Lik 23:1-5

Tout bann moun yo leve, yo mennen Jezi devan Pilat. Rive la, yo pran pale kont Jezi, yo di: — Nou jwenn nonm sa a ap moute tèt pèp la. L'ap di yo pou yo pa peye Seza lajan taks yo. Li menm rive pretann se Kris la li ye, li se wa. Pilat mande li: — Eske ou se wa jwif yo? Jezi reponn li: — Se ou ki di li. Pilat di chèf prèt yo ak foul moun yo: — Mwen pa wè okenn rezon pou m kondannen nonm sa a. Men, yo kenbe la avè l, yo di: — L'ap moute tèt pèp la ak pawòl l'ap di yo. Li konmanse travay sa a depi nan peyi Galile, li pase nan tout peyi Jide a, li rive jouk isit la.