1 Samyèl 2:12-17

Pitit gason Eli yo te yon bann jenn pèvèti. Yo pa te nan koze Bondye ak moun, ni yo pa te aji jan prèt ta dwe aji ak pèp la. Chak fwa yon moun t'ap touye bèt pou ofri bay Bondye, domestik prèt la vini ak yon gwo fouchèt twa dan. Antan vyann lan ap kwit, li plonje fouchèt la nan kaswòl la, nan chodyè a, nan mamit la osinon nan bonm lan. Tou sa fouchèt la te pran, se te pou prèt la. Se konsa yo te fè sa lavil Silo ak tout moun pèp Izrayèl la ki te vin fè ofrann yo la. Sa ki pi rèd ankò, anvan menm yo te wete grès pou boule yo, domestik prèt la vini, epi li di nonm ki t'ap ofri bèt yo te touye a konsa: — Ban m moso vyann pou prèt la fè woti. Li p'ap asepte ou ba li vyann bouyi. Li bezwen vyann fre. Men, si nonm lan ta reponn li: Tann yo boule grès la anvan, apre sa w'a pran sa ou vle, domestik prèt la ap di l: — Non! Ban mwen l kounyeya. Si ou pa ban mwen li, m'ap pran l ak fòs pa m. Peche pitit gason Eli yo te grav anpil anpil devan Senyè a, paske yo pat respekte ofrann yo te fè pou Senyè a.