Holi Baibul

Bambai na wandei Jisas bin preiprei, en wen imbin binij, wanbala wekinmen blanga im bin askim im, “Bos, Jon Beptis bin titjim im wekinmen olabat blanga prei. Wal wotabat yu titjim melabat blanga prei du.”
Wal Jisas bin dalim im wekinmen olabat, “Wen yumob prei, yumob garra tok lagijat,
‘Dedi langa hebin,
yu neim im brabli haibala,
en melabat nomo wandim enibodi garra yusum yu neim nogudbalawei.
Melabat wandim yu garra kaman en jidan bos langa melabat.
Melabat askim yu blanga gibit melabat daga blanga dagat tudei.
Melabat bin larramgo fri detlot pipul hubin dumbat nogudbala ting langa melabat,
en melabat askim yu blanga larramgo melabat fri du.
Melabat askim yu nomo blanga larram enijing testimbat melabat brabli adbalawei.’
Lagijat na yumob garra prei.”
Wal Jisas bin dalim dislot wed langa im wekinmen olabat du, “If wanbala brom yumob go langa im fren haus midulnait, en yu askim im, ‘Fren, yu gibit mi thribala daga, dumaji wan fren main bin kaman langa main haus brom longwei, en ai nomo garram eni daga blanga gibit im.’ Wal wanim yumob reken? Det fren blanga yu garra tok, ‘Yu nomo kaman en weikimapbat mi. Aibin lokimap det dowa na, en ola biginini main olabat silip. Ai kaan gidap en gibit yu enijing.’ Yumob reken im garra tok lagijat? Nomo. Im kaan tok lagijat. Ai dalim yumob. If im kaan gidap en gibit yu det daga nomeda yu fren blanga im, wal im garra gidap en gibit yu det daga dumaji im nomo wandi meigim miselp sheim.
“Wal ai dalim yumob na. Yumob garra askim God blanga enijing, en yumob garra gedim det ting, dumaji enibodi hu askim God blanga enijing garra gedim det ting. En yumob garra lukabat enijing, en yumob garra faindim det ting, dumaji enibodi hu lukabat enijing garra faindim det ting. En yumob garra nok langa eni dowa, en det dowa garra opin blanga yumob, dumaji God garra opin det dowa blanga enibodi hu nok langa det dowa.
“Yumob jinggabat na. Wen yumob san askim yumob blanga fish, wanim yumob gibit olabat? Yumob gibit olabat jigiwan sneik o yumob gibit im fish? En wen yumob san askim yumob blanga eig, wanim yumob gibit olabat? Yumob gibit olabat skopiyan o yumob gibit olabat eig?
“Yumob sabi na? Nomeda yumob nogudbala, bat stil yumob sabi blanga gibit yumob biginini olabat gudbala ting. En yumob sabi yumob Dedi langa hebin im gudbala, en im oldei gibit brabli gudbala ting langa detlot pipul hu askim im. En if yumob askim im, wal im garra gibit yumob det Holi Spirit blanga im.” Lagijat na Jisas bin tok.


Wal wantaim Jisas bin andimwei dibuldibul brom insaid langa wan men. Det dibuldibul nomo bin oldei larram det men tok. Bat wen Jisas bin andimwei det dibuldibul, det men bin tok na, en ola pipul bin hatjamp.
Bat sambala pipul bin tok, “Det boswan dibuldibul neim Belsibul bin gibit Jisas det pawa blanga andimwei dibuldibul.”
En najalot pipul bin wandi trikim Jisas, en deibin askim im blanga dum klebabala ting blanga shoum olabat sain brom God.
Bat Jisas bin sabi wanim olabat bin jinggabat, en imbin dalim olabat, “If ola pipul langa eni traib kadimat miselp en fait gija, wal detlot pipul blanga det traib garra binijimap miselp. En if ola femili langa wan kemp kadimat miselp en fait gija, wal det femili garra binijimap miselp du. En im lagijat gin garram Seitin. If Seitin en im dibuldibul olabat kadimat miselp en fait gija, wal dei garra binijimap miselp gin, en afta Seitin kaan jidan bos.
“Wal yumob bin tok mi andimwei dibuldibul garram det pawa brom Belsibul. Bat if mi andimwei olabat garram det pawa brom Belsibul, wal wotabat detlot wekinmen blanga yumob. Dei garram det seimwan pawa laik mi blanga andimwei dibuldibul. En brom weya deibin gedim det pawa?
“Yumob sabi? Yumob ronwan wekinmen olabat shoum yumob rong wen yumob tok det pawa bin kaman brom Belsibul. Det pawa weya ai garram blanga andimwei dibuldibul bin kaman brom God, en det pawa shoum yumob God im iya olredi langa yumob.
“Wal yumob jinggabat na. Wen strongwan men jidan en maindimbat im haus garram im spiya en naif redibala, nobodi kaan gowin langa det haus en stilim enijing. Bat if brabli strongbala men kaman en fait langa im, det brabli strongbala men garra bidim im, en im garra deigidawei det spiya en naif en ola enijing blanga im. En im lagijat na wen mi andimwei dibuldibul.
“Wal yumob jinggabat na. Wen enibodi andimwei nogudwan spirit brom insaid langa sambodi, det nogudwan spirit garra go ebriweya lukabat pleis blanga jidan. En if det nogudwan spirit kaan faindim pleis blanga jidan, im garra tok miselp, ‘Ai garra gobek langa det seim sambodi weya aibin jidan basdam.’ En wen det nogudwan spirit gobek langa det sambodi, im faindim det sambodi brabli klinwan en taidiwan insaid, en det nogudwan spirit im gowei, en im gajim naja sebenbala spirit mowa nogudwan, en dei ol kaman en jidan insaid langa det sambodi. En wen dei dum lagijat, det sambodi im brabli nogudwan na, nomo laik bifo wen imbin abum oni det wanbala nogudwan spirit insaid langa im.
“Wal yumob irrim mi na. If enibodi nomo langa main said, wal im fait langa mi. En if enibodi nomo album mi majurrumap pipul langa God, wal det sambodi andimwei olabat brom God.” Lagijat na Jisas bin tok langa ol detlot pipul.
Wal afta na wan gel bin jingat langa im, “Yu mami im brabli lakiwan imbin abum san laik yu.”
Wal Jisas bin tok, “Trubala tharran yubin tok. Bat detlot pipul hu irrim det wed blanga God en duwit, olabat na brabli lakiwan.”
Wal Jisas bin kipgon tok langa detlot pipul hubin majurrumap miselp langa im, “Loda pipul iya tudei olabat brabli nogudbala, en dei wandi luk klebabala ting. Bat God kaan shoum olabat klebabala ting. Dei garra jinggabat det klebabala ting weya God bin dum langa det speshalwan mesinja blanga im neim Jona. Det mesinja bin gibit woning langa detlot pipul langa det taun gulum Ninaba.
“En lagijat du ai gibit woning langa ola pipul iya tudei. Wen det taim garra kaman weya God garra jadjim ebribodi, ola pipul brom Ninaba garra jandap, en dei garra pudum bleim langa yumob, dumaji olabat bin libum detlot nogudbala ting weya deibin dumbat wen Jona bin gibit olabat det woning. Bat yumob nomo bin libum det nogudbalawei blanga yumob.
“En det gel hubin jidan bos blanga det kantri gulum Shiba garra jandap en pudum bleim langa yumob du, dumaji imbin kaman longwei brom im kantri blanga irrim det King Salaman dalimbat im olkainaba klebabala wed brom God, en imbin duwit langa detlot wed. Bat yumob nomo bin duwit langa det wed weya yumob bin irrim.
“Wal ai dalim yumob. Sambodi iya langa yumob tudei im mowa haibala langa Jona en im mowa haibala langa King Salaman du.
“Wal yumob jinggabat na. Nobodi kaan laidim lemp en blandim. Yu kaan pudum det lait andanith langa baskit. Yu garra pudum im langa top weya ola pipul gin luk det lait wen dei gowin insaid. En det dubala ai blanga yu, dubala jis laiga lemp blanga yu. Wen det dubala ai gudwan, yu gin luk det lait brabliwei. Bat wen dubala nogudwan, yu kaan luk det lait gudwei, en ebrijing im jidan dakbala. Wal yu garra meiksho yu gin luk det lait brabliwei, dumaji yu nomo wandi jidan dakbala.
“Yumob sabi? Det wed blanga God im jis laiga lait. En ai nomo bin blandim det lait brom yumob. En if yumob abum det lait langa yumob laif brabliwei nomo garram eni shedo, wal yumob garra jidan brabli gudwei jis laik weya yumob luk gudwei wen det lemp im lait braitwan.” Lagijat na Jisas bin tok langa detlot pipul.

Afta na wen Jisas bin binij toktok, wan serramonimen deya gulum Ferasi bin askim im blanga go en dagat daga langa im kemp, en Jisas bin go garram im, en det serramonimen bin hatjamp wen imbin luk Jisas nomo bin klinim im bingga bifo imbin dagat.
Wal Jisas bin dalim det serramonimen, “Ol yumob serramonimen oldei klinimbat yumob kap en pleit en ebrijing. Bat yumob nomo klinbala. Yumob jidan brabli klinwan atsaidwei. Bat insaidwei yumob brabli gridibala en nogudbala. Yumob granggibala! God bin meigim det atsaidpat, en imbin meigim det insaidpat langa yu du. En if yu gibit ebrijing brom yu hat langa ola po pipul, wal God garra meigim ebrijing klinbala blanga yu.
“Yu irrim mi na. Im garra brabli nogud blanga ol yumob serramonimen. Nomeda yumob oldei gibit haf ola enijing blanga yumob langa ofring, bat stil yumob nomo tridimbat ola pipul raitwei en yumob nomo laigim God brabliwei. Wal yumob garra tridimbat ola pipul brabliwei en laigim God brabliwei, en yumob garra kipgon gibitbat det ofring du.
“Ai dalim yu. Im garra brabli nogud blanga ol yumob serramonimen, dumaji yumob oldei laigim jidan langa gudwan pleis deya insaid langa det Juwish Miting Pleis, en yumob oldei wandim ola pipul garra rispek yumob langa ebri shop wulijim ebribodi gin luk en sabi yumob haibala men.
“Wal im garra brabli nogud blanga yumob, dumaji yumob jis laiga greibyad weya nobodi sabi. Nobodi kaan luk det greib, en wen dei wok ontop langa det greib, dei nomo sabi det greib im deya garram det nogudwan bodi insaid.
“Yumob sabi? Atsaidwei yumob luk gudwan. Bat insaidwei yumob nogudwan.” Lagijat na Jisas bin tok langa det serramonimen.
Wal wan lowamen deya bin dalim Jisas, “Titja, wen yu tok lagijat, yu tok nogudwei langa melabat.”
Wal Jisas bin dalim det lowamen, “Im garra brabli nogud blanga ol yumob lowamen du, dumaji yumob oldei meigim det lowa brabli adbala blanga ola pipul, en yumob nomo dum enijing blanga album olabat.
“Bambai im garra brabli nogud blanga yumob. Yumob grengrenfatha olabat bin oldei kilimbat ded ola speshalwan mesinja blanga God, en afta yumob oldei abum serramoni blanga makam detlot greib blanga detlot mesinja. En nomeda yumob makam detlot greib, bat stil yumob agri langa yumob grengrenfatha weya deibin kilimbat ded detlot mesinja.
“Wal God bin sabi yumob grengrenfatha olabat garra kilimbat ded detlot speshalwan mesinja blanga im, dumaji longtaim langa oltestaman imbin tok, ‘Ai garra jandim ol detlot speshalwan mesinja en speshalwan mishanri langa detlot pipul, en detlot pipul garra kilim sambala ded en gibit sambala adtaim.’
“Wal God garra panishim ola pipul hu jidanbat tudei. Im garra peibek blanga ol detlot mesinja weya deibin kilimbat ded brom det taim wen God bin meigim ebrijing en deibin kilimbat ded Eibul raidap weya deibin kilimbat ded Sekaraiya rait langa midul langa det Serramoni Pleis blanga ola Juwish pipul. Deibin kilim im ded langa midul langa det Seikridwan Pleis en det teibul blanga ofring.
“Trubala ai dalim yumob. God garra panishim ola pipul hu jidanbat tudei blanga peibek blanga ol detlot mesinja weya deibin kilimbat ded longtaim.
“Trubala im garra brabli nogud blanga ol yumob lowamen. Yumob sabi det wei blanga God. Bat yumob nomo bulurrum det wei. En yumob nomo larram ola najalot pipul bulurrum det wei du.” Lagijat na Jisas bin tok langa det lowamen.
Brom deya Jisas bin gowei brom det haus blanga det serramonimen, en brom det taim na ola serramonimen en ola lowamen bin oldei tok adbalawei langa Jisas, en deibin oldei askimbat im olkain ting, dumaji deibin wandi trikim im en irrim im tok rongwei.

सुनें - Luk 11