Emọsị 5
5
Si-ḅụ-pịkị Sịn-ḅịḅị
1Izirẹlịapụ, ọmịnị arị ó gotẹ suuarị ḍụẹịn owu nume mẹ pokii:
2Iriawọ-tụḅọ Izirẹlị ḅịkị tẹẹ! Gbala-gbala á ḅarị jen kẹ saakị ḅịa! Á kẹ gbin koroma-so ḅọ ḅara kẹ kiri ọgọnọ ḅọlọlọ wararị. Tẹ ḅarasụa tẹ á saakị sịẹmarị gbọrụḅọ-sọ ofori.
3Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹarị, “Izirẹlị ḅẹ gbọrụ opu ama ọmụapụ maa ẹndẹ oyia asi finji fịrịma pakamarị, kụma sọnọa si ngẹrị pịkịma ḅoarị; jen opu ama sọnọa si fịrịma pakamarị, kụma oyi ngẹrị pịkịma ḅoarị.”
4KỊNỊNYANAḄỌ ḅe Izirẹlịapụ ma ḅẹẹarị, “Ọmịnị ị̀ ḍọkụma-ḅoo, tẹ ó ḍumo ḅa. 5Ó mu Biyasẹba ḅụ tẹkẹ ma. Ọ́ Bẹtẹlị ḅụ ị̀ ḍọkị-ẹrị ḅẹ ḍọkị ma-a Bẹtẹlị ḅo papaaye sọ ḅa. Ó Giligalị mu ma — árị atomi ma ini in gboo kun-ḅara ḅio sọ pịrị tẹẹ.”
6Ọ́ KỊNỊNYANAḄỌ ḅe ḍọkụma-mu, tẹ ó ḍumo ḅa. Ó mu-a ḅẹḅẹ, ọ̀ fịnị kịka tẹ tuuideri-ḅo Izirẹlịapụ ma jụụ ḅa. Fịnị mẹ Bẹtẹlị ḅẹ apụ ma dọkịma fama ḅa, tẹ gbọrụḅọ-sọ inetẹ anị biinma ḅịa. 7Ọ́ fa tẹẹ, ọmịnị ja apụ la kiri pịkị sikima tẹ sime kịnị pịrị aị ḅụ in inomarị apụ!
8 #
Job 9.9; 38.31 KỊNỊNYANAḄỌ ḅe lolia ma tẹmẹm,
Piliyadisi na Oriyọnị na nwẹn-sịn alolia ma.
Ọ̀ kanakana pịkị-ḅo eneḅaka bele sọmarị,
tẹ eneḅaka kẹ ḅo ḍin mịẹarị.
Ori abajị ḅio ḅẹ aminji ma sịn ḅo
tẹ arị ọsụma kiri mẹ ọgọnọ sararị.
KỊNỊNYANAḄỌ ḅe anie Ori ẹrẹ.
9Ori opu kụrọ-kọn apụ ma na ịna kụrọnị-ayọ
ma na gulugulumarị.
10Ọmịnị ma inoma ḍụkụ-a tẹ ḅẹrẹ-siri ḅio bebe karakara mẹ ḍukoarị apụ ḍiki-ḅioḅuarị. 11Ọmịnị igoin-apụ ma ponoma tẹ ịna mgbọlị afịaị ma pụkọ-ọkịarị. Tẹ mie ḅụ ọ́ nama tẹ ḍụḅarị awarị ma ḅio ọmịnị anga ḅịa, anịanịa ó ḍiḅi tẹ vaịnị aḍụọ ma ḅụ paka-ḅo iru ḅuu. 12Ọmịna asi ma ḅalafama la ḅara à nimi wararị, na tọnwa si-amịẹaị tẹ ọ́ mịẹ tẹ aị ma la ḅara na. Ọ́ ḅaa-ḅọkọ kẹ iḅi atomi ma ḍọkịarị, ọḅụ-fịarị, tẹ igoinḅọ ḅe kikiarị, karakara ḅẹrẹkọn nyana ḅụ ḅẹrẹ-siri ḅụ. 13Tẹ mie ḅụ, yaụ-sime ọkọ sime asi sakị ma ḅụ anie gbala opu nimi tẹ ọ́ kọn-arị ye!
14Ó kuraye mịẹ kẹ mịẹ-mịẹye sọma, siye-a, mịẹtẹ ó ḍumo ḅarị ḅara. Anịtẹso KỊNỊNYANA-TAMỤNỌ, Kụrọmamgba Nyanaḅọ ḅe karakara-ḅara-ḅụ ọmịnị na sime ḅa, anie ọmịnị sọ ọkịarị ori ọmịnị na emi ḅẹ ḅara mẹ. 15Ó siye ḍiki-ḅioḅu, kuraye ḅẹlẹma, tẹ ẹrị mịnẹ ḅẹrẹ-siri ma ḅio ḅụ karakara ḅẹrẹkọn ngẹrị kiri nyanam. Ẹbịsịya KỊNỊNYANAḄỌ ḅe ọkụrụkụrụ nyana mị sịẹ mẹ ḅẹ apụ ma tẹ fịị-a so apụ ma pịrị ḅa.
16“Opu ama mẹ ḅẹ etela ma ḅio ḅụ kịnị kururu ḅụ sule-sule owu ḅa. Ḍụọ-kọrịapụ sọ ini ịn sịn ḅo tẹẹ ini owu ḅẹ ọkọ ḅo apụ ma na sọ tẹ owu ḅa. 17Kụrọ aḍụọ mamgba ḅụ in sule-sule owu ḅa. Mịẹ mẹmgba mịẹ ḅa, àrị ó fomu ḅẹ ḅoarị ẹrẹsị.” KỊNỊNYANAḄỌ ḅe ọkọ ḅẹẹm.
18Anị kpọma ḅalafama ye sọ ọ́ pịrị ḅarị ḅara ḍiki ọmịnị KỊNỊNYANAḄỌ ḅe eneḅaka mẹ koruarị apụ! Anị ene mẹ tọ iḅi kẹ ọ́ mịẹ ḅẹ? Kẹ gotẹ ọkọ ḅẹẹarị anị ene mẹ kanakana ene sọ ḅa, bele ene-a. 19Anị kịka ḅarịye tomḅọ ọkụkụ ḅụ mangị-soarị tẹ ḅo tuu na bịamam. Anịanịa anị kịka ḅarịye tomḅọ ḅo warị la tẹ amịna ḅara kẹ warị akaka pono tẹ ododo ọ́ gbọnm! 20KỊNỊNYANAḄỌ ḅe eneḅaka mẹ kanakana ọkị-ḅo ḅa tẹ bele-a; anị kpiti eneḅaka sọ ḅa, gbọrụ ḅịya sọ ofori ḅara. 21#Ayị 1.11-14KỊNỊNYANAḄỌ ḅe ḅẹẹarị, “Àrị ọmịna Tamụnọ alalị ma ḍiki-ḅioḅuarị; àrị inetẹ arị inema ḅịa! 22Ọ́ dọkịma-agba ma na mgbọlị fịaị ḍiepịrị-aị ma tẹ ọ́ kẹ ḅo ị̀ pịrịarị aị ma à daa ḅịa. Ó koko tim-tim-ma tẹ kẹ ḅo ḍie ị̀ pịrịarị anana ma àrị ọkị ḅịa. 23Ọmịnị ó sulearị anume ma dasịẹma; arị ọ́ farịarị ọbọ ma poki ḅẹ ḅii-a. 24Anie nakara, yee tomḅọ la kiri kẹ mḅọ pịrị ngụngụḅa minji mẹnjị ḅara mẹnjị-ḅọrọ, tẹ karakara mịẹ nwẹnị samụnọ-samụnọ-a tọrụ sọ.”
25 #
Fịr 7.42,43 “Izirẹlịapụ, à kụra amesi kẹ ịkpa mẹ ḅio tọrọkọ-sụn ọ́ pịrị tẹ ó tolu-ḅọrọ sakị, àrị ọmịnị agba na ḍiepịrị-aị na kẹ ị̀ pịrị ịgbanị-a, 26Kụma mịọkụ, ó sunsin Sakutu, ọmịna ama-da tamụnọ ḅe afụḅara ma pịrịarị ẹrẹsị, pịkị Kayịwanị, ọmịnị ọmịna oru-afụḅara ma dogi-dogi mẹnjị ḅa, 27arị ọmịnị ọkị mu Damasịkọsị ḅọrọ fa amakiri ḅụ kun-ḅara ḅio suu sakị”, KỊNỊNYANAḄỌ ḅe, Kụrọmamgba nyana Tamụnọ kẹ ẹrẹ fị ḅọ ḅe ọkọ ḅẹẹarị.
(C) The Bible Society of Nigeria