Matthew 1
1
Sa Listaan Da Danaḵḵoḻ Jesu Kristu
(Luk. 3:23-38)
1Annaya listaan da danaḵḵoḻ Jesu Kristu we siya pinilin Apudyus aḵ Anagu ḵan An-ari. Siya ganaḵ Ari David ya ganaḵ os Abraham. 2Aḵ Abraham aman Isaac. Aḵ Isaac aman Jacob. Aḵ Jacob aman Judah ya da sunudna. 3Aḵ Judah aman da Perez ḵan Zerah ya aḵ Tamar inada. Aḵ Perez aman Hezron. Aḵ Hezron aman Ram. 4Aḵ Ram aman Amminadab. Aḵ Amminadab aman Nahshon. Aḵ Nahshon aman Salmon. 5Aḵ Salmon aman Boaz ḵad aḵ Rahab inana. Aḵ Boaz aman Obed ḵad aḵ Ruth inana. Ḵad aḵ Obed aman Jesse. 6Aḵ Jesse aman Ari David.
Aḵ Ari David aman Solomon we inana asawan Uriah. 7Aḵ Solomon aman Rehoboam. Aḵ Rehoboam aman Abijah. Aḵ Abijah aman Asaph. 8Aḵ Asaph aman Jehoshaphat. Aḵ Jehoshaphat aman Joram. Aḵ Joram aman Uzziah. 9Aḵ Uzziah aman Jotham. Aḵ Jotham aman Ahaz. Aḵ Ahaz aman Hezekiah. 10Aḵ Hezekiah aman Manasseh. Aḵ Manasseh aman Amos. Aḵ Amos aman Josiah. 11Aḵ Josiah aman Jechoniah ya da susunudna'tte timpu we nangipatutanda nangitallayan atta iyIsrael ad Babylon.
12Sa nagangpute nitallayanda'd Babylon, niyanaḵ aḵ Shealtiel we abeng Jechoniah. Aḵ Shealtiel aman Zerubbabel. 13Aḵ Zerubbabel aman Abiud. Aḵ Abiud aman Eliakim. Aḵ Eliakim aman Azor. 14Aḵ Azor aman Zadok. Aḵ Zadok aman Achim. Aḵ Achim aman Eliud. 15Aḵ Eliud aman Eleazar. Aḵ Eleazar aman Matthan. Aḵ Matthan aman Jacob. 16Aḵ Jacob aman Joseph. Ḵad aḵ Joseph asawan Mary ye nangiyanaḵ ḵan Jesus we awaganda'ḵ Kristu.
17Pun nasawaḻan aḵ opate lunap misaḻad ḵan Abraham inggana ḵan Ari David. Nasawaḻan os aḵ opate lunap misaḻad ḵan Ari David inggana si nitallayan da iyIsrael ad Babylon. Ḵad nasawaḻan os aḵ opate lunap si nitallayanda'd Babylon inggana'tte niyanaḵan Kristu.
Sa Niyanaḵan Jesu Kristu
(Luk. 2:1-7)
18Annaya ug-uggud ni niyanaḵan Jesu Kristu. Sa inanae aḵ Mary, nantuḻagdae an-asawada ḵan Joseph. Yaḵon sa daanda an-asaw-an, nabugi'ḵ Mary mipagapu si ḵabooḻan ni Ispiritu Santu. 19Aḵ Joseph we ḵatuḻagna, naun-unan ya adinapun os pione mibabbain aḵ Mary. Pun simsimmoḵnae isinanae adipun maigammu. 20Sinomsomoḵna ḵad mipanggob si sana, baag-en nampaila ḵan siya anghel Apudyus si in-inop woḵ ḵanana, “Siḵa Joseph we ganaḵ Ari David, adiḵa maḵimute angiḵamboḻoy ḵan Mary te sa bugina mipagapu si ḵabooḻan ni Ispiritu Santu. 21Umanaḵ aḵ laḻaḵi ḵad ngadanam aḵ Jesus te taguwona da taguna ta adida madusa'tta basuḻda.”#1:21 Sa ngadan Jesus, sa piona ugudon Apu we Anagu.
22Naḵwa losan da sana ta mituttuwa inugud Apu we Apudyus si awe atte profetanae an-uuggudonae ḵanana, 23“Baag-en, mabugi babaḻasange ippun natnattoḵana. Umanaḵ aḵ laḻaḵi ḵad mangadanan aḵ Emmanuel.”#1:23 Isaiah 7:14. Sa piona ugudon, “Anna ḵan ditaḵu'ḵ Apudyus.”
24Bummangon ḵad aḵ Joseph, tinuttuwana imbilin ni anghel ḵan siya woḵ inḵamboḻoyna'ḵ Mary. 25Yaḵon adinapun tintindoḵ si daannapun angiyanaḵan si abengna. Ummanaḵ ḵad, nginadanana'ḵ Jesus.
वर्तमान में चयनित:
Matthew 1: kml
हाइलाइट
शेयर
कॉपी
Want to have your highlights saved across all your devices? Sign up or sign in
© 2019 Translators Association of the Philippines (TAP), All rights reserved.