Vèsè popilè nan Bib la ki soti nan Deuteronomio 28

Pataje

“Kon sundon gid ninyo ang GINOO nga inyo Dios kag tumanon ang tanan niya nga sugo nga ginahatag ko sa inyo subong, himuon niya kamo nga labaw sa tanan nga nasyon diri sa kalibutan.

Kon sundon ninyo ang GINOO nga inyo Dios mangin inyo ining tanan nga pagpakamaayo

Himuon kamo sang GINOO nga mga pangulo sa mga nasyon, kag indi sumulunod lang. Huo, ara kamo permi sa ibabaw kag indi sa idalom kon tumanon kag sundon lang ninyo sing maayo ang mga sugo sang GINOO nga inyo Dios nga ginahatag ko sa inyo subong.

Padal-an kamo sang GINOO sang ulan sa husto nga tion halin sa talaguan sang iya manggad sa langit, kag pakamaayuhon niya ang tanan ninyo nga ginahimo. Magapahulam kamo sa madamo nga nasyon, pero kamo ya indi magpanghulam.

Ipapierdi sang GINOO sa inyo ang mga kaaway nga magsalakay sa inyo. Tingob sila nga magsalakay sa inyo pero lapta sila nga magpalalagyo sa inyo.

Pakamaayuhon sang GINOO nga inyo Dios ang tanan ninyo nga ginahimo kag pun-on niya sang mga patubas ang inyo mga bodega. Pakamaayuhon niya kamo sa duta nga ginahatag niya sa inyo.

Pakamaayuhon niya ang tanan ninyo nga ginahimo.

“Pakamaayuhon niya ang inyo mga banwa kag ang inyo mga uma.

Pakamaayuhon niya kamo sang madamo nga kabataan, bugana nga patubas kag madamo nga kasapatan.

Suno sa ginpromisa sang GINOO nga inyo Dios sa inyo, himuon niya kamo nga iya pinili nga katawhan, kon tumanon ninyo ang iya mga sugo kag magkabuhi kamo suno sa iya mga pamaagi.

Pakamaayuhon niya ang inyo mga patubas kag mga pagkaon.

Pakamaayuhon gid kamo sang GINOO didto sa duta nga iya ginpromisa sa inyo mga katigulangan nga ihatag sa inyo. Padamuon niya ang inyo mga anak, ang inyo mga kasapatan kag ang inyo mga patubas.

Dayon ang tanan nga katawhan sa kalibutan makahibalo nga ginpili kamo sang GINOO mismo, kag mahadlok sila sa inyo.

Gani indi ninyo paglapasa ang bisan ano nga ginasugo ko sa inyo subong, kag indi kamo magsunod sa iban nga mga dios kag mag-alagad sa ila.

“Pero kon indi kamo magtuman sa GINOO nga inyo Dios kag indi magsunod sing maayo sa tanan niya nga mga sugo kag mga pagsulundan nga ginahatag ko sa inyo subong, maagom ninyo ining tanan nga pagpakamalaot