Kananet 3
3
Li̱be̱ne̱t ci e̱e̱t ci diiri
1Bali eenycane Manyi Ta̱mu̱ta̱dde̱n elegje do̱o̱k ke̱, egenyi da̱ uwat#3:1 Uwat: Sitan ci een alaan ci vongizzok cik kuulou ozoz ngati uwato. Een bali enne do̱yo̱i̱t anjilo ta̱mu̱-kenga kar enne ki anjilonya u̱gge̱ utuburet Ta̱mu̱ta̱dde̱n. IkebO̱no̱zzo̱k 12:7-9. oroot kar kize labjoit. I̱ki̱ya̱ uwat i̱jji̱n ngaa a̱nne̱k ne, “Ma dim da̱ Ta̱mu̱ta̱dde̱n a̱nne̱kku̱ng ne, ‘Ma adakku o̱ya̱u̱ ne̱k keen wak aavtte manatoto ko̱ do̱o̱k’?”
2O̱bo̱de̱k ngaa uwat a̱nne̱k ne, “Kadak wo̱ye̱ naga o̱ya̱u̱ cik keen ne̱k aavtte manatoto ko̱ do̱o̱k labak, 3ma̱i̱je̱ Ta̱mu̱ta̱dde̱n ize ne, ‘Ma adakku o̱ya̱u̱ cik keet ci aave ma̱na̱ orgena ko̱, kar bo̱do̱k ma u̱u̱mnyu̱ la̱du̱n, icima ovvo atin a̱da̱knnu̱.’”
4Iizek zin uwat ngaa ne, “A̱zze̱to̱, iróng een niko, iróng atin a̱da̱knnu̱. 5A̱gga̱ Ta̱mu̱ta̱dde̱n niko i̱i̱ ci adakku o̱ya̱u̱ cik keet neci, ovvo atin egenyyu kar zin a̱gga̱c kaal cik gerzek ki cik abunna ki i̱yo̱ko̱ Ta̱mu̱ta̱dde̱n.”
6Baling icin ngaa o̱ya̱u̱ cik keet neci ming agano ki da̱i̱ne̱t, kar bo̱do̱k kaanyik ol genyiz, uduca u̱gge̱ adaha, idima u̱gge̱ uk aanyik e̱e̱t cinne, adak zin enne bu̱k. 7Baling adait nege o̱ya̱u̱ cik keet neci, o̱o̱ye̱ nogo ebere niko, kar ka̱gga̱c e̱le̱tti̱ cigge̱k ming aavtte nga̱dhi̱ri̱r, kar zin kuducca varany cik bolbolentak ki̱bi̱lṯte̱ e̱le̱tti̱.
8Bali yo̱mo̱na̱ iziyyet ngaa ki mac Manyi Ta̱mu̱ta̱dde̱n ming owo ma̱na̱ orgena ngati alalne looci, u̱lu̱gu̱nyye̱t zin nege e̱le̱tti̱ keene ecito. 9Utu zin Manyi Ta̱mu̱ta̱dde̱n Adam a̱nne̱k ne, Adam aave nga?
10O̱bo̱de̱k zin Adami Ta̱mu̱ta̱dde̱n, a̱nne̱k ne, “Kiziya anna zo̱o̱ cigunnek wanai ming owo manatoto ke̱, ku̱lu̱gu̱nye̱ ko̱ngo̱o̱le̱ eci kaave nga̱dhi̱ri̱r.”
11I̱jji̱n zin Ta̱mu̱ta̱dde̱n Adam, a̱nne̱k ne, “Ngene ci a̱du̱wa̱ki̱ azi ne aave i̱nna̱ nga̱dhi̱ri̱r? Adau i̱nna̱ o̱ya̱u̱ cik keet bali ka̱nne̱ki̱ anna ne ma adai ke̱?”
12A̱nne̱k zin Adami Ta̱mu̱ta̱dde̱n ne, “Ngaa bali anyahaka ke̱ ci aduca o̱ya̱u̱ cik keet neci kar kanyaha u̱gge̱ kar anna kadau.”
13Iizek zin Manyi Ta̱mu̱ta̱dde̱n ngaa ne, “Nya ming ogoni niko ko̱?”
O̱bo̱de̱k zin bo̱do̱k ngaa Ta̱mu̱ta̱dde̱n a̱nne̱k ne, “Uwat ci alabekan kar kadak o̱ya̱u̱ cik keet neci.” 14Otor zin Manyi Ta̱mu̱ta̱dde̱n uwat a̱nne̱k ne, “Eci u̱tu̱gu̱ gi̱i̱ ci gerze,
“Kotoryi orgene ci elegje wak abal ol
ki cik zarak do̱o̱k,
tu̱vu̱v kenga
kar bo̱do̱k atukani atin todowa
baize cunne udut.
15I̱yo̱ko̱ zin karike atin anna marnonet
i̱nne̱t ki ngaa
zee ku̱ru̱m ci alawano,
a̱ru̱ki̱ atin do̱le̱c ci ngaawo oo cunne
kar i̱nna̱ tenged nonno gi̱nygi̱nye̱ni̱t.”
16Iizek zin Ta̱mu̱ta̱dde̱n ngaa ne,
“Kaanyi pira ngati anyaine,
a̱rri̱ta̱ atin do̱le̱c piryanzeta.
Orong atin zinin cunne mac cunne udut,
kar bo̱do̱k e̱e̱ti̱ ci maci kabalin udut.”
17Iizek zin Ta̱mu̱ta̱dde̱n Adam ne, “Eci i̱nna̱ elemu zoz ci ngaa cunne, adau zin o̱ya̱u̱ cik keet bali ka̱nne̱ki̱ ne, ‘Ma adai ke̱,’
“Kotori zin todowa zo̱ze̱ cunne;
amuda atigon i̱nna̱ da̱i̱ne̱t cigunnek piryanzeta ngati eeve lo̱o̱c
baize cunne do̱o̱k.
18Alina atin da̱i̱ne̱t cigunnek ki biila nga̱to̱de̱,
kar dak atin kaal cik alina ma̱ne̱ cunne.
19Kar muluwe ci a̱li̱ngli̱nge̱ i̱nna̱
adai atin i̱nna̱ da̱i̱ne̱t cigunnek,
zee rok nginti a̱mi̱ro̱ni̱k i̱nna̱ todowa,
eci anna Ta̱mu̱ta̱dde̱n keenycanni ba̱li̱ye̱ todowaca;
eci i̱nna̱ e̱e̱ni̱ todowac
kar i̱nna̱ mi̱ro̱zi̱k todowa.”
20Akatek zin Adami ngaa cinne kize Eva#3:20 Eva: Utuge ci I̱bu̱ru̱, azi keng cinne ne, ruget. eci atin enne okko een e̱e̱ti̱ ollu lo̱o̱ta̱ ngatu do̱o̱k.
21Idimanek zin Manyi Ta̱mu̱ta̱dde̱n Adam ki ngaa cinne kaal cik a̱bu̱nge̱ nege e̱le̱tti̱ ceremwane cik e̱le̱gje̱nnu̱. 22Ize zin Manyi Ta̱mu̱ta̱dde̱n ne, “U̱tu̱gu̱ e̱e̱ti̱ ci diiri ki i̱yo̱ko̱ naga ko̱, a̱gga̱ zoz ci abunna ki ci gerze. Iróng la̱du̱n kelemi nonno ki̱tto̱na̱ a̱zzi̱t cinne kidima bo̱do̱k gi̱i̱ imma keete ci baizo kar kadak, kar atin enne kabak udut.” 23Ottok zin Manyi Ta̱mu̱ta̱dde̱n Adam ki Eva ma̱ne̱ ci aave nyaate ci een Eden kar kuk ki̱li̱ngli̱ng todowai balik eenycane Ta̱mu̱ta̱dde̱n nonno ke̱. 24Baling ottok Ta̱mu̱ta̱dde̱n Adam ki ngaa, idima zin anjilo#3:24 Anjilonya: E̱e̱ggi̱n nege vongizzok cik aavtte ki Ta̱mu̱ta̱dde̱n ta̱mu̱-kenga kar bo̱do̱k iróng nege anyak e̱le̱tti̱ cik okkomi. I̱tto̱n gon Ta̱mu̱ta̱dde̱n nogo i̱i̱te̱n imma koot lo̱o̱ta̱ kanyaktak ol zoz cinne. cinne ci anyak nya̱tu̱ba̱t ci ataltali kebehe ma̱na̱ neci o̱to̱ne̱ ci je̱e̱no̱, kar kebek keet ci rugeto.
वर्तमान में चयनित:
Kananet 3: tex
हाइलाइट
शेयर
कॉपी
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.