© 2019 Cameroon Association for Bible Translation and Literacy
℗ 2024 Hosanna;

Awing - Cameroon 2019 CABTAL Drama (NT)

Əghâ ándó Yeso a nə məgtə̂ nə́ a mə́ zéʼkə nə́ ndɛn mənu ghɛn ətsəm lə́, ə́sóŋə á mbô ngaŋə́zoŋə́ndzəm əjí ńgə́, “Ndzaŋ nə́ jî nə́ lə́, Akɔŋtə Ndzáʼkə á pɛ́d lə́ əlě pɛ̌, pə́ chîə á mə́ yǐ nə́ fɛ̂ Mɔ́ Ŋwu ńgə́ pə́ kwumtə̂.”
Pətə́kɔʼ pə́ ngaŋə́pêsê pópə pəkəm pə́ aláʼ pə́ tíʼ ńtsɛntə̂ á ntɔ́ʼ Mbêsê yi Ngweŋ páʼ əlɛ́n yi ə́ nə́ ḿbə́ nə́ Kaifasə, ńtíʼə ńtyáŋə mənaŋ ndzaŋ pə́ yǐ nə́ waamə̂ Yeso a ndzəmə ndzəm ə́ jwítə yə́. Ńtíʼ sóŋ ńgə́, “Lə́ kɔ pɛn waamə̂ yə́ pə́ nə́ ndɛlə́ akɔŋtə, tə ḿbə́ pɨ pə́ yǐ yɛ́ɛlə.”


Əghâ ándó Yeso a nə ńchî nə́ Bɛtani á ndɛ̂ ŋwu tsə̌ pə́ nə̈ fóŋ nə́ yí ńgə́ Saamun Ngaŋnkaʼ lə́, Məngyě yitsə̌ a yǐəə á mbô yí nə́ məghɔ́d mə́ azɔ́ʼə akwub mimə́ azagə́ yə əshîʼnə á mə́m ntsə́ŋ páʼ pə́ ghɛd nə́ nə́ ngɔʼə alabasəta, ndɛn nkáb məghɔ́d ghɛn kə nə́ənə, Yeso a tíʼ ńnáanə á mə́ jî nə́ məjîə, a kwɛlə̂ mə́ələ́ á atû yə́. Ndzaŋ ngaŋə́zoŋə́ndzəm əjí ə́ kə jɨ́ nə́ lə́, ndě əghɔ́b ə́ záŋ pó sóŋ ńgə́, “Lɛ̌ tə́mə́sɛ́ akə̂ ndɛnə nə́? Mbɔʼ pə́ pěʼ fi məghɔ́d mɨ́d mɨ nə́ aláʼə nkáb ə́fɛ̂ á mbô pəpóŋə.”
Yeso a jîə anu páʼ pó sóŋ nə́ ńtíʼ ə́sóŋ nə́ pó ńgə́, “Pɨ jwaʼə̂ məngyě nə́ lə́ ńgə́ akə̂? A ghɛd lə́ chigə anu yə əshîʼnə á mbô maŋə. Pɨ̌pə pəpóŋ yǒ zá chîə, lə́ pɛn yǒ kě əghâ ətsə̈m chîə pô. A kwɛd məghɔ́d mə́ azagə́ mɨ́d məənə́ á mbɨ maŋ lə́ á mə́ tsoŋkə̂ nə́ mbəəmə mə záʼ ndɛd mə twə́ŋ nə́ mə ə́ pɔŋə́ koʼə̂. Mäŋ fiʼtə̂ áwɨ́ ndə̌ŋdəŋ ńgə́ aliʼə́ atsəm páʼ pə́ láʼ nə́ ńtə́ ńnáŋkə nkɨ yi əshîʼnə ghɛn ə́wɨ́ á mə́m mbî, pə́ yǒ kə́ sóŋə anu páʼ a faʼ nə́ lɛ̌ á mə́ kwúmtə nə́ yə́.”

Táʼə á mə́m ngaŋə́zoŋə́ndzəm Yeso zə̂ ntsɔb pɛ̌ pə́ nə̈ fóŋ nə́ nə́ Juda Iskaliɔt lə́ a tíʼ ńgɛnə̂ á mbô pətə́kɔʼ pə́ ngaŋə́pêsê, ḿbítə ághɔ́b ńgə́, “Mbɔʼ maŋ fɛ̂ Yeso á mbô pɨ nə fɛ̂ akə̂ á mbô maŋə?” Pó sháŋ nkéebə atəənə́ yi ŋwaŋkə̂ nə́ ntáʼ məghə́m mɛ́n teelə́ ə́fɛ̂ á mbô yə́. Ə́fɛ́d ə́lɨ́d Juda a tíʼə ńnáŋ ndú ətsəmə á mə́ fi nə́ yə́ á mbô pó.


A nə ḿbə́ ntsɛɛmbi alě akɔ́lə́péenə məkálə́ tə mbê lə́, ngaŋə́zoŋə́ndzəm Yeso ə́ yǐəə á mbô yi ḿbítə á yí ńgə́, “Gho kwaŋ ńgə́ mbɔʼ pəg ghɛn ńtsoŋkə̂ aliʼ mbɔʼ gho jî məjî mə́ Akɔŋtə Ndzáʼkə ə́wɨ́ lə́ ə́fó?”
Yeso a kwěe ńgə́, “Ghɛn nə́ á mə́mə aláʼə á mbô ŋwu tsə̌ ə́sóŋ nə́ yí ńgə́, Ndzéʼkə a sóŋ ńgə́, ndɛlə́ mə koʼə̂; Pə̌gpə ngaŋə́zoŋə́ndzəmə mə yǐ jî məjî mə́ Akɔŋtə Ndzáʼkə a ndɛ̂ gho.”
Ngaŋə́zoŋə́ndzəm əjí ə́ kə́ ńgɛd tsɔʼə ndzaŋ páʼ Yeso a fiʼtə̂ nə́ ághɔ́b lə̂ ńtíʼ ńtsoŋkə̂ məjî mə́ Akɔŋtə Ndzáʼkə mimə wə́.
A yǐ ḿbə́ ndɛd nkwanə́ Yeso pópə ngaŋə́zoŋə́ndzəm əjí ə́ náanə á mə́ jî nə́ məjîə. Ndzaŋ pó po nə ńtə́ nə́ ńjîə məjî lə́, Yeso a sóŋə á mbô pó ńgə́, “Mäŋ fiʼtə̂ áwɨ́ nə ndə̌ŋdəŋ ńgə́ táʼ ŋwu əwəənə́ a yǐ finə̂ mə.”
Anu yəwə́ á nə ńjwaʼ ngaŋə́zoŋə́ndzəm əjí lɛ tətətə, pó chúʼə á mə́ pítə nə́ táʼ táʼ ńgə́, “Mmaʼmbî, maŋ kwaŋ ńgə́ gho kě lə́ mə sóŋə pô?”
Yeso a kwěe ńgə́, “Ŋwu páʼ apô azə́g yə́ a kwú nə́ á mə́mə akáŋ táʼ ngǎ lə́ yí páʼ a yǐ nə́ ə́finə̂ mə. Mɔ́ Ŋwunə a yǐ ghɛn lə́ tsɔʼə ndzaŋ pə́ ŋwaʼlə̂ nə́ ńté yə́, lə́ ndɔ ə́ pə́ ńchîə á atû ŋwu páʼ a fi nə́ Mɔ́ ŋwunə! Mbɔŋə́ pə́ nə ḿběʼ ńkě yí pî pô.”
Juda ŋwu páʼ a chî nə́ á mə́ yǐ nə́ finə̂ yí lə́ a tíʼ sóŋ ńgə́, “Ndzéʼkə, maŋ kwaŋ ńgə́ lə́ kě maŋ pô?”
Yeso a kwěe ńgə́, “Lə́ gho.”


Ndzaŋ pó nə ńtə́ nə́ ńjîə məjî lə́, Yeso a pyáanə apá əfɛ̂ ndǎ ńtíʼ ḿbagtə̂ ájɨ́d ə́fɛ̂ á mbô ngaŋə́zoŋə́ndzəm əjí ə́sóŋ ńgə́, “Ko nə́ ńkɔ́lə, lɛ̌ na mbəəmə mə.”
A tíʼ ńtwám ndɔ́ŋ ə́fɛ̂ ndǎ ńtíʼ ə́fɛ̂ ázə́ələ́ á mbô pó ə́sóŋ ńgə́, “Ko nə́ ńnô tsɔʼə pɨ pətsəmə.” Lɛ̌ lə́ achǐə mbəəmə mə á wad nə́ əkeenə, páʼ pə́ kwɛd nə́ ńté pɨ pipə nɨ́ nə́ ńjî ńgə́ Əsê á ləgnə̂ pətəpɔŋ póobə́ Mäŋ fiʼtə̂ áwɨ́ ńgə́ maŋ láʼ kě məloʼ mɨ ngǎ yitsə̌ pɨ nô pô tə koʼə̂ alě maŋ láʼ nə́ pɨ nô məloʼ mimə fî pɛnə̂ á mə́mə Anuə Nəfoonə Tǎ mə.
Pó tíʼ ńdzɔb nkǐ ngóʼkə, ə́fɛ́d ńgɛnə̂ Nkwəənə Olifə.


Yeso a tíʼ ə́sóŋ nə́ pó ńgə́, “Tsɔʼə chigə nətúʼ ə́sɛ̂n, pɨ pətsəm yǐ kəəkə̂ myaʼə̂ mə, ńté ńgə́ pə́ ŋwaʼlə̂ ńgə́, Maŋ yǐ jwítə á ntseŋnə, akwɛlə məmbéŋ mə́ ndzɛd mə́ tíʼ ə́shamnə̂. Lə́, əghâ ándó maŋ yǐ nə́ ńjúmnə, maŋ yǐ peg ə́ chî á mbi pɨ ə́ ghɛnə̂ Galiliə.”
Pita a kwěe ńgə́, “Mbɔʼ ŋwu ntsəmə a kəəkə̂ ḿmyaʼə̂ gho, maŋ kě gho myaʼ pô.”
Yeso a kwěe ńgə́, “Mäŋ fiʼtə̂ gho nə́ ndə̌ŋdəŋ ńgə́ aŋkəʼə́ á yǒ jǐ tə́ ə́ tɔ́ŋə á nətúʼ ə́sɛ̂n, gho kǐəə mə ngǎ teelə́.”
Lə́, Pita a pə́ ə́sóŋ ńgə́, “Mbɔʼ a yǐ ńkoʼnə̂ pə́ ńgə́ pɔ kwû, maŋ kě gho kǐ pô.” Apuʼə ngaŋə́zoŋə́ndzəm Yeso a kə́ ə́sóŋ tsɔʼə ə́lə́ələ́.


Yeso pópə ngaŋə́zoŋə́ndzəm əjí ə́ tíʼ ńgɛnə̂ aliʼ yitsə̌ pə̈ fóŋə ńgə́ Gɛtsɛmaniə, a tíʼ ə́sóŋ nə́ pó ńgə́, “Náanə nə́ aliʼə́ nə́ ńtíʼ maŋ jáʼə ndzəm yi ńchaʼtə́sê ə́wə́.” Əghâ ándó Yeso a nə ńtə́ nə́ ńgɛnə̂ lə́, ńdɔgə̂ Pita pópə pɔ́ pə́ Zebedi pi pə́ mbyâŋnə pɛ́n pɛ̌. Asɔbnə pópə ngə́ʼ ə́ kɔ́ʼ ńtə́mə yə́, a tíʼ ə́sóŋə á mbô pó ńgə́, “Asɔbnə páʼ á chî nə́ á ntɨ́ maŋ á chî təmbɔʼ á jwítə mə. Ghɔ́ŋ nə́ aliʼə́ nə́, kɔ pɛn lê.”
A mɛdtə̂ ághɔ́b ńkwádtə ńgɛnə̂ á mbi ńgwǔ ńkə́bkə əshî yə́ á ndəsê ńchaʼtə́sê ə́sóŋ ńgə́, “Tǎ Mə, təmbɔʼ ndú ə́ chî ə́wɨ́ gho kwá ndɔ́ŋ ngə́ʼ zəənə́ á mbô maŋə! Ghɛlə̂ á pə́ ndzaŋ gho kɔŋ nə́ ńkě pə́ ndzaŋ maŋ kɔŋ nə́ pô.”
A tə́ ḿbəənə̂ á mbô ngaŋə́zoŋə́ndzəm əjí ńtíʼ ńjɨ́ pó noŋnə̂ ńtə́ ńdê; a tíʼ ə́sóŋə á mbô Pita ńgə́, “Təmbɔʼ pɨ kě chî pɛn nə́ mɔ́ akəmə ndɛd tə lê? Tə́ nə́ ńnáŋ əliʼ ńtə́ ńchaʼtə́sê ńjî ńgə́ pɨ yǒ ńkě á mə́mə akwaʼlə wǔ pô. Ajwiə á tə́ ńkɔŋə̂, lə́ na mbɨ ə́ pə́ ḿbóolə.”
Yeso a mɛdtə̂ ághɔ́b ḿbɨ ńgɛn ńchaʼtə́sê ńgə́, “Tǎ Mə, təmbɔʼ ndú ə́ chî ə́wɨ́ ə́ chî ńgə́ pə kwá ndɔ́ŋ jɨ tə ńdéʼtə ńgə́ maŋ nô ázɨ́d, gho tíʼə á chî ndzaŋ gho kɔŋ nə́.” Ndzaŋ a nə́ ḿbɨ nə́ lə́, ńkə́ ḿbɨ ńjɨ́ ngaŋə́zoŋə́ndzəm əjí ə́ tə́ ńdê, ńté ńgə́ pəlê á nə ńdwɛ́nkə á əmə́g pó.
A mɛdtə̂ ághɔ́b ḿbɨ ńgɛn ńchaʼtə́sê, á tíʼ ḿbə́ ngǎ teelə́ a pɛ́d nə́ tə ńchaʼtə́sê ńkə́ ə́sóŋ tsɔʼə táʼə anuə. A pɨ ńtíʼ ḿbəənə̂ á mbô ngaŋə́zoŋə́ndzəm əjí ə́sóŋ ńgə́, “Nə́ pɛ́lə ńdê ńkə́ ńjwitə̂? Náŋ nə́! ndɛd páatə, pə́ finə̂ á Mɔ́ Ŋwunə á mbô ngaŋə́ghɛlə təpɔŋə. Lǒo nə́ á əsê pɛn ghɛnə̂, ŋwunə ándó a fi nə́ mə, a ghɛnə́ a yǐ nə́ leenə́.”


Ndzaŋ Yeso a nə ńtə́ nə́ ḿbɛ́lə ńtséebə lə́, Judas táʼ ŋwunə á mə́m ngaŋə́zoŋə́ndzəm əjí zə̂ ntsɔb pɛ̌ a yǐəə. Lə́ nə ḿbə́ pópə mboŋ pɨ pó túg nə́ məŋwíŋ mə́ ntso pópə əpə̌ʼtə, páʼ lə́ nə ńtú nə́ pətə́kɔʼ pə́ ngaŋə́pêsê pópə mətû mə́ aláʼə. Əghâ nə́, ŋwunə a nə́ fi nə́ Yeso lə́, a nə fiʼtə̂ ághɔ́b ndzaŋ a yǐ nə́ nəələ̂ yə́ á mbô pó: Ə́sóŋ nə́ pó ńgə́, “Ŋwu maŋ yǐ nə́ ńchwegə̂ yí, nə́ waamə̂ yə́.”
Judasə a tɔ́g ńgɛnə̂ á mbô Yeso táʼ ngǎ ə́sóŋ ńgə́, “Maŋ chaʼtə̂ gho ḿbə́ Ndzéʼkə,” ńtíʼ ńchwegə̂ yə́.
Yeso a kwěe yí ńgə́, “Əshunə́ mə, faʼə̂ anu gho yǐ nə́ á mə́ faʼ nə́.”
Əghâ yi wɨ́, pɨ pi wɨ́ pə́ kwádtə ńgyǐəə á mbi ńtíʼ ńgwaamə̂ Yeso. Táʼ ŋwunə á mə́m ngaŋə́zoŋə́ndzəm Yeso a sɔŋ ŋwíŋ əjǐ ńdə́g nətôglə nə́ ngaŋəfaʼ Mbêsê yi Ngweŋə́. Yeso a sóŋə á mbô yí ńgə́, “Néŋ ŋwíŋ ntso əzô á ngwâ, ńté ńgə́ ŋwu ntsəm páʼ a sɔŋ nə́ ŋwíŋ ntso, a yǒ kwû lə́ nəwû ŋwíŋ ntsoolə.” Nə́ kwaŋ ńgə́ mbɔʼ maŋ kě Tǎ mə fóŋ a kə́ ńtɨ́ táʼ ngǎ əfɛ̂ əkwɛlə́ pətseŋpə́ndɛ́pə́sê páʼ pó pə́ nə́ ngaŋə́maʼə́ntsoolə á mbô maŋ ntsɔb pɛ̌ ńgə́ pó yǐ ńkwáalə mə? Təmbɔʼ á pə́ ə́lɨ́d, aŋwaʼlə Əsê á yǐ ńtíʼ ḿbə́ ndə̌ŋdəŋ lə́ ə́lɛ́, páʼ á sóŋ nə́ ńgə́ anu yəwə́ á yǐ shib lɔgə̂ aliʼə́?
Nə́ ndɛd zɨ́d zə̂, Yeso a sóŋə á mbô mboŋ pɨ zə̂ ńgə́, “Nə́ chîə á mə́ fɛ́d nə́ lə́ nə́ məŋwíŋ mə́ ntso pópə əpə̌ʼtə á mə́ wam nə́ mə, ándó maŋ pə́ pə́ ndzə̌ təpɔŋ? Əlě ətsəm maŋ náanə á tə́kɔʼndɛ̂sê ńdzéʼkə ə́wɨ́, nə́ pə́ ńkě mə wam pô. Lə́ zəənə́ atsəmə á lɔgə̂ alíʼ lə́ ńjî ńgə́ anu məntúmə́sê mə́ nə ŋ́ŋwaʼlə̂ nə́ á fɛ́d ńkoʼnə̂.”
Ngaŋə́zoŋə́ndzəm əjí ətsəm tíʼ ńkǐəə yí ńkəələ̂ ághóobə́.


Pɨ pó nə ńgwam nə́ Yeso lə́, pó lɔgə̂ yí ńgɛnə̂ á mbi Kaifas, Mbêsê yi Ngweŋə́, aliʼə́ ándó ngaŋə́zéʼkə pənoŋkə pópə mətû mə́ aláʼ mə́ nə́ ńkyeetə̂ nə́ ə́wə́. Lə́, Pita a zoŋə̂ yə́ á ndi yi sɛ tə ńkɔ́ʼ ńkwúnə atətá Mbêsê yi Ngweŋə́, ńkwú ńnáanə pópə ngaŋə́pyáabə tə́kɔʼndɛ̂sê á mə́ jɨ́ nə́ anu á yǐ nə́ laŋə̂. Pətə́kɔʼ pə́ ngaŋə́pêsê pópə ngaŋə́sáʼə́məsáʼ ə́ kə tə́ ńdoonə̂ á mə́ jwítə nə́ Yeso, ńtíʼə ńnáŋə pəənə ándó mbɔʼ pó néŋ ntsəələ atû yə́; lə́ ḿbə́ ńkě ŋwu tsə̌ jɨ́ pô. Pɨ pipə nɨ́ nə́ pə́ nə ḿbǎtə fɛ́d ńtsɨ́d məntsɨd lə́, pɨ pɛ́n pɛ̌ pə́ yǐ ə́fɛ́d ńtɨ́ ə́sóŋ ńgə́, “Ŋwu nə́ a nə sóŋ ńgə́, ‘təmbɔʼ maŋ shaʼtə̂ Tə́kɔʼndɛ̂sê ghɛn mbɨ ḿbóomə ájɨ́d nə́ əlě teelə́.’ ”
Mbêsê yi Ngweŋə́ a lǒo əsê ńtíʼ ə́sóŋə á mbô Yeso ńgə́, “Gho kě yǐ kwěe? Lɛ̌ zə́ənə́ ndzaŋə anu pɨ pɨ pə́ sóŋ nə́ ńté gho?” Lə́ Yeso a pə́ ńkə́ ńnaʼə̂ yí tsɔʼə naʼ nə́. Mbêsê yi Ngweŋə́ a sóŋ nə́ yí ńgə́, “Maŋ sóŋ ńgə́ gho zɔ nə́ əlɛ́n Əsê páʼ a chî nə́ mbî lə́ ńgə́: gho lə́ yi páʼ Əsê a Tsəʼ nə́, páʼ a pə́ nə́ Mɔ́ Əsê.”
Yeso a kwěe ńgə́, “Gho sóŋ nə́. Lə́ maŋ pə́ ə́sóŋə áwɨ́ ńgə́: ə́fɛ́d nə́ pə əghâ nə́, nə́ yǐ zə́ənə Mɔ́ Ŋwunə, a náanə nəpɛnə́ Əsê páʼ a túg nə́ mətəənə á əlá apô yí yə təənə, ńtíʼə ńgyǐəə á mə́mə alə́mə á nəpóolə!”
Əghâ ándó Mbêsê yi Ngweŋə́ a nə ńdzóʼ nə́ anu jɨ lə́, ə́sɛɛtə̂ ətsəʼ əpí ə́sóŋ ńgə́, “A zɔ Əsê! pɛn kě pɨ ńtə́ ńnáŋə ńgə́ pɨ pətsə́ pə yǐ ńtɨ́ ə́sóŋə anu yətsə́ pô! Nə́ pyádnə ńdzóʼ ndzaŋ páʼ a zɔ nə́ Əsê. Nə́ kwaŋ ńgə́ akə̂?”
Pó kwěe yi ńgə́, “A koʼə̂ á mə́ kwû nə́.”
Pó tíʼ ńtwǐ mətwê á əshî yi, ə́shúmə yí, pətsə́ pə ləbə̂ yə́, ə́sóŋ ńgə́, “Yi páʼ Əsê a Tsəʼ nə́, mbɔʼ gho jî ńgə́ gho lə́ yi páʼ Əsê a Tsəʼ nə́, gho sóŋə ŋwu páʼ a shúm nə́ gho.”


Əghâ yi wɨ́ Pita a náanə apeŋə́, á atətá, ngaŋəfaʼ Kaifas yi məngyě a yǐəə á mbô yi ə́sóŋ ńgə́, “Gho pěʼ ńkə́ ńchîə azô pɨ Yeso Mɔ́ Galili wə̂.”
Lə́ a pə́ ńkǐəə yə́ á mbi pó pətsəm ə́sóŋ ńgə́, “Maŋ kě mə anu páʼ gho sóŋ nə́ lə́ jî pô.” Pita a tíʼ mbɨ ə́fɛ́d ńgɛnə̂ ntsoolə́poʼ, yitsə̌ mɔ̂ məngyě a zə́ənə yí ńtíʼ ə́sóŋ nə́ pɨ pə́ nə ńtɨ́ nə́ aliʼ yi wɨ́ ńgə́, “Ŋwu nə́ a nə ńchî pó Yeso Mɔ́ Nazalɛlə.”
A kə mbɨ ńkǐəə yí tə ńdzɔ ńgə́, “Maŋ kě mə ŋwu yi wɨ́ jî pô!”
Tsɔʼə ngǎ pɛ̌, pɨ pə́ tɨ́mtə nə́ aliʼ yi wɨ́ pó yǐəə á mbô Pita ə́sóŋ ńgə́, “Gho shib ḿbə́ lə́ táʼ ŋwu yi wɨ́ yitsə̌ ńté ńgə́ atséebə azô á finə̂ gho!”
A tíʼ ńchúʼə á mə́ fóŋ nə́ məndoonə á mbɨ yə́ á ngǎ yí ńdzoomə̂ á mbô pó ńgə́, “Maŋ kě ŋwu yi wɨ́ jî pô!”
Tsɔʼə əghâ yi wɨ́ aŋkəʼə́ á tɔ́ŋə, Pita a tíʼ ńkwúmtə atsáb páʼ Yeso a nə ńtsáb nə́ ńgə́, “Aŋkəʼə́ á yǒ jǐ tə́ tɔ́ŋə lə́ gho kǐəə mə ngǎ teelə́.” A tíʼ ə́fɛ́d ńgɛnə̂ apeŋ, ńkyéŋ tə mɨ́ʼə.

Koute Matyo 26