Sòm 119:25-32

Mwen kouche atè nan pousyè a! Ban m lavi ankò, jan ou te pwomèt la. Mwen di ou tou sa m te fè, ou reponn mwen. Tanpri, moutre m tou sa ou vle m fè. Fè m konprann ki jan pou m swiv lòd ou ban mwen yo. M'a kalkile bèl bagay ou fè yo. Mwen gen lapenn, dlo ap koule nan je m. Mete m sou de pye m ankò, jan ou te pwomèt la. Pa kite m lage kò m nan bay manti. Fè m favè sa a, moutre mwen lalwa ou. Mwen pran desizyon pou m swiv verite a. M'ap kenbe jijman ou yo devan je mwen. Mwen swiv prensip ou yo pwen pa pwen. Senyè, pa kite m pran wont. M'ap prese obeyi kòmandman ou yo lè ou louvri lespri mwen.