrị ḅụ ori ịnyọsara kẹ ịn pịrịm; inina fịya-a apụ mamgba ḅụ ịn kuḅu sịẹ tẹ gbọrụḅọ-sọ ofori, anị kẹ gotẹ ọkọ mịẹ ye, KỊNỊNYANAḄỌ ḅe inina fịya-a apụ mamgba kẹ ịna aḅara-ḅio ịn pịrị tẹ ẹrẹsị. 45Mie kụma KỊNỊNYANAḄỌ ḅe kẹ Izirẹlị warị mẹ karịma iḅi aị ma tẹ ọ̀ mịẹ-a tẹ gbarị ye ofori; arịmgba ḅo mịẹ-mịẹ tẹ ḅọrọm.
(C) The Bible Society of Nigeria