Vèsè popilè nan Bib la ki soti nan Detewonòm 7

Pataje

Se pou nou rekonèt Senyè a, Bondye nou an, se sèl Bondye ki genyen, sèl Bondye k'ap toujou kenbe pawòl li. Wi, l'ap toujou kenbe kontra li pase a. L'ap toujou renmen moun ki renmen l, moun ki fè tou sa l mande yo fè, de pitit an pitit, pandan mil jenerasyon.

N'a fè sa paske se yon pèp apa nou ye pou Senyè a, Bondye nou an. Se nou menm Senyè a, Bondye nou an, te chwazi nan tout pèp sou latè pou fè nou tounen yon pèp ki rele li pa li.

Men, se paske Senyè a te renmen nou, epi li te vle kenbe pwomès li te fè zansèt nou yo. Se poutèt sa li delivre nou avèk fòs ponyèt li. Li fè nou sòti kite peyi Lejip kote nou te tounen esklav la. Li wete nou anba pouvwa farawon an.

Si nan tout pèp sou latè, se nou menm Senyè a te pito, si li te chwazi nou, se pa paske nou te gen plis moun nan pèp nou an pase lòt yo. Okontrè se nou ki te gen pi piti kantite moun.

Bondye ap beni nou plis pase tout lòt pèp yo. P'ap gen yon moun nan mitan nou, fanm kou gason, ki p'ap ka fè pitit. Konsa tou, p'ap gen yonn nan bèt nou yo, ni mal ni fenmèl, ki p'ap ka fè pitit.