<div class="version vid1388 iso6393yka" data-vid="1388" data-iso6393="yka">
 <div class="book bkGEN">
 <div class="chapter ch38" data-usfm="GEN.38">
 <div class="label">38</div><div class="s">Si Yahud duk si Tamar</div><div class="p"> 1Masa miya&#42892;an, tahala&#42892; si Yahud amban me&#42892; sakanen, duk p&#299; iye patenna&#42892; si lella amban Adullam, in&#275;nan si Hira. 2Pag la&#42892;i si Yahud magkesuwa&#42892; iye duk dende, anak lella amban Kana&#42892;an in&#275;nan si Shua. Maganda iye si dendehin duk magulid siye. 3Betteng dendehin. Pag nganak iye lella, &#275;nanne si Er. 4Ngiram ne isab iye balik, pag nganak iye lella, &#275;nanne si Onan. 5Pag la&#42892;i iye si Kesib, nganak ne isab iye lella, bu &#275;nanne si Shela. 6Pina&#42892;andahan we&#42892; si Yahud si Er anakne sakahin si dende in&#275;nan si Tamar. 7Saguwa&#42892; si Er, ga&#42892;i kasulutan Tuhanin si hinangannen. Hangkan hep pinapatey iye we&#42892; Tuhanin. 8Ubus pa&#42892;in si Yahud pu si Onan, &#8220;Hinangun anda bakas anda pungtina&#42892;inu ley. Tuhutun pangaddatanten bi supaya niya&#42892; puli&#42892; pungtina&#42892;inun.&#8221; 9Saguwa&#42892; kata&#42892;uhan si Onan we&#42892; nakanakin gey kajari paganakne. Hangkan hep kahaba&#42892; iye pa&#42892;ulid si anda pungtina&#42892;inen pabu&#42892;usne manni&#42892;nen si luwasan supaya dendehin gey betteng we&#42892; ne. Manjari gana&#42892; tubu&#42892; sakane mamateyin. 10Gey te&#42892;ed kasulutan Tuhanin si hinangan si Onan miya&#42892;an. Hangkan pinapatey du isab iye we&#42892; Tuhanin. 11Ubus pa&#42892;in si Yahud si eyu&#42892;annen, si Tamar, &#8220;P&#299; ne kew dahu&#42892; si luma&#42892; samanun. Da&#42892;a kew magella. Agadun ne si Shela anakkun samanta&#42892;an gey pe iye hadje.&#8221; Bu tapikilne kaw isab si Shela matey kuwe&#42892; me&#42892; pungtina&#42892;inen. Ubus p&#299; ne si Tamar si luma&#42892; samanen, patenna&#42892; la&#42892;i.</div><div class="p"> 12Pag tiggel-tiggel ne, matey ne anda si Yahudin iye anak si Shuahin. Pag kewuli&#42892;an ne dukkanen, p&#299; iye duk bagaynen si Hira a&#42892;a amban Adullamin hap Timna, p&#299; si a&#42892;a mangultihan bili-bilinen. 13Pag kale si Tamar we&#42892; hap Timna meto&#42892;anen magpakulti bili-biline, 14iluwasan we&#42892; ne badju&#42892;ne pagbalunen, bu magmastura iye, duk iye gey takilale. Ubus ningkolo&#42892; iye si behe tarangka Enayim si l&#257;n tudju Timna. Pegge&#42892; kata&#42892;uhanne we&#42892; subul ne si Shela bu ga&#42892; ta&#42892;ellane. 15Pag takite si Yahud iye, kannalne we&#42892; burikat iye pegge&#42892; kinumbusan luwenen. 16Ga&#42892; iye takilale we&#42892; si Yahud we&#42892; bakas eyu&#42892;annen. P&#299; si Yahud si iye la&#42892;i si higad l&#257;n. Pa&#42892;inne, &#8220;Dayi&#42892; kew, magulid kite.&#8221; Ubus pa&#42892;in dendehin, &#8220;Ine pangurungnu akuhin bang kite magulid?&#8221; 17Pa&#42892;in si Yahud, &#8220;Pabo&#42892;ohante sa&#42892; kew anak kambing amban me&#42892; panenkun.&#8221; &#8220;Urunganun ku dahu&#42892; ine-ine hinangnu sanda&#42892; samanta&#42892;an gey tekka pinabo&#42892;ohannun,&#8221; pa&#42892;in eyu&#42892;annen. 18-19Pa&#42892;in si Yahud, &#8220;Ine sanda&#42892; kabaya&#42892;annu inambananku ka&#42892;uhin?&#8221; Pa&#42892;in dendehin, &#8220;Pagtataknun sampay bowetnen duk tungkud inantanannun.&#8221; Ubus pinangurung ne we&#42892; si Yahud duk magulid ne siye. Pag tahala&#42892; ne dendehin, iluwasan badju&#42892;ne masturahin duk asekne balik badju&#42892; pagbalunen. Ga&#42892; du tiggel kata&#42892;uhanne ne we&#42892; betteng iye.</div><div class="p"> 20Ubus dina&#42892;ak we&#42892; si Yahud bagaynen si Hira, a&#42892;a amban Adullamin p&#299; n&#363;ranan kambingin si dendehin, duk dina&#42892;ak we&#42892; ne ineddo&#42892; me&#42892; panyap bakas inambanannen hinang sanda&#42892;in. Saguwa&#42892; ga&#42892; ne dendehin takasuwa&#42892;ne. 21Tinilew we&#42892; ne me&#42892; lella mala&#42892;ihin, pa&#42892;inne, &#8220;Intag ne burikat matu&#42892;u si higad l&#257;n inin?&#8221; &#8220;Ga&#42892; niya&#42892; bakas burikat tu&#42892;u,&#8221; pa&#42892;inde. 22Ubus balik ne iye p&#299; pu si Yahud duk pa&#42892;inne, &#8220;Ga&#42892; ne iye la&#42892;i. Duk pa&#42892;in me&#42892; lella mala&#42892;ihin pe, we&#42892; gana&#42892; bakas burikat la&#42892;i.&#8221; 23Pa&#42892;in si Yahud, &#8220;Bakas ne iye pabo&#42892;ohanku anak kambing saguwa&#42892; ga&#42892; ne iye la&#42892;i. Ambat ne si iye me&#42892; panyapley duk kite gey pasayehan me&#42892; a&#42892;ahin.&#8221;</div><div class="p"> 24Pag hatu me&#42892; tellum bulan palabey, niya&#42892; ngakahan si Yahud we&#42892; eyu&#42892;annen si Tamar tatuksa&#42892; we&#42892; burikat iye. Bu betteng iye. Pa&#42892;in si Yahud, &#8220;Paluwasun bi iye, eggasun bi duk iye matey.&#8221; 25Pag bino&#42892;o ne iye paluwas, masan iye p&#299; si meto&#42892;anen pu si Yahud, pa&#42892;inne, &#8220;Iye mekebetteng akuhin dapu&#42892; panyap inin. Payamanun bi bang sine dapu&#42892; tatak inin duk ingketne duk tungkud inin.&#8221; 26Takilale we&#42892; si Yahud me&#42892; panyapin. Pa&#42892;inne, &#8220;Pes&#333;ng pe dupangkun amban iye. Pegge&#42892; ga&#42892; iye pa&#42892;ellahanku si anakkun si Shela.&#8221; Ubus ga&#42892; ne iye bakas pa&#42892;ulid balik.</div><div class="p"> 27Pag ta&#42892;abut ne iye s&#333;ng nganak, kambal anakne dem bettengin. 28Pag nganak ne iye, dembuwa&#42892;in paluwasne tangannen. Hangkan ngeddo&#42892; hilu peyat pandeyin bu iningketan we&#42892; ne diyata&#42892; lengngenne duk pa&#42892;inne, &#8220;Iye inin mapaguwa&#42892; dehelluhin.&#8221; 29Pag inonot we&#42892; ne balik tangannen, iye mapaguwa&#42892; dehelluhin dembuwa&#42892;in. Ubus pa&#42892;in pandeyin, &#8220;Paguwa&#42892; kew hati&#42892; dehellu.&#8221; Ubus in&#275;nan iye si Peres. 30Ubus paguwa&#42892; ne isab tege ingket peyat si lengngennen duk in&#275;nan iye si Sera.</div>
 </div>
 </div>
</div>

Masa miyaꞌan, tahalaꞌ si Yahud amban meꞌ sakanen, duk pī iye patennaꞌ si lella amban Adullam, inēnan si Hira. Pag laꞌi si Yahud magkesuwaꞌ iye duk dende, anak lella amban Kanaꞌan inēnan si Shua. Maganda iye si dendehin duk magulid siye. Betteng dendehin. Pag nganak iye lella, ēnanne si Er. Ngiram ne isab iye balik, pag nganak iye lella, ēnanne si Onan. Pag laꞌi iye si Kesib, nganak ne isab iye lella, bu ēnanne si Shela. Pinaꞌandahan weꞌ si Yahud si Er anakne sakahin si dende inēnan si Tamar. Saguwaꞌ si Er, gaꞌi kasulutan Tuhanin si hinangannen. Hangkan hep pinapatey iye weꞌ Tuhanin. Ubus paꞌin si Yahud pu si Onan, “Hinangun anda bakas anda pungtinaꞌinu ley. Tuhutun pangaddatanten bi supaya niyaꞌ puliꞌ pungtinaꞌinun.” Saguwaꞌ kataꞌuhan si Onan weꞌ nakanakin gey kajari paganakne. Hangkan hep kahabaꞌ iye paꞌulid si anda pungtinaꞌinen pabuꞌusne manniꞌnen si luwasan supaya dendehin gey betteng weꞌ ne. Manjari ganaꞌ tubuꞌ sakane mamateyin. Gey teꞌed kasulutan Tuhanin si hinangan si Onan miyaꞌan. Hangkan pinapatey du isab iye weꞌ Tuhanin. Ubus paꞌin si Yahud si eyuꞌannen, si Tamar, “Pī ne kew dahuꞌ si lumaꞌ samanun. Daꞌa kew magella. Agadun ne si Shela anakkun samantaꞌan gey pe iye hadje.” Bu tapikilne kaw isab si Shela matey kuweꞌ meꞌ pungtinaꞌinen. Ubus pī ne si Tamar si lumaꞌ samanen, patennaꞌ laꞌi.
Pag tiggel-tiggel ne, matey ne anda si Yahudin iye anak si Shuahin. Pag kewuliꞌan ne dukkanen, pī iye duk bagaynen si Hira aꞌa amban Adullamin hap Timna, pī si aꞌa mangultihan bili-bilinen. Pag kale si Tamar weꞌ hap Timna metoꞌanen magpakulti bili-biline, iluwasan weꞌ ne badjuꞌne pagbalunen, bu magmastura iye, duk iye gey takilale. Ubus ningkoloꞌ iye si behe tarangka Enayim si lān tudju Timna. Peggeꞌ kataꞌuhanne weꞌ subul ne si Shela bu gaꞌ taꞌellane. Pag takite si Yahud iye, kannalne weꞌ burikat iye peggeꞌ kinumbusan luwenen. Gaꞌ iye takilale weꞌ si Yahud weꞌ bakas eyuꞌannen. Pī si Yahud si iye laꞌi si higad lān. Paꞌinne, “Dayiꞌ kew, magulid kite.” Ubus paꞌin dendehin, “Ine pangurungnu akuhin bang kite magulid?” Paꞌin si Yahud, “Paboꞌohante saꞌ kew anak kambing amban meꞌ panenkun.” “Urunganun ku dahuꞌ ine-ine hinangnu sandaꞌ samantaꞌan gey tekka pinaboꞌohannun,” paꞌin eyuꞌannen. Paꞌin si Yahud, “Ine sandaꞌ kabayaꞌannu inambananku kaꞌuhin?” Paꞌin dendehin, “Pagtataknun sampay bowetnen duk tungkud inantanannun.” Ubus pinangurung ne weꞌ si Yahud duk magulid ne siye. Pag tahalaꞌ ne dendehin, iluwasan badjuꞌne masturahin duk asekne balik badjuꞌ pagbalunen. Gaꞌ du tiggel kataꞌuhanne ne weꞌ betteng iye.
Ubus dinaꞌak weꞌ si Yahud bagaynen si Hira, aꞌa amban Adullamin pī nūranan kambingin si dendehin, duk dinaꞌak weꞌ ne ineddoꞌ meꞌ panyap bakas inambanannen hinang sandaꞌin. Saguwaꞌ gaꞌ ne dendehin takasuwaꞌne. Tinilew weꞌ ne meꞌ lella malaꞌihin, paꞌinne, “Intag ne burikat matuꞌu si higad lān inin?” “Gaꞌ niyaꞌ bakas burikat tuꞌu,” paꞌinde. Ubus balik ne iye pī pu si Yahud duk paꞌinne, “Gaꞌ ne iye laꞌi. Duk paꞌin meꞌ lella malaꞌihin pe, weꞌ ganaꞌ bakas burikat laꞌi.” Paꞌin si Yahud, “Bakas ne iye paboꞌohanku anak kambing saguwaꞌ gaꞌ ne iye laꞌi. Ambat ne si iye meꞌ panyapley duk kite gey pasayehan meꞌ aꞌahin.”
Pag hatu meꞌ tellum bulan palabey, niyaꞌ ngakahan si Yahud weꞌ eyuꞌannen si Tamar tatuksaꞌ weꞌ burikat iye. Bu betteng iye. Paꞌin si Yahud, “Paluwasun bi iye, eggasun bi duk iye matey.” Pag binoꞌo ne iye paluwas, masan iye pī si metoꞌanen pu si Yahud, paꞌinne, “Iye mekebetteng akuhin dapuꞌ panyap inin. Payamanun bi bang sine dapuꞌ tatak inin duk ingketne duk tungkud inin.” Takilale weꞌ si Yahud meꞌ panyapin. Paꞌinne, “Pesōng pe dupangkun amban iye. Peggeꞌ gaꞌ iye paꞌellahanku si anakkun si Shela.” Ubus gaꞌ ne iye bakas paꞌulid balik.
Pag taꞌabut ne iye sōng nganak, kambal anakne dem bettengin. Pag nganak ne iye, dembuwaꞌin paluwasne tangannen. Hangkan ngeddoꞌ hilu peyat pandeyin bu iningketan weꞌ ne diyataꞌ lengngenne duk paꞌinne, “Iye inin mapaguwaꞌ dehelluhin.” Pag inonot weꞌ ne balik tangannen, iye mapaguwaꞌ dehelluhin dembuwaꞌin. Ubus paꞌin pandeyin, “Paguwaꞌ kew hatiꞌ dehellu.” Ubus inēnan iye si Peres. Ubus paguwaꞌ ne isab tege ingket peyat si lengngennen duk inēnan iye si Sera.

सुनें - Panagnaꞌan 38