Neyemi 6:1-4

Sanbala, Tobija, Gechèm, moun peyi Arabi a, ansanm ak tout rès lènmi nou yo vin konnen nou te fin rebati miray la. Pat gen okenn twou ladan l ankò. Men lè sa a, nou pat ankò moute gwo batan pòtay yo. Sanbala ak Gechèm voye yon mesaje vin di m yo ta renmen kontre avè m lavil Ak-Kefirim, nan Fon Ono a. Men yo menm, yo t'ap chache yon jan pou yo fè m mal. Se konsa mwen voye mesaje bò kote yo avèk repons sa a: — M okipe ak yon travay enpòtan, m pa ka desann. Si m kite travay la pou m ale kote nou, li pral sispann. An kat fwa, yo voye fè m menm envitasyon an. Chak fwa, mwen voye menm repons lan ba yo.