Vèsè popilè nan Bib la ki soti nan A̱romawa 1

Pataje

Mat n fwuong nsum shei A̱sham Nkhang Kristi ka bah. Kikya yet chet A̱gwaza hu ku nyia̱ ta̱m san á̱niet ma̱ a̱di̱di̱t ba̱ nwuak fwuo di̱ Kristi a̱ni; á̱ tsa shei nka hu da̱ a̱vwuo A̱yahudawa, a̱wot á̱ si̱ shei Nnwap na̱ nwai yet A̱yahudawa a̱ni meang.

A̱sham Nkhang kani tyai si̱sak nang A̱gwaza ntak kpa̱sai nang gu nkyiak zi̱t, zi̱ yet á̱tsotswat á̱niet sang a̱bun a̱zaghyi nggu a̱ni. Á̱ shyat tsotswat huni ku yet a̱jhyem a̱ni, mat nwuak fwuo di̱ Yesu Kristi wa ma̱nyin nggu. Ma̱nang á̱ ndyuut ma̱ A̱lyiat A̱gwaza na a̱ni, nyia̱, “Mat nwuak fwuo da̱ nung hwa nang a̱tsotswat a̱yin na nswuan.”

Neet nang A̱gwaza mmat swanta hu, á̱nietbishyi nwuan kyai tswazwa ma̱ng a̱byin. Mami kuzang kyang nang A̱gwaza mat a̱ni, á̱nietbishyi doot ba̱ li chet sang sangba̱p gu hu, ma̱ng za̱kwa yet A̱gwaza nggu ji. Mat a̱nia, á̱nietbishyi byia̱ ta̱fwat di̱ nwai lyen A̱gwaza bah.

A̱tsak a̱lyiat, ku nang ba̱ ndyen A̱gwaza wu a̱ni, ba̱ si̱ kwok gu ntong nang A̱gwaza a̱ni, ku ba̱ gwai nggu bah. Da̱ a̱kwonu a̱kya, ba̱ si̱ nwuo nyia̱ a̱di̱dam sang tswá di̱ kyang ku myim A̱gwaza a̱ni. Nang ku ndi a̱nia a̱ni, a̱di̱dam mba wu si̱ tyia̱ lyin, a̱wot nfwuo mba na si̱ tyia̱ tai.

A̱wot da̱ a̱kwonu ka nang ba̱ na nfi̱k a̱tsatsak a̱lyiat A̱gwaza wu a̱ni, ba̱ si̱ khai ba̱ kwok ntong a̱zaghyi a̱yaagwaza sang swuan. A̱wot ba̱ si̱ kwok ntong a̱zaghyi nkyang nang A̱gwaza mat a̱ni. A̱wot ba̱ si̱ nyia̱ ná nta̱m da̱ a̱kwonu A̱gwaza ma̱ a̱pyia̱ nggu, a̱ mat swanta hu a̱ni. A̱wot A̱gwaza wuni wa ma̱nyin nggu maai á̱ dyep gu si̱ nat sang sangba̱p! Samba̱rka!

A̱wot A̱gwaza tswazwa ni̱ tak mwai lyen nggu hu tazwa a̱mgba̱m á̱niet ba̱ lak khwi ngguu, ma̱ng á̱niet a̱ka̱kpa̱t, ba̱ ni̱ vwuong lyen a̱chuchuk hu mat a̱ka̱tuk nyia̱ mba wu a̱ni.

Mat a̱nia, A̱gwaza si̱ kai mba a̱ ghwon. Ba̱ si̱ ya a̱son di̱ nyia̱ kuzang tangka̱i a̱shi̱shi̱k nkyang nsum nchi̱ri̱ng, nang a̱ka̱tuk nshyuo nfwuo mba wu fwuong di̱dang nyia̱ hu a̱ni. Nang ku ndi a̱nia a̱ni, ku á̱nyiuk ba meang, ba̱ si̱ nwuo lak khwat ma̱ng á̱tyok nang ku myim ku ndi a̱ni. Da̱ a̱kwonu a̱kya, ba̱ si̱ nwuo khwat ma̱ng á̱ghyang mba, ba̱ yet á̱nyiuk a̱ni. Ma a̱nia wa á̱tyok ba meang, ba̱ si̱ nwuo nyian a̱shi̱shi̱k nkyang nsum, mat a̱ka̱tuk nshyuo nvam mba wu, ba̱ si̱ la̱u di̱dang chat khwat ma̱ng á̱tyok á̱ghyang nang á̱nyiuk mba a̱ni. Á̱tyok ba si̱ nyian nkyang nsum ma̱ng á̱tyok á̱ghyang. Mat tangka̱i a̱shi̱shi̱k nyia̱ huni, nang ba̱ nyia̱ mi̱ nvam mba na a̱ni, ba̱ si̱ ghwon a̱tsatsak a̱lyiat wu. Mat a̱nia, A̱gwaza si̱ nyiak ba ma̱ng swuo a̱bung ku myim mba a̱ni. A̱wot ku nang ba̱ ndam, nyia̱ ku yet bwuon hwa ba̱ san A̱gwaza mi̱ nfwuo mba na a̱ni, A̱gwaza si̱ ghwon mba ba̱ ya a̱son ma̱ng nyia̱ kuzang tangka̱i a̱shi̱shi̱k nkyang nsum á̱ nchi̱ri̱ng, da̱ na̱ myim ba̱ nyia̱ a̱ni bah.

Ba̱ si̱ kyiak á̱pyia̱ mba nang á̱niet mumwang a̱ni, a̱wot ba̱ yet á̱tsatsak á̱bwuon á̱niet bya. A̱wot da̱ a̱kwonu ka nang ba̱ na nkwok ntong a̱zaghyi A̱gwaza a̱ byia̱ a̱kyenkyai shi, a̱ si̱ bu yet A̱gwaza swuan sang sangba̱p a̱ni, ba̱ si̱ kwok ntong a̱zaghyi nghwughwu a̱yaagwaza sang swuan, nang á̱ nyia̱ ba̱ tai á̱nietbishyi ba̱ ni̱ kwi a̱ni. Nghwughwu a̱yaagwaza sang swuan á̱ghyang tai a̱ka̱man, nyám, ma̱ng nkyang na̱ kwang a̱byin a̱ni.