 Nuestros sitios Web:   https://awarnarebbi.net/es/   https://www.abridnarrif.net/es/  AwalnArebbi@gmail.com

Ṯamaziɣṯ n Arrif

إِيوَا رزُّوْغ اَذ تصْبَرم شْوَايْت اَك ثُوْبُّوْهْڒِيَا-يَا ينُو زَعْمَا. وَاه، صبَّرث اَكِذِي لِأَنَّا غَارِي يجّن ن لْغِرَا خَاوم، يعْنِي يجّن ن لْغِرَا زِي أَربِّـي. أَقَا خطْبغ-كنِّيو زَعْمَا إِ يِجّن ن ورْيَاز يعْنِي ذ لْمَسِيح اَكنِّيو اَوِيغ غَارس اَم يِجّن ن ثعْزْرِيْث وَار ذَايس بُو ڒْعِيب. وَلَكِن نش ݣّْوْذغ مَامّش ذَاس يوْقع إِ حَوَّا يشْمث-يت وفِيغَر س ثحْرَايْمِيث نّس ؤُڒَا ذ كنِّيو ڒَعْقُوْڒَاث نْوم اَذ فّْغن اَبْرِيذ، وَار ذَاس تْطِيعِيم شَا إِ لْمَسِيح س وُوْڒَاون نْوم بْڒَا نِّفَاق أُو بْڒَا ڒْعِيب. لِأَنَّا كنِّيو ثقَّارم مَعْلِيش وَاخَّا يُوْسَا-د غَارْوم يجّن يتْبشَّارن س يِجّن ن عِيْسَى نّغْنِي مْزُوَّر مَاشِي ذ ونِّي إِي خف نتْبشَّار نشِّين زِي قْبڒ. نِغ ذغْيَا ثْقبّْڒم يجّن ن اَرُّوْح نّغْنِي مْزُوَّر مَاشِي ذ ونِّي إِي تُوْغَا ثْقبْڒم زِي قْبڒ. نِغ ذغْيَا ثْقبّْڒم يجّن ن لْإِنْجِيل نّغْنِي مْزُوَّر مَاشِي ذ ونِّي إِي تُوْغَا ثْقبْڒم زِي قْبڒ. شُوْف، وَار حسّْبغ شَا يخف ينُو ذ اَنقْصِي زِي اَرُّسُل يمزْوُوْرَا. لَّا وَالُو. أُو نش وَاخَّا وَار سِّينغ شَا لْخُطْبَا ينُو مْلِيح، وَار ذَايِي ثنْقِيص شَا ثُوْسْنَا. نشِّين ثُوْسْنَا-يَا نسْبيّن-اَوم-ت-يد نِيشَان س مَارَّا ثِمسْڒَايِين.
مَا ذ ڒْعِيب مڒَا بشَّرغ-كنِّيو س لْإِنْجِيل ن أَربِّـي بْڒَا مَا ذَايِي ثْخدْجْسم، يعْنِي سمْزَايغ يخف ينُو بَاش اَكنِّيو سْݣَعّْذغ؟ نش جمْعغ تْمنْيَاث زِي ثْجُوْمَع نّغْنِي ن ڒْمُوْمِنِين قبْڒغ زَّايْسن مَانَاينِّي بَاش اَكِذْوم خذْمغ. وَامِي حْضَارغ اَكِذْوم تُوْغَا نش تحْذَاجِيغ، وَار تْبسَّاڒغ خ حَدّ زَّايْوم؛ لَّا، ؤُشِين-اَيِي مِين تحْذَاجِيغ اَيثْمَاثْنغ ينِّي إِي د يُوْسِين زِي مَاسِدُوْنْيَا. أَمنِّي ؤُݣِيغ اَخَاوم بسّْڒغ، أَذ قِّيمغ مسْتَمّر اَمنِّي. س ڒْحَقّ ن لْمَسِيح إِي ذَايِي، ؤُڒَا ذ يجّن ذݣ يمُوْشَان ن ؤُخَايَا مَا ٱذ يكّس لْإِفْتِخَار-أَ ينُو. مَايمِّي؟ مَا وَار كنِّيو تخْسغ شَا؟ قَا أَربِّـي يسّن بلِّي ثْعِيزّم خَافِي.
فَا مِين تݣّغ اَذ قِّيمغ اَمُّو تݣّغ-ث. مَايمِّي؟ خْسغ اَذ قسّغ يضَارن إِ يِنِّي يرزُّوْن لْفُرْصَا اَذ يڒِين مْقُوْدَّان اَكِذْنغ ذِي ثْمسْڒَايِين-أَ إِي خف تفْتَخَرن. شُوْف، يرْيَازن اَم يِيْنَا تَارَّان يخف نْسن ذ اَرُّسُل خدّْمن ذ يغدَّارن، سْنعْمِيڒن ذ اَرُّسُل ن لْمَسِيح. إِيوَا وَار نسْتغْڒِيب شَا لِأَنَّا شِّيطَان نتَّا س يِيخف نّس يسْنعْمِيڒ ذ يجّن ن لْمَلَائِكَا ن نُّوْر. فَلِهَاذَا، وَار نسْتغْڒِيب شَا مڒَا يخدَّامن ن شِّيطَان سْنعْمِيڒن ذ يخدَّامن ن ڒْحَقّ. ڒفْنَا نْسن اَذ يِيڒِي عْلَاحْسَاب مِين سْتَاحْقنْت ڒفْعَايڒ نْسن.

أَذ ينِيغ عَاوذ، وَار ذَايِي حسّْبث شَا ذ اَبُوْهَاڒِي. وَاخَّا ثْحسْبم-اَيِي ذ اَبُوْهَاڒِي، قبّْڒم-اَيِي بَاش اَذ فْتَخَرغ شْوَايْت. مَانَايَا إِي زِي تفْتَخَرغ قَّارغ-ث نش اَم يِجّن ن ثُوْبُّوْهْڒِيَا، وَار ث يقَّار شَا سِيذِيثْنغ. خْمِي تفْتَخَرن يِوْذَان-أَ اَطَّاس عْلَاحْسَاب مِين يتݣّ بْنَاذم، ؤُڒَا ذ نش اَذ فْتَخَرغ. مَا كنِّيو زَعْمَا ثْفهْمم مْلِيح؟ إِيوَا مَايمِّي س ڒفْرَاحث ثْصبَّرم يبُوْهَاڒِيْين؟ أَقَا ثْصبَّرم ؤُڒَا ذ يِنِّي إِي كنِّيو يتَارَّان ذ يسمْغَان، ذ يِنِّي إِي كنِّيو يتتّن، ذ يِنِّي إِي خَاوم يتْبُوْصَرن، ذ يِنِّي إِي ذِي يدْجَا تَّكبُّر، ذ يِنِّي إِي كنِّيو يشَّاثن س يسقِّيڒن. نش تْسذْحِيغ زَعْمَا، نشِّين نضْعف وَار نْزمَّر أَ نخْذم اَمنِّي!
قَّارغ نش زَعْمَا س ثُوْبُّوْهْڒِيَا-يَا قَا مڒْمِي مَا يزْعَم حَدّ اَزَّايس يفْتَخَر ؤُڒَا ذ نش اَزَّايس فْتَخَرغ. مڒَا نِثْنِي ذ يعِيبْرَانِيْين، ؤُڒَا ذ نش ذ اَعِيبْرَانِي. مڒَا نِثْنِي زِي أَيث-إِسْرَائِيل، ؤُڒَا ذ نش ذ اَئِسْرَائِيلِي. مڒَا نِثْنِي ؤُسِين-د زِي ثَارْوَا ن بْرَاهِيم، ؤُڒَا ذ نش ؤُسِيغ-د زِي ثَارْوَا ن بْرَاهِيم. مڒَا نِثْنِي ذ يخدَّامن ن لْمَسِيح، ؤُڒَا ذ نش حْسن عَاذ ذ اَخدَّام ن لْمَسِيح (سَّاوَاڒغ زَعْمَا س ثُوْبُّوْهْڒِيَا-يَا). نش شَّاثغ تَمَارَا كْتَار زَّايْسن، حبّْسن-اَيِي كْتَار زَّايْسن، ؤُوْثِين-اَيِي س وسْغُوْن كْتَار زَّايْسن. نش مشْحَاڒ ن ثْوَاڒَاثِين تْوَاجَاهغ ڒْموْث. خمْسَا ن ثْوَاڒَاثِين شَّاثن-اَيِي يسْرَائِيلِيْين س اَربعِين ن ثْيِيْثَا قلّ يشْتن س وسْغُوْن. ثْڒَاثَا ن ثْوَاڒَاثِين تْمَارَّاثن-اَيِي س وعْمُوْذ. ئِجّن ن ثْوَاڒَا رجْمن-اَيِي س وزْرُو. ثْڒَاثَا ن ثْوَاڒَاثِين يغْرق زَّايِي وغَرَّابُو سعْذُوْغ يجّن وَاسّ ن ذ يِجّن ن دْجِيڒث ذِي ڒبْحَر. نش مشْحَاڒ ن ثْوَاڒَاثِين تِيڒِيغ تْسَفَرغ ذِي لْخَطَر ن يغزْرَان، ذ لْخَطَر ن يشفَّارن، ذ لْخَطَر ن ڒْقُم ينُو، ذ لْخَطَر ن ييُوْنَانِيْين، ذ لْخَطَر ذِي ثنْدِينْت، ذ لْخَطَر ذِي ڒخْڒَا، ذ لْخَطَر ذِي ڒبْحَر، ذ لْخَطَر ن يِنِّي يتَارَّان يخف نْسن ذ اَيثْمَا. خدّْمغ، شَّاثغ تَمَارَا، تْنُوْسغ اَطَّاس ن دْجِيَاڒِي بْڒَا يضص. فُوْذغ دْجُوْزغ، قِّيمغ اَطَّاس ن ثْوَاڒَاثِين بْڒَا لْمَكْلَا. ثْنقّ-اَيِي ثسْمض اَرُّوْض ينُو ذ ؤُقْلِيل. إِيوَا قَاع ثِمسْڒَايِين-أَ أُو عَاذ ذَايِي اَمْنُوْس كُڒ نْهَار عْلَاحْسَاب مَارَّا ثِجُوْمَع ن ڒْمُوْمِنِين. مڒَا شَان يِجّن يضْعف، نش مَا وَار تضْعِيفغ شَا؟ مڒَا شَان يِجّن يتْوَاسُوْفغ زݣ وبْرِيذ، نش مَا وَار ذَايِي يتقّس شَا وُوْڒ ينُو؟
مڒَا نش أُو لَابُد اَذ فْتَخَرغ، أَذ فْتَخَرغ س مِين ذَايِي د يسْبيَّانن ضعْفغ. ونِّي يتْوَابَرْكن إِ ڒبْدَا يعْنِي أَربِّـي بَابَاس ن سِيذِيثْنغ عِيْسَى، ئِسّن إِلَّا نش قَّارغ لْحَقِيقَا. ذِي ثنْدِينْت ن دِمَشق قَا لْوَالِي ن وزدْجِيذ حَارِث يݣَّا ڒْعَسّث ذِي ثنْدِينْت حمَا اَذَايِي يطّف. وَلَكِن سهْوَان-اَيِي-د يمحْضَارن ينُو ذݣ يِجّن ن وقْبُوْب س يسغْوَان زݣ يِجّن ن ثْبُوْرْجَات ن صُّوْر ن ثنْدِينْت ڒخْدّنِّي نجْمغ زݣ يفَاسّن نّس.

सुनें - 22 أيث-كورينث 11