Egzòd 15:1-5

Lè sa a, Moyiz ak moun pèp Izrayèl yo chante yon chante pou Senyè a. Men sa chante a di: — M'ap chante pou Senyè a, paske li genyen batay la. Li voye chwal yo ak tout kavalye yo jete nan lanmè. Senyè a, se tout fòs mwen. Se pou li m'ap chante. Se li menm ki delivre m. Se Bondye mwen li ye, m'ap fè lwanj li. Se Bondye zansèt mwen yo, m'ap di jan li gen pouvwa. Senyè a, se yon vanyan sòlda. Se Senyè yo rele l. Li voye cha farawon yo ansanm ak tout lame li a jete nan lanmè. Li fè pi bon sòlda li yo mouri neye nan lanmè Wouj la. Lanm lanmè a kouvri yo. Yo fè fon tankou wòch.