Jan 7:37-44

Dènye jou fèt la, se li ki te pi enpòtan. Jou sa a, Jezi kanpe devan foul moun yo, li di yo byen fò: — Si yon moun swaf dlo, li mèt vin jwenn mwen, li mèt vin bwè. Moun ki mete konfyans yo nan mwen, y'ap wè gwo kouran dlo k'ap bay lavi koule sòti nan kè yo, jan sa ekri nan Liv la. (Jezi t'ap pale ki jan moun ki kwè nan li yo ta pral resevwa Sentespri. Lè sa a, Sentespri pat ankò desann sou pèsonn, paske Jezi pat ankò moute nan syèl la.) Te gen kèk moun nan foul pèp la, lè yo fin tande pawòl sa yo, yo t'ap di konsa: — Se vre wi. Nonm sa a, se pwofèt la! Gen lòt ki t'ap di: — Se Kris la. Gen lòt ankò ki t'ap di: — Men, Kris la pa ka sòti nan peyi Galile. Liv la di: Kris la, se yon pitit pitit David la ye. Se Betleyèm li gen pou l sòti, lavil kote David te pase tout lavi li a. Te vin gen divizyon nan mitan foul moun yo poutèt Jezi. Gen ladan yo ki te vle arete l, men pèsonn pat mete men sou li.