А нӹнӹжӹ, халыкын когоракшывлӓ доно погынен кӓнгӓшен нӓлмӹкӹ, оролвлӓлӓн шукы оксам пуэнӹт дӓ попенӹт: «Тӹдӹн тыменьшӹвлӓжӹ йыдым толыныт дӓ амалымына годым кӓпшӹм шолышт кенӹт манын келесӹдӓ. Вуйлатышы докы тидӹ гишӓн увер миэн шоэш гӹнь, мӓ тӹдӹм ӹняндӓренӓ, дӓ тӓлӓндӓ нима гишӓнӓт шытырланаш ак кел». Оролвлӓ, оксам нӓлӹн, келесӹмӹ семӹньок ӹштенӹт. Нӹнӹн попымыштым иудейвлӓ лошты тагачшы кечӹ яктеӓт шӓркӓлӓт.