Jeremi 34:1-7

Yon lòt jou, Senyè a pale ak Jeremi ankò. Lè sa a, Nebikadneza, wa Babilòn lan, t'ap atake lavil Jerizalèm ansanm ak tout ti bouk ki nan vwazinay li yo. Li te gen avè l tout lame pa l la ansanm ak sòlda tout lòt nasyon ak lòt ras li te soumèt anba pouvwa li. Men sa Senyè a, Bondye pèp Izrayèl la, di Jeremi: — Ale pale ak Sedesyas, wa peyi Jida a, w'a di li konsa: Senyè a pral lage lavil Jerizalèm nan men wa Babilòn lan ki pral mete dife ladan l. Ou menm, ou p'ap chape. Y'ap arete ou, y'ap lage ou nan men l tou. W'a kontre avè l bab pou bab. W'a pale avè l. Lèfini, w'ap pati pou Babilòn. Tansèlman, Sedesyas, wa Jida, koute mesay Senyè a bay pou ou. Ou p'ap mouri nan lagè. W'ap mouri mouri ou nan kabann ou. Lè sa a, y'a boule lansan pou ou menm jan yo te konn boule lansan pou zansèt ou yo ki te wa anvan ou. Y'a rele pou ou, y'a di: Ki lapenn sa a? Wa a mouri! Se mwen menm Senyè a ki di sa. Se mwen ki bay mesay sa a. Pwofèt Jeremi bay Sedesyas, wa peyi Jida a, mesay sa a lavil Jerizalèm. Lè sa a, lame wa Babilòn lan t'ap atake lavil Jerizalèm ansanm ak de lòt lavil nan peyi Jida, Lakis ak Azeka, ki t'ap kenbe tèt toujou ak lènmi yo, paske yo menm yo te byen pwoteje.