2 Kwonik 36:1-5

Moun peyi Jida chwazi Jowakaz, pitit gason Jowas. Yo mete li wa nan plas papa li. Joakaz te gen venntwazan lè li moute wa nan peyi Jida. Li gouvènen lavil Jerizalèm pandan twa mwa. Neko, wa peyi Lejip la, mete l atè, li fòse peyi Jida a ba li sètmil senksan (7500) liv ajan ak swasannkenz liv lò. Apre sa, Neko pran Elyakim, frè Joakaz, li mete l wa nan plas li. Lè sa a, li chanje non Elyakim, li rele l Jojakim. Lèfini, li pran Joakaz, li mennen l nan peyi Lejip. Jojakim te gen vennsenkan lè li moute wa peyi Jida. Li gouvènen nan lavil Jerizalèm pandan onzan. Li te fè sa ki mal devan Senyè a, Bondye li a.