2 Samụẹlị 20
20
Sẹba Sịḅị-kụrọ
1 #
1 Ama 12.16; 2 Pkị 10.16 Mị sakị mẹ ḅụ gbọrụ papaa tomḅọ anịjụ sime simem, oriḅe ẹrẹ anie Sẹba, Benijamịnị furo ḅẹ gbọrụ Bikiri owiḅọtụḅọ; tẹ ọ̀ nwẹnị ọdụ mẹ ofuro, tẹ ḅẹẹ:
Wa Devidi ḅụụ gbọrụ ḍiekiri sọ nyana-a,
anịsakị wa Jese owiḅọtụḅọ ḅe ḅụụ sime anga so nyana-a;
ọrụḅọ-ọrụḅọ so amịna akpụrụ-warị muu,
yei Izirẹlị!
2Anieḅụ Izirẹlịapụ mamgba Devidi ḅụ amịna ḅụụ nụnụ-ọkịm, tẹ Sẹba, Bikiri owiḅọtụḅọ ḅe ḍukamẹnjịm; kụma Juda ḅẹ apụ ma jike-a ḅara kẹ Jodanị mẹ ḅụ ịna amadaḅọ ḍukamẹnjị ḅo Jeruselemu lam.
3 #
2 Sam 16.22
Tẹ Devidi ḅo Jeruselemu ḅụ ọ̀ warị lam; tẹ amadaḅọ ḅe nwẹnị oyia ịgwa-ereme ma tẹ ò koroma-som warị mẹ ḍikii kẹ ḅẹẹ apụ ma ọkị, tẹ ịn kẹ ḍikiḍiki ḅara ḅụ wẹrị, tẹ ịn ḅii-ye ḅii-ye kẹ ịn pịrịm, kụma ọ̀ sọ ịn ḍọkụma-mua. Anieḅụ ini ịn ịkasị wẹrị nwenii ịna fịị eneḅaka lam, gbala diapụ-fịtẹ-ereme ḅara ịn nwẹn simem.
4Anịtẹso amadaḅọ ḅe nwẹnị Amasa ḅẹẹ, “Tẹra aḍin ḅụ Juda ḅẹ apụ mamgba sịn ḅo gboloma ị̀ pịrịị, tẹ ị́yẹrị ḅioju sọ mịanga simee.” 5Anieḅụ Amasa nwẹnị Juda sịn ḅẹ mu, kụma ọ̀ nwẹnị sime sakị mẹ tẹ ịn tọn ọ̀ pịrị ye mẹ ḅụrama. 6Tẹ Devidi nwẹnị Abisahị ḅẹẹ, “Mịọkụ Sẹba, Bikiri owiḅọtụḅọ ḅe siye kẹ wa mịẹ Abusalọmụ nẹngị ḅa. Ị̀ afịrịmẹnjịapụ ma ọkị tẹ ò ḍukaa, anieofori ò ḅofa ini ọmụ-aị kẹ mịẹ kụrọma-kụrọmatẹ opu ama nyana-nyana ọ̀ ḅụụ pịrị, tẹ ḅụụ-fụka kẹ wa pịrị.” 7Johabụ na, Keretayịtị opu ma na Pẹlẹtayịtị apụ ma na, kụrọ, kụrọtẹ opu atomi mamgba nwẹnị Jeruselemu ḅụ Abisahị ḍuka paka Sẹba, Bikiri owiḅọtụḅọ ḅe ḍuka ḅẹ mu. 8Ịn ḅo opu ḍụḅarị mẹ tẹ Gibiyọnị ḅụ sime ye mẹ la tẹso, Amasa nwẹnị ḅo ini na bịama. Mịọkụ Johabụ ọmụgbin-apụ kapa sụa, tẹ anị ọgọnọ, lubulu ḅio simearị okologie emi ḅiri-ponoye kẹ anị kpọ wararị, tẹ ọ̀ mẹnjị tọrọkọ mu ḅara ḅụ okologie mẹ nwẹnị siin-koro. 9Johabụ nwẹnị Amasa ḅẹẹ, “Ì iyimbere tọ-ḅara, gbeke iḅi wararị?” Tẹ Johabụ nwẹnị Amasa ḅịḅị nọnjị ḅẹ ḅara kẹ ori ama-ḅara kẹ ò ḅekeke ḅẹ mpọrị ọlọ. 10Kụma Amasa, okologie mẹ tẹ Johabụ ḅara-ḅio emi ye mẹ kẹ elekima sụa-a; anieḅụ Johabụ anị kẹ ò furo ḅụ ò temi, tẹ maaịn karama sakị kẹ ò temi-a ḅara ḅụ ò furo ḅẹ ịla ma tan ḅo kiri-ḅio saram, tẹ ọ̀ fịịm.
Anịtẹrẹmẹ Johabụ na, ò iyimbere Abisahị na Sẹba, Bikiri owiḅọtụḅọ ḅe ḍukam. 11Johabụ atomi ma ḅẹ gbọrụḅọ nwẹnị Amasa akaka sịẹsime tẹ ḅẹẹ, “Johabụ pakịrị ḅụ sime ḅọ sime ḅọ, anịsakị sime Devidi pịrị ḅọ, pịrị ḅo, ye mḅọ Johabụ ḍuka mu.” 12Tẹ Amasa ọmbie ori oju gbaịn tẹ ori opu etela mẹ ogboku koro-simem. Ḅẹḅọ-ḅẹḅọ tẹ ḅo ori ẹrịḅọ-ẹrịḅọ, daasịẹm; tẹ owiḅọ ḅe tomi mamgba ḅo-ḅo daasịẹarị mẹ ẹrị tẹso, ọ̀ nwẹnị opu etela mẹ ogboku Amasa oju mẹ dogi piri-ḅio suu, tẹ gbọrụ kapa kẹ ọ̀ gbaịn. 13Ini opu etela mẹ ogboku ò dogi siin tẹso, tomi mamgba nwẹnị Sẹba, Bikiri owiḅọtụḅọ ḅe ḍuka ḅẹ Johabụ ḍuka mu.
14Sẹba, Izirẹlị ḅẹ furo-furo mamgba ḅọrọ tolu mu Bẹtị-mahaka ḅe Ebẹlị lam, tẹ Bikiri furo-ḅẹ-apụ mamgba kobirim, tẹ ò ḍuka sọ-mum. 15Tomi mamgba tẹ Johabụ na sime apụ ma nwẹnị ḅo, tẹ Bẹtị-mahaka ḅẹ Ebẹlị ḅio ori ikelema-koro tẹ owu kẹ ọ̀ paka. Ini aḅaịn kẹ ọgọnọ lẹsẹrẹtẹ ẹbẹ pembe onu gbọrụ opu ama mẹ ikelemam, tẹ ini onu mẹ sukuruma-gbin ḅẹ ḅara kẹ ye kẹ anị fomum. 16Anịtẹso ye-nimi gbọrụ ẹrẹḅọ nwẹnị opu ama mẹ ḅio sime tẹ sịn, “Ó pokii! Ó Pokii! Ó ḍuko Johabụ pịrị ọ̀ mịanga ḅoo, mịẹ tẹ àrị ẹkwẹn ọ́ pịrị ḅẹ ḅara.” 17Ọ̀ nwẹnị ḅo á kpeki; á nwẹnị ọ̀ gbela, “Johabụ ḅe ị́yẹrị?”
Ọ̀ nwẹnị pakịrị, “Yẹrịị.”
Anịtẹso á nwẹnị ọ̀ ḅẹẹ, “À kọn ḅẹ ẹkwẹn-aḅịḅị ma pokii.”
Ọ̀ nwẹnị pakịrị, “À pokiarị.”
18Anịtẹso á nwẹnị ḅẹẹ, “Elemu sakị ḅụ ịn ḅẹẹ ḅẹẹm, ‘Yee ịn mu Ebẹlị ḅụ datụkụma nimi ẹkwẹn gbela nimi’; anịsakị anị ḅara mie ịn kẹ gbọrụ ḅẹrẹ kọn fama ḅara. 19Yẹrị anie inima tẹ Izirẹlị ḅụ dein ḅara na, minini nyana ḅara sime apụ ma ḅẹ gbọrụḅọ; ị́ gbọrụ opu ama tẹ Izirẹlị ḅụ iyingiḅọ sọ wararị ama fama ḅẹ ḍọkịarị; í tiegotẹ KỊNỊNYANAḄỌ ḅe sime anga mẹ mẹnị-ọkị ḅẹ ḅii ḅẹ?”
20Johabụ nwẹnị pakịrị, “Gbala-gbala yẹrị-yaa ndẹ, yẹrị-yaa, mịnẹ yẹrị ḅo mẹnị-ọkị, anịanịa fama ḅẹ mẹ! 21Aniemẹ karakaraye-a. Kụma Iferemu, tụndụ ọgọnọ ḅẹ opu sịẹ mẹ ḅẹ gbọrụ owiḅọ, Bikiri owiḅọtụḅọ ịn Sẹba kẹ sịn ḅọ ḅe, ọ̀ ḅara saakị Amadaḅọ Devidi da-pakam; ọmịnị ori ngẹrị kẹ ị̀ pịrịị, anịsakị arị opu ama mẹ ḅụ ị̀ ḅụụ nụnụ-ọkị ḅa.”
Tẹ ẹrẹḅọ ma nwẹnị Johabụ ḅẹẹ, “Ḍikii ini ọ̀ sịḅị kẹ onu mẹ ọgọnọ gbin saḅama ị́ pịrị ḅa.” 22Anịtẹso ẹrẹḅọ ma nwẹnị á ye-nimi ḅụ tomi mamgba ḍọkụma-mu. Tẹ ịn nwẹnị Sẹba, Bikiri owiḅọtụḅọ ḅe sịḅị pẹlẹ-siin, tẹ anị kẹ gbin pakama Johabụ pịrịm. Anieḅụ Johabụ ọdụ mẹ ofurom, tẹ ini opu ama mẹ ḅụ gala-galam, ọrụḅọ-ọrụḅọ so amịna ama mum. Tẹ Johabụ pịkịma Jeruselemu ḅụ amadaḅọ ḅe ḍọkụma-mum.
Devidi Fịrịmẹnjị-Opuapụ
23Mịọkụ Johabụ Izirẹlị ḅẹ ọmụ-ogbo mẹmgba kẹ sịḅị-dam; anịsakị Bẹnaya, Jehohada owiḅọtụḅọ ḅe Keretayịtị apụ na, Pẹlẹtayịtị apụ na Devidi ḅụụ-ḍikiḍikiapụ ma kẹ sịḅị-dam; anịsakị. 24Adoramụ fịrịma ḅẹ kụrọ afịrị kẹ sịḅị-dam; anịsakị Jehosafatị, Ayiludu owiḅọtụḅọ ḅe ịn kẹ ye kẹẹ sụa wararị aḍiri ma ḍikiḍiki kẹ sịḅị-dam; 25anịsakị Seva anie ḍiri-kẹẹḅọ; anịsakị Zadọkụ na, Abịyata na anie agbamịẹapụ; 26anịsakị Ịra, Jahiri ḅẹ ḅọ ḅe sọ Devidi agbamịẹḅọ.
(C) The Bible Society of Nigeria