2 Samyèl 10:9-14

Joab te wè lame lènmi yo te ka atake l ni sou devan ni sou dèyè. Sa l fè? Li chwazi pi bon sòlda nan lame pèp Izrayèl la, li mete yo an pozisyon devan lame moun Aram yo. Lèfini, li mete Abichayi, frè l la, alatèt rès lame a, li fè yo pran pozisyon devan moun Amon yo. Joab di Abichayi konsa: — Si ou wè moun Aram yo sòti pou yo bat mwen, w'a vin ede m. Konsa tou, si mwen wè moun Amon yo vle pi fò pase ou, m'a vin ede ou. Mete gason sou nou. Kouray! Nou pral goumen rèd mare pou pèp nou an ak pou lavil Bondye nou an. Bondye va fè sa li vle li menm. Joab ak sòlda li yo mache sou moun Aram yo. Moun Aram yo kouri pou li. Lè moun Amon yo wè moun Aram yo kouri ale, yo kouri tou pou Abichayi, yo antre nan lavil la. Lè sa a, Joab sispann batay la ak moun Amon yo, li tounen lavil Jerizalèm.