Marcos 5

Ti chojni Gadara chónta ncha̱kuén jínahña

(Mt. 8:28-34; Lc. 8:26-39)

1Ndá kꞌuatsínka sin tóhe ti nda̱ñao, la kjuíji sin Gadara. 2Ndá ti ó kꞌuínkaji̱xi̱n chꞌin Jesús ti ntabarco la ijnko nkexro chónta ncha̱kuén jínahña kui̱xi̱n ti tsíkji̱xravá chojni. 3Ti nkexro la nkochríxín kjuákꞌe ti tsíkji̱xravá chojni la ninkexró tjachahya nchenteto, o̱ sinchentetoxín cadena. 4Itsjé vece la kjuínchentetoxín sin chꞌan cadena la ko chika iye ti to̱té chꞌan la ko itja chꞌan, la kjónté xi̱kaha, la kꞌuekóchríjin chꞌan ti cadena la ko kꞌuekjínchekuen chꞌan ti chika iye. La ninkexró tjachahya tꞌe̱tue̱hen ti jehe chꞌan. 5Tie ko ncha̱kotjin ixri chꞌan, tꞌóyako chꞌan nó ijna̱ la ko ti tsíkji̱xravá chojni la jehó chꞌan tjatexin chꞌan ixro̱ a̱sén chꞌan. 6Ndá ti ó kꞌuíkon chꞌan ikjín ikjui chꞌin Jesús la kuinká chꞌan, sákjuichréhe̱ chꞌan la kjuákꞌexín chꞌan tochꞌin chꞌan nkayakon ti chꞌin Jesús 7la kꞌóyako chꞌan, ndáchro chꞌan:

―¿Nkekuènté tji̱a̱té ti jeheni, jaha Jesús Xje̱en Díos itjen nkaya nka̱jní? Díos tjetsjehe xrja̱noáhá kixin sinchekjasótehyani.

8Mé xi̱kaha ichro kixin tsíndáchro chꞌin Jesús:

―Jaha ncha̱kuén jínahña, tito̱hé ti nkexro i.

9Ndá chꞌin Jesús mé kjuanchankí ndáchro:

―¿Nkexrín itꞌian?

Ndá kjuáte̱he ti nkexro a ndáchro:

―Legión itꞌini kixin itsjéni.

10La ti ncha̱kuén jínahña la chrónoéhe̱ ti chꞌin Jesús kixin chrókꞌuaxrjexinhña sin ti chjasin a. 11La chjinaxón ntiha mé siín itsjé kochíno xrinie 12ndá ti ncha̱kuén jínahña, la chrónòa ndáchro:

―Ti̱to̱héni tsꞌixeheni a̱sén ti kochíno.

13Ndá chꞌin Jesús kjuajon kjuachaxin. Ndá kaín ti ncha̱kuén jínahña mé kꞌuaxrjexín ti nkexro a la sákjuikꞌixehen a̱sén ti kochíno, mé chjina yaá mil va, ndá kaín va kꞌuitsínkayá va tsa̱ka la kꞌuitsínkankí va ti nda̱ñao ndá kjuihin va la ikꞌuén va.

14Ndá ti chojni tꞌayakohen ti kochíno mé chrakon sin, la kuinká sin sákjuichronka sin chjasén sin la ko ti sin tjejó no̱nte̱e. La itsjé chojni kuitsjehe sin nkehe tsíkóhen ntiha. 15Ndá ti ó kjuíji sin ti itjen chꞌin Jesús la kꞌuíkon sin kixin ti nkexro kꞌuéchónta ncha̱kuén jínahña, la ó jína itjen, tjetja̱xi̱n chrinkáya ijnko ika, ndá jehe sin la imá chrakon sin. 16Ndá ti sin tsíkꞌikon la chrónka sin nkexrín kóhen ti chojni kꞌuéchónta ncha̱kuén jínahña la ko nkexrín kóhen ti kochíno. 17Ndá kjuankíxin chrónoéhe̱ sin chꞌin Jesús kixin sáchrókjuixin ntiha.

18Ndá ti ó kꞌui̱tꞌótjen chꞌin Jesús ti ntabarco, la ti nkexro kꞌuéchónta ncha̱kuén jínahña la chrónòa kixin kja̱xin sáchrokjui. 19Kjánchó Jesús la kjuajonhña kjuachaxin, la ndáche ti nkexro a:

―Sátjia ndo̱a, tjichréhé ti sin kjéhya la chenka sin ti kjuaxroan ijié kjuasin Díos kixin kuito̱ha jína la ko nkexrín kui̱konoáha Díos.

20Ndá ti nkexro a la sákjuí ti chjasin Decápolis la kjuankíxin chrónka kaín ti nkehe kjuíchꞌe chꞌin Jesús la ko nkexrín kuito̱he jína. La kaín ti sin kuíhin la imá chrakon sin.

Ti xje̱en Jairo la ko ti tjan kuákóxi̱n iké chꞌin Jesús

(Mt. 9:18-26; Lc. 8:40-56)

21Ndá ti ó xíkjanka̱o chꞌin Jesús ti ntabarco a ínaá ti chrínta nda̱ñao la kóchjina nchónhña chojni, ndá chrínta ti ìnta̱ ó kuíto̱he chꞌan. 22Ndá ikui ijnko nkexro tꞌe̱to̱an kuènté ti ni̱nko judío mé itꞌin Jairo, la ti ó kꞌuíkon chꞌan ti chꞌin Jesús la kjuákꞌexín chꞌan tochꞌin chꞌan 23la chrónòa chꞌan, ndáchro chꞌan:

―Xja̱na chjin la ó tjetꞌen tjan. Xrja̱noáha chrókjui̱ni kixin chrókjuakꞌetja itjá ti jehe tjan ndá chrókuíto̱he tjan jína la chrókjuákꞌechón tjan.

24Ndá chꞌin Jesús sákjui̱ko ti nkexro a. La nchónhña chojni chréhe̱ sin tinkákꞌindate sin chꞌan. 25Ndá kja̱xin ntiha tjenkákjan ijnko chojnichjin níhi, ó teyó nánó sítji tjan ijni̱. 26Ndá imá kjuasóte tjan kixin nchónhña xro̱a̱n kóhen tjan la ó kjuixin kjuéje̱he tjan kaín ti chichaon chónta tjan, kjánchó kuíto̱ehya tjan jína, la a̱ntsí tinkákótaó tjan. 27Ndá ti ó kuíhin tjan chrónka chojni ti kjuaxroan kjuasin chꞌin Jesús, ndá ikui tjan kjuákꞌenkákjan ti chojni la chréhe̱ tjan ti chꞌin Jesús la kuákóxi̱n tjan ti iké chꞌan, 28kixin ndáchro tjan, kjónté chrínta ti iké chꞌan ó, chrókuákóxi̱n tjan la chrókuíto̱he tjan jína, ichro tjan. 29Ndá tuénxín ti ijni̱ la kjui̱xén la kónohe tjan kixin ó kuíto̱he tjan jína la ó kjuìin ti ichin chónta tjan. 30Ndá chꞌin Jesús la tuénxín kónohe chꞌan kixin ti kjuachaxin chónta chꞌan mé kuito̱exín jína ijnko chojni, ndá nkátjíá chꞌan, kjuanchankí chꞌan:

―¿Nkexro kuákóxi̱n ti kaná? ―ichro chꞌan.

31Ndá kjuáte̱he ti sin kꞌuájiko chꞌan, ndáchro:

―Ó noha kixin nchónhña chojni siín la tꞌindate sin ti jaha, ¿ndá nkekuènté tjánchánkia nkexro ti kuákóxi̱n ti jaha?

32Kjánchó jehe chꞌan la nkátjíá chꞌan tsjehe chꞌan nkuíxín kixin tsꞌikon chꞌan nkexro kuákóxi̱n ti iké chꞌan. 33Ndá ti tjan a la chrakon tjan, la síxrànka̱ tjan kixin nohe tjan kixin ó kuíto̱he tjan jína, la kóchjina tjan la kjuákꞌexín tjan tochꞌin tjan nkayakon chꞌin Jesús, la chrónka tjan kaín ti nkehe kóhen tjan. 34Ndá chꞌin Jesús ndáchro:

―Xje̱eni, ti kuitekaoan ti janhan la kuito̱ha jína. Ijie la kjuaxróxin sátsjia ―ichro chꞌan.

35Ndá na̱xa̱ tjenixja chꞌan la kui̱xi̱n chojni ndo̱e ti nkexro tꞌe̱to̱an ni̱nko. Ndáchro:

―Xja̱an la ó kjuixin ikꞌuén. Í chjeèhya ixra̱ ti Maestro.

36Kjánchó chꞌin Jesús ti ó kuíhin ti nkehe ichro sin, la chenka chꞌan ti nkexro tꞌe̱to̱an ni̱nko:

―Chrakonhña, jehó titekaoan ti janhan.

37La í kjuajonhña chꞌan kjuachaxin kixin tsochréhe̱ íso chojni, jehó Pedro, Jacobo la ko Juan kícho chꞌin Jacobo. 38Ndá ti ó kjuíji sin ndo̱e ti nkexro tꞌe̱to̱an ni̱nko la kꞌuíkon chꞌan kixin imá sítjité chojni, tsjánkàma̱ sin ti ixjan tsíkꞌen. 39Ndá ti ó kꞌuíxehen chꞌan ti nchia la ndáchro chꞌan:

―¿Nkekuènté imá tjasítéra tsja̱nkàmara ti xjan i? Ti xjan la tsíkꞌenhña xjan, tjejua xjan ―ichro chꞌan.

40Kjánchó kaín sin kjuanoá sin chꞌan. Ndá kꞌue̱to̱an chꞌan kixin kaín sin sátsji sin ndója. Ndá kꞌuíxehen sin ti tjetsínka ti xjan jehe chꞌan la ko ìñé ko itꞌé ti xjan la ko ti sin sákjuíko chꞌan. 41Ndá itsé chꞌan itja ti xjan la ndáchro chꞌan:

―Talita, cumi ―mé tíha tꞌaxrjexín: Cháchjin, Tꞌàyá.

42A̱ndá ti xjachjin chónta teyó nánó la tuénxín kꞌuàya tjan la ó jína itji tjan. Ndá kaín ti chojni siín ntiha kꞌuíkon la imá chrákon sin. 43Kjánchó kꞌue̱to̱an chꞌin Jesús kixin ninkexró tso̱noehña ti nkehe kóhen la kꞌue̱to̱an chꞌan kixin tsjajon sin nkehe sinie ti xjachjin.

Aprann plis bagay sou El Nuevo Testamento, Salmos y Proverbios

Marcos 5

Vèsè popilè nan Bib la ki soti nan Marcos 5

Vèsè popilè nan Bib la ki soti nan
Marcos 5