1 Samyèl 12:1-5

Samyèl di moun pèp Izrayèl yo: — Nou wè mwen fè tou sa nou te mande m fè. Mwen ban nou yon wa pou gouvènen nou. Kounyeya nou gen yon wa alatèt nou. Mwen menm, poutèt pa m, mwen fin granmoun, cheve m fin blan, se pitit gason m yo ki la avèk nou. Depi mwen jenn gason rive jòdi a m'ap mache alatèt nou. Kounyeya, men mwen! Se pou nou di m devan Senyè a, devan wa li chwazi a, sa mwen janm fè nou. Eske mwen janm pran bèf osinon bourik yonn nan nou? Eske mwen janm pwofite sou pèsonn? Eske mwen janm aji mal ak pèsonn? Eske mwen janm pran lajan nan men pèsonn pou m kache anyen pou li? Si mwen janm fè bagay konsa, m'ap renmèt sa m te pran an. Pèp la reponn: — Ou pa janm aji mal ak nou. Ou pa janm pwofite sou nou ni ou pa janm pran lajan nan men pèsonn. Samyèl di yo: — Jòdi a, Senyè a ansanm ak wa li chwazi a temwen nou pa jwenn anyen pou nou repwoche m. Pèp la reponn: — Senyè a temwen!