Triqui, Copala

Dan me se cachén do̱j güii, ga̱a ne̱ catúj uún Jesús chumanꞌ Capernaum, ga̱a ne̱ cuchiꞌ nana̱ rihaan nij yuvii̱ se vaa ya̱nj soꞌ rá veꞌ a. Ga̱a ne̱ cunuu chre̱ꞌ queꞌe̱e̱ ndoꞌo nij yuvii̱ rque veꞌ yoꞌ, ne̱ nda̱a xraan maꞌa̱n mán nij yuvii̱, ne̱ nda̱a rihaan taꞌyaa veꞌ yoꞌ taj rej quisi̱j doj cuma̱n nij yuvii̱ a. Ne̱ nataꞌ Jesús snana̱ Yaꞌanj rihaan nij yuvii̱ a. Dan me se caꞌnaꞌ doj yuvii̱ nica̱j nij soꞌ ꞌo̱ tuviꞌ nij soꞌ síí naꞌvee cache̱e̱, ne̱ táá chiha̱ caꞌa̱nj nij soꞌ man soꞌ a. Tza̱j ne̱ ne caꞌve̱e cuchi̱ꞌ nij soꞌ rihaan Jesús, cheꞌé se ma̱n uxrá yuvii̱ a. Cheꞌé dan cavii nij soꞌ xráá veꞌ, ne̱ cayaꞌ nij soꞌ yuꞌuj xráá veꞌ rej nicu̱nꞌ Jesús rá veꞌ, ne̱ tananij nij soꞌ yuvéé ta̱j síí naꞌvee cache̱e̱ yoꞌ rihaan Jesús a. Dan me se ga̱a queneꞌen Jesús se vaa amán uxrá rá nij soꞌ se vaa caꞌve̱e nahu̱un sa̱ꞌ soꞌ quiꞌya̱j Jesús, ga̱a ne̱ cataj Jesús rihaan síí naꞌvee cache̱e̱ yoꞌ a:
―Navij cacunꞌ xráá so̱ꞌ, na̱nj tinu̱j ―taj Jesús a.
Ne̱ ya̱nj do̱j síí naquiꞌyaj cu̱u stucua̱nj Moisés rá veꞌ yoꞌ ga̱ Jesús, ne̱ nuchruj ra̱a̱ nij soꞌ, ne̱ na̱nj guun nimán nij soꞌ a: “Me cheꞌé aꞌmii síí nihánj da̱nj ga̱. ꞌO̱ se aꞌmii soꞌ nana̱ qui̱j cheꞌé Yaꞌanj asânj. O̱rúnꞌ Yaꞌanj gu̱un nucua̱j tinavi̱j cacunꞌ xráá yuvii̱ na̱nj á”, da̱nj guun nimán nij soꞌ a. Dan me se queneꞌen nimán maꞌa̱n Jesús se vaa guun nimán nij soꞌ da̱nj, ne̱ cheꞌé dan cataj soꞌ a:
―Me cheꞌé nuchruj ra̱a̱ soj nana̱ vaa da̱nj ga̱. Tuꞌva rma̱ꞌán ꞌu̱nj se vaa navij cacunꞌ xráá síí nihánj, rá soj a̱ naꞌ. Caꞌve̱e cata̱j u̱u̱n níꞌ navij cacunꞌ xráá síí nihánj naꞌ. Ase caꞌve̱e doj cata̱j níꞌ na̱xagaa soꞌ, ne̱ nacue̱ soꞌ tuvéé soꞌ, ne̱ cache̱e̱ soꞌ cuaj, cata̱j níꞌ xa̱ꞌ. Dan me se me rá ꞌu̱nj xca̱j soj cuentá se vaa no̱ xcúún ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ roꞌ, ti̱navíí ꞌu̱nj cacunꞌ xráá nij yuvii̱ ma̱n rihaan chumii̱ nihánj ado̱nj ―taj Jesús rihaan nij soꞌ a.
Dan me se cataj Jesús rihaan síí naꞌvee cache̱e̱ a:
―Rihaan so̱ꞌ taj ꞌu̱nj, ne̱ nacue̱ so̱ꞌ tuvéé so̱ꞌ, ne̱ na̱nꞌ so̱ꞌ tucuá so̱ꞌ á ―taj Jesús a.
Ga̱a ne̱ cuaj naxaga̱a̱ soꞌ, ne̱ nacué soꞌ tuvéé soꞌ, ga̱a ne̱ curiha̱nj soꞌ rá veꞌ, niꞌya̱j ta̱ranꞌ nij yuvii̱ ma̱n rá veꞌ a. Nda̱a síj, ga̱a ne̱ caꞌanj rá nij yuvii̱, ne̱ cataj nij soꞌ se vaa veꞌé uxrá quiꞌyaj Yaꞌanj, ne̱ cataj uún nij soꞌ a:
―Daj chiha̱a̱ míj ne queneꞌe̱n níꞌ suun vaa da̱nj a̱ maan ado̱nj ―taj nij yuvii̱ a.

Ga̱a ne̱ curiha̱nj uún Jesús, caꞌanj soꞌ tuꞌva na laguaná, ga̱a ne̱ caꞌnaꞌ ri̱i̱ uxrá nij yuvii̱ rej va̱j soꞌ, ga̱a ne̱ tucuꞌyón soꞌ man nij yuvii̱ a.
Veé da̱nj va̱j soꞌ, ne̱ queneꞌen soꞌ man síí cuꞌna̱j Leví taꞌníí síí cuꞌna̱j Alfeo, ne̱ dan me se ya̱nj soꞌ rihaan mesá rej aꞌnéj nii impuestó, ne̱ aꞌnéj soꞌ impuestó man yuvii̱ a. Ga̱a ne̱ cataj Jesús rihaan soꞌ a:
―Ca̱nocóꞌ so̱ꞌ manj, caꞌa̱nj níꞌ á ―taj Jesús a.
Ga̱a ne̱ naxuma̱a̱n soꞌ, ne̱ canocoꞌ soꞌ man Jesús, caꞌanj soꞌ a.

Ga̱a chá Jesús tucuá Leví, ne̱ chá queꞌe̱e̱ síí aꞌnéj impuestó do̱ꞌ, síí tumé cacunꞌ do̱ꞌ, ga̱ Jesús ga̱ nij síí tucuꞌyón snana̱ soꞌ a. ꞌO̱ se canocoꞌ queꞌe̱e̱ nij síí vaa da̱nj snana̱ Jesús a. Ga̱a ne̱ queneꞌen nij síí fariseo naquiꞌyaj cu̱u stucua̱nj Moisés se vaa chá Jesús ga̱ nij síí aꞌnéj impuestó do̱ꞌ, ga̱ ꞌó nij síí tumé ndoꞌo cacunꞌ do̱ꞌ, ga̱a ne̱ cataj nij soꞌ rihaan nij síí tucuꞌyón snana̱ Jesús a:
―Me cheꞌé chá síí nihánj ne̱ coꞌo soꞌ ga̱ nij síí aꞌnéj impuestó do̱ꞌ, ga̱ ꞌó nij síí tumé cacunꞌ do̱ꞌ ga̱ ―taj nij soꞌ a.
Cuno Jesús nana̱ caꞌmii nij soꞌ, ga̱a ne̱ cataj soꞌ rihaan nij soꞌ a:
―Nij síí vaa nucua̱j roꞌ, ne nanoꞌ nij soꞌ man doctor naquiꞌyaj conoꞌó man yuvii̱ maꞌ. Ma̱an síí ranꞌ roꞌ, me síí nanoꞌ man doctor ado̱nj. Ne caꞌna̱ꞌ ꞌu̱nj canacu̱nj ꞌu̱nj man síí me síí sa̱ꞌ rá maꞌa̱n maꞌ. Cheꞌé nij síí tumé cacunꞌ caꞌnaj se vaa canoco̱ꞌ nij soꞌ snana̱j ado̱nj ―taj Jesús a.

Dan me se nij síí tucuꞌyón snana̱ Juan Síí Utaꞌ Ne man yuvii̱ ga̱ nij síí fariseo roꞌ, cuꞌyón nij soꞌ tocoꞌ nij soꞌ xꞌnaa man maꞌa̱n nij soꞌ, cara̱a̱ gue̱e̱ nij soꞌ rihaan Yaꞌanj a. Ne̱ ꞌo̱ güii me se caꞌnaꞌ nij soꞌ rihaan Jesús, ne̱ xnáꞌanj nij soꞌ man Jesús a:
―Me cheꞌé, ne̱ tocoꞌ núj si̱j tucuꞌyón snana̱ Juan do̱ꞌ, si̱j tucuꞌyón snana̱ nij síí fariseo do̱ꞌ, xꞌnaa man maꞌa̱n núj cheꞌé yan cara̱a̱ gue̱e̱ núj rihaan Yaꞌanj, tza̱j ne̱ nij síí tucuꞌyón snana̱ so̱ꞌ me se ne tocoꞌ nij soꞌ xꞌnaa man maꞌa̱n nij soꞌ ga̱ ―taj nij soꞌ a.
Ga̱a ne̱ cataj Jesús rihaan nij soꞌ a:
―Ase vaa síí cuchruj saꞌanj vaa ꞌu̱nj, ne̱ asa̱ꞌ caꞌve̱e toco̱ꞌ nij síí ma̱n ga̱j xꞌnaa man maꞌa̱n nij soꞌ, rá soj ga̱. Tza̱j ne̱ vaa güii, ne̱ gu̱un yaníj ꞌu̱nj rihaan nij soꞌ, quiꞌya̱j yuvii̱, ga̱a ne̱ nano̱ rá nij síí nihánj, ga̱a ne̱ toco̱ꞌ nij soꞌ xꞌnaa man maꞌa̱n nij soꞌ ado̱nj.

’Tza̱j ne̱ ase vaa yatzíj sinꞌ vaa tucuáán nga̱ noco̱ꞌ soj, ne̱ se̱ guun naꞌne̱j níꞌ mantá naca̱ man yatzíj nga̱ yoꞌ maꞌ. Sese quiꞌya̱j níꞌ da̱nj, ne̱ güii quina̱nj yuvii̱ yatzíj yoꞌ, ga̱a ne̱ nagüe̱j mantá naca̱ yoꞌ, ne̱ quisi̱nꞌ yoꞌ, ga̱a ne̱ cunu̱u xi̱j doj yuꞌuj ta̱j man yatzíj nga̱ yoꞌ na̱nj ado̱nj. Ne̱ ase vaa na vinó naca̱ vaa nana̱ tucuꞌyón ꞌu̱nj, ne̱ se̱ guun cara̱a yuvii̱ na vinó naca̱ rque nuj nga̱ maꞌ. Sese da̱nj quiꞌya̱j yuvii̱, ne̱ cuya̱nj na vinó cunu̱u xe̱e̱ yoꞌ, ne̱ se̱ cacuá nuj nga̱ maꞌ. Cheꞌé dan canu̱u̱ yoꞌ, ne̱ caya̱nj na vinó a. Cheꞌé dan araa nii na vinó naca̱ rque nuj naca̱, ne̱ ꞌo̱ mán sa̱ꞌ na vinó rque nuj yoꞌ na̱nj ado̱nj ―taj Jesús rihaan nij síí tucuꞌyón snana̱ síí cuꞌna̱j Juan do̱ꞌ, snana̱ nij síí fariseo do̱ꞌ a.

ꞌO̱ cueta̱nꞌ güii naránj rá nij yuvii̱ israelitá cachén Jesús ga̱ nij síí tucuꞌyón snana̱ soꞌ rque ꞌo̱ naa̱ ꞌnúú trigó, ne̱ guun cheꞌe̱ nij síí va̱j ga̱ soꞌ cuta nij soꞌ do̱j caa trigó a. Ga̱a ne̱ cataj nij síí fariseo rihaan Jesús a:
―Ni̱ꞌyaj so̱ꞌ á. Me cheꞌé ꞌyaj nij síí tucuꞌyón snana̱ so̱ꞌ se vaa ne nó xcúún níꞌ quiꞌya̱j níꞌ güii naránj rá ga̱ ―taj nij soꞌ a.
Ga̱a ne̱ cataj Jesús rihaan nij soꞌ a:
―Me cheꞌé, ne̱ ne naya̱a̱ soj rihaan Danj Yaꞌanj da̱j quiꞌyaj síí cuꞌna̱j David ga̱a naá a. Ga̱a quinaꞌaan rque nij tuvi̱ꞌ soꞌ, ga̱a ne̱ catúj soꞌ rá tucuá Yaꞌanj ga̱a cayáán síí cuꞌna̱j Abiatar xrej ata̱ suun noco̱o doj, ne̱ chá soꞌ rachrúún ta̱j rihaan se‑mesa̱ Yaꞌanj a. Ne̱ ne nó xcúún soꞌ cha̱ soꞌ rachrúún yoꞌ, ma̱an ina̱nj nij xrej nó xcúún cha̱ rachrúún yoꞌ a. Ne̱ rqué David yoꞌ chá nij tuviꞌ soꞌ uún a ―taj Jesús a.
Ga̱a ne̱ cataj uún soꞌ rihaan nij síí fariseo a:
―Ma̱an cheꞌé rej caꞌve̱e nara̱a̱n rá nij yuvii̱ me cuchruj Yaꞌanj güii naránj rá na̱nj á. Né cheꞌe̱ rej ca̱ta̱ nij yuvii̱ suun navi̱j rá güii naránj rá me quiꞌyaj Yaꞌanj man nij yuvii̱ a̱ maꞌ. Cheꞌé dan me, ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ roꞌ, no̱ xcúnj quiri̱i̱ taꞌngaj da̱j quiꞌya̱j yuvii̱ güii naránj rá na̱nj ado̱nj ―taj Jesús a.

Koute San Marcos 2