Levitik 5:14-19

Senyè a pale ak Moyiz, li di l konsa: — Si yon moun fè yon peche san li pa fè espre, si li fè sa li pat dwe fè, tankou lè li bliye bay sa li te dwe bay pou Senyè a, l'a fè yon ofrann pou repare bagay li te fè ki mal la. L'a pran yon belye mouton nan bèt li yo, yonn ki san okenn enfimite. Y'a di konbe bèt la vo, dapre lajan yo sèvi nan kay Bondye a, epi l'a ofri l bay Senyè a. Se sa yo rele yon ofrann pou peye pou sa yon moun fè ki mal. Se pou l peye tou sa li te bliye bay Senyè a, plis ven pou san anwo li. L'a pote l bay prèt la. Prèt la menm va ofri bouk la, l'a touye l pou peye pou sa moun lan te fè ki mal, epi Bondye va padonnen l sa. Si yon moun fè peche san l pa konnen, si li fè yon bagay Senyè a te bay lòd pa fè, atout li pat fè espre, li antò. Se pou l peye pou sa l fè a. L'a pran yon belye nan bèt li yo, yonn ki pa gen okenn enfimite, l'a pote l bay prèt la. Prèt la menm va ofri l pou peye pou sa moun lan te fè ki mal. Y'a kalkile pri bèt la dapre sistèm lajan yo sèvi nan kay Bondye a. Prèt la va fè ofrann lan pou peye pou sa moun lan te fè san l pat konnen an, epi Bondye va padonnen l sa. Se yon sakrifis moun fè pou peye mal yo fè kont Senyè a.