Ayịzaya 62
62
1Àrị ẹkwẹn pakama tẹ kẹ Jeruselemu ḅiokpọma ḅa;
À gbọsime ḅịa nwenii á ḅọrọma ḅa,
Tẹ árị owu-ḅara-iḅi mẹ pọnjị-tọnjọ ḍin ḅụ kọrị ḅara kẹ kọrị paka ḅa.
2Jeruselemu, sịẹ-sịẹ ma í owu-ḅara-iḅi mẹ ẹrị ḅa!
Ịna amadapụ mamgba í ebube ẹrị ḅa.
Ị́yẹrị ini ịwọ ẹrẹ kẹ ị́ sịn ḅa,
KỊNỊNYANAḄỌ ḅe ḅarana kẹ ị́ pịrị ẹrẹ.
3Ị́ nwẹnị tọrụ-gbẹ amada-sun sọ KỊNỊNYANAḄỌ ḅe pịrị ḅa.
4Kịnị ḅarị jen kẹ “Sịkịtẹ-ḅọ” kẹ ị́ sịn ḅịa,
Anịanịa ị́ amakiri mẹ sịn, “Koroma-so tẹ Ẹrẹḅọ ma.”
Ị́ ịwọ ẹrẹ sọ ḅarịye anie, “Tamụnọ Á Ḍiki Ḅioḅẹlẹarị.”
Ini ị́ amakiri mẹ sịn ḅa, “Diḅọ na Ḅioḅẹlẹ
ḅụ angarị Ẹrẹḅọ,”
Kẹ gotẹ ọkọ ḍukoarị, KỊNỊNYANAḄỌ ḅe í ḍiki-ḅioḅẹlẹarị,
Tẹ ori diḅọ sọ ị́ amakiri mẹ pịrị ḅa.
5Asatụḅọ kpaịntẹ iriawọ-tụḅọ ọkị simearị
ḅara kịka ḅara ḅụ
ị́ tẹmẹḅọ ḅe í sime ḅa.
Ẹrẹḅọ simearị owiḅọ ò simearị ẹrẹḅọ ma
ḅụ ḅioḅẹlẹ nyana ḅara,
Anị ḅara mie ị́ Tamụnọ ḅe ị́ ḅụ ḅioḅẹlẹ ḅarị ḅara.
6Jeruselemu, í onu ma ọgọnọ arị ama-koru apụ kẹ koroma tẹẹ;
In gbọsime ḅịa eneḅaka-o, ḍin-o
Ịn KỊNỊNYANAḄỌ ḅe mịẹ ḅẹ tẹ minini aị ma
kẹ ò ḅiokoroma nyanam
Tẹ gbala-gbala ḍụkụ tẹ ori arị kẹ ḅioḅọrọma ḅịa.
7Ịn ḍụkụ tẹ ori ịnyọsara nyana-a, nwenii
ò Jeruselemu kẹ tarị anị sime-ḅara wẹrị.
Tẹ anị mịẹ tẹ anị tomikiri mẹmgba tokiniarị apụ ama sọ.
8KỊNỊNYANAḄỌ ḅe tẹmẹ-la ḅara kẹ ye minini tẹẹ,
Tẹ ọ̀ kụrọ ḅụ ori anị mịẹ ḅa;
“Ọmịna mbịaka ḅarị jen kẹ si kẹ ọ́ tọn apụ
ma fị-fị ye sọ ḅịa,
Tẹ ja sịẹ ḅẹ apụ ḅarị jen kẹ ọmịna iru ḅuu ḅịa.
9Kụma ọmịnị mbịaka mẹ ḍiḅi tẹ anị kpọọ tẹ pẹlẹ apụ ma
Anie anị ḅẹ fịturu mẹ fị tẹ KỊNỊNYANAḄỌ ḅe tokini ḅarịye.
Ọmịnị kụrọ mgbọlụ ma tẹlẹma pakama-ḅo tẹ
kaịn kobiri apụ ma
Anị ḅẹ iru mẹ ḅuu ḅa ị̀ warị mẹ ḅẹ ogigo mẹ ḅio.”
10Jeruselemu ḅẹ apụ, ọmịnị opu ama mẹ ḅio paka mu
Tẹ etela mịẹ ọmịna atomi pịkịma-ḅoarị apụ pịrị!
Opu etela tẹlẹmaa; anị ḅẹ aḍụḅarị ma kolokolo siin!
Kẹ elekima sụa ḅẹ ye kẹ pikee, mịẹ tẹ sịẹ-sịẹ ma inetẹ nimi ḅẹ ḅara.
11 #
Ayị 40.10; Mịẹ 22.12 Mịnẹ KỊNỊNYANAḄỌ ḅe ḍuko wasama bebe tomikiri mẹ pịrịarị:
“Ḍuko kpọma-ḅẹlẹmarị Jeruselemu ḅẹ apụ ma pịrịị,
‘KỊNỊNYANAḄỌ ḅe ọ́ ḅọrọma ḅẹ ḅoarị;
ori ọ̀ gbẹẹ-aị na ḅoarị.’ ”
12Ịn kẹ ịn sịn ḅarị ye: “Tamụnọ Fịafịa Atomi,
KỊNỊNYANAḄỌ Ḅe Ḅọrọma Tẹ Apụ.”
Ịn kẹ Jeruselemu sịn ḅarị ye: “Ḍọkị Pakama-ḅotẹ Ama,
Tamụnọ Sịkị-a Opu Ama Mẹ.”
(C) The Bible Society of Nigeria