ᒦ ᐅᐌ ᑫᐅᒋᓂᓯᑐᑕᒪᓐ ᐅᐅᐌ ᒉᓂᓯᔅ ᑳᐃᒋᑳᑌᒃ ᒪᓯᓇᐃᑲᓐ
ᒉᓂᓯᔅ ᑳᐃᒋᑳᑌᒃ ᑫᑰᓐ ᑳᐅᒋ ᒫᒋᓭᒃ᙮ ᐅᐅᐌ ᒪᓯᓇᐃᑲᓐ ᑭᐐᑕᒫᑯᒥᓐ ᑲᑭᓇ ᑫᑰᓐ ᑳᐅᔑᒋᑳᑌᒃ ᐋᓃᓐ ᑲᔦ ᐃᓂᓂ ᑳᑮ ᐃᔑ ᐅᔑᐋᑲᓂᐎᒡ, ᑳᑮ ᐅᒋ ᒫᒋᓭᒃ ᒪᒋᑑᑕᒧᐎᓐ ᑲᔦ ᑲᒀᑕᑭᑑᐎᓐ ᐅᐅᒫ ᐊᑮᕽ, ᑭᔐᒪᓂᑑ ᑲᔦ ᑳᐃᔑ ᑲᓇᐙᐸᒫᒡ ᐯᒫᑎᓯᓂᒡ᙮ ᐅᐅᐌ ᒪᓯᓇᐃᑲᓐ ᒉᓂᓯᔅ ᑮᓃᔓᓈᐎᓂᑳᑌ
1. ᑭᒋ ᐅᔑᐲᐃᑲᓇᓐ 1–11 ᑳᑮ ᐃᔑ ᐅᔑᒋᑳᑌᒃ ᐊᑭ ᔑᑾ ᓂᑕᒻ ᐃᑯ ᑳᑮ ᐅᒋ ᒫᒋᓭᒃ ᒋᐊᔮᒡ ᐯᒫᑎᓯᒡ᙮
2. ᑭᒋ ᐅᔑᐲᐃᑲᓇᓐ 12–50 ᓂᑕᒻ ᐃᑯ ᑳᑮ ᐅᒋ ᒫᒌ ᐊᔮᐙᒡ ᐃᔅᕒᐃᔭᓬᐊᒃ᙮ ᒦ ᐃᒫ ᐁᔑᑕᔑᓱᒡ ᓂᑕᒻ ᐃᑯ ᐊᐊ ᐁᐸᕒᐊᐋᒻ ᑳᑮ ᐃᔑᓂᑳᓱᒡ ᐋᓃᓐ ᑳᐃᔑ ᑌᐺᔦᓂᒫᒡ ᑳᐃᔑ ᓇᓇᐃᑕᐙᒡ ᑲᔦ ᑭᔐᒪᓂᑑᓐ᙮ ᑕᔑᒫᐗᓐ ᑲᔦ ᐅᑯᓯᓴᓐ ᐋᐃᓯᑰᓐ ᐃᓂ ᑲᔦ ᐅᔑᔕᓐ ᒉᑲᐴᓐ᙮ ᒉᑲᑉ ᑲᔦ ᑮᑕᑯ ᐃᔑᓂᑳᓱ ᐃᔅᕒᐃᔭᓬ᙮ ᒉᑲᑉ ᑳᑮ ᒥᑖᔑᓃᔑᓂᒡ ᐅᑯᓯᓴᐞ ᑕᔑᓱᐗᐞ᙮ ᒦ ᐄᑐᒃ ᐃᐃᒫ ᑳᑮ ᐅᒋ ᒫᒋᓭᐙᒡ ᒥᑖᔑᓃᔗᐙᓐ ᑳᑮᐃᓂᑣ ᐃᔅᕒᐃᔭᓬᐊᒃ᙮ ᓃᐱᐗᐞ ᑮᐃᔑ ᓅᑖᑳᓂᐎᐗᓐ ᐯᔑᒃ ᐃᓂ ᐅᑯᓯᓴᓐ ᒎᓴᑉ ᑳᑮᐃᓂᒥᓐᒡ᙮ ᒦᔥ ᑳᑮ ᐅᒋ ᐃᔑᓭᓂᒃ ᒉᑲᑉ ᒋᐊᓂ ᐃᔖᒡ ᐌᑎ ᐄᒋᑉᐊᑮᕽ ᐃᐃ ᑲᔦ ᑯᑕᒃ ᐅᑯᓯᓴᐞ᙮
ᐯᒫᑎᓯᐙᒡ ᑕᔑᒫᐗᒃ ᐅᐅᒫ ᒪᓯᓇᐃᑲᓂᕽ᙮ ᑭᔐᒪᓂᑑ ᑕᔥ ᐃᑯ ᒫᐗᒡ ᑕᔑᓱ, ᐋᓃᓐ ᑲᔦ ᑳᐃᔑᒋᑫᒡ᙮ ᐐᑌᓂ ᑲᔦ ᐐᓐ ᐃᑯ ᑫᒋᓈᒡ ᐁᑮ ᐅᔑᑑᒡ ᐅᐅᐌᓂ ᐊᑭ᙮ ᑭᑕᓂ ᐐᑕᒫᑯᒥᓐ ᐅᐅ ᒪᓯᓇᐃᑲᓐ ᐊᓂ ᐃᔥᒀᓭᒃ ᑭᔐᒪᓂᑑ ᐅᑕᔓᑕᒫᑫᐎᓐ ᐱᔑᔑᒃ ᐃᑯ ᒋᐊᓂ ᐙᐸᑕᐃᐌᒡ ᑳᐃᔑ ᓈᑲᑕᐌᓂᒫᒡ ᐅᐱᒫᑎᓰᒪᐞ᙮ ᑭᔐᒪᓂᑑ ᐐᓐ ᐃᑯ ᒪᔮ ᑕᔑᓱ ᐅᐅᒫ ᒥᓯᐌ ᒪᓯᓇᐃᑲᓂᕽ᙮ ᐐᓐ ᐄᑐᒃ ᑳᐅᓈᑯᓂᑫᒡ ᑳᓇᓇᐊᓵᒡ ᑲᔦ ᑳᒪᒫᔒᓂᒡ ᐯᒫᑎᓯᓂᒡ᙮ ᑕᔑᑌᓂ ᑲᔦ ᐁᓃᑳᓃᑕᒪᐙᒡ, ᐁᐐᒋᐋᒡ ᐅᐱᒫᑎᓰᒪᐞ ᐁᐊᓂ ᐅᓇᑕᒪᐙᒡ ᑫᓂ ᐃᔑ ᐱᒫᑎᓯᓂᒡ᙮ ᐅᐅᐌ ᒪᓯᓇᐃᑲᓐ ᒫᐗᒡ ᒣᐎᔕ ᑳᐅᒋ ᐊᔮᒃ ᑮᐅᒋ ᐅᔑᐲᐃᑳᑌ ᒋᐅᒋ ᑭᑫᒋᑳᑌᒃ ᐃᑭ ᐋᓂᑕ ᑳᑮ ᐱᒫᑎᓯᐙᒡ ᑳᑮ ᐃᔑ ᑌᐺᔦᑕᒧᐙᒡ ᒋᓂ ᐅᒋ ᐃᔑᓭᒃ ᑌᐺᔦᑕᒧᐎᓐ ᓀᐱᒡ ᒋᓂ ᐱᒥ ᐊᔮᒪᑲᒃ᙮
ᐁᑕᓱ ᐯᐸᑳᓂᐲᐃᑳᑌᒃ ᐅᐅ ᒪᓯᓇᐃᑲᓐ
ᑲᑭᓇ ᑫᑰᓐ ᑮᐅᔑᒋᑳᑌᒃ, ᐃᓂᓂ ᑲᔦ ᑮᐅᔑᐋᑲᓂᐎᒡ 1.1—2.25
ᑮᒫᒋᓭᒃ ᒪᒋᑑᑕᒧᐎᓐ, ᑲᒀᑕᑭᑑᐎᓐ ᑲᔦ 3.1-24
ᐋᑕᒻ ᑳᑮ ᐅᒋ ᒫᒋᓭᓂᒡ ᐅᐲᐌᓰᒪᐞ ᐲᓂᔥ ᐌᑎ ᓅᐗ 4.1—5.32
ᓅᐗ ᔑᑾ ᑳᑮ ᓂᑭᐲᒃ 6.1—10.32
ᐃᔥᐹᐱᑭᓂᑲᓐ ᐯᐸᓬ ᑳᐃᔑᓂᑳᑌᒃ 11.1-9
ᔐᒻ ᑳᑮ ᐅᒋ ᒫᒋᓭᓂᒡ ᐅᐲᐌᓰᒪᐞ ᐲᓂᔥ ᐌᑎ ᐁᐸᕒᐊᒻ᙮ 11.10-32
ᐅᑌᑌᒫᒃ ᒫᐗᒡ ᑳᑮ ᑭᒋ ᐃᓀᑖᑯᓯᐙᒡ, ᐁᐸᕒᐊᐋᒻ, ᐋᐃᓯᒃ, ᔑᑾ ᒉᑲᑉ᙮ 12.1—35.29
ᐄᔂ ᐅᐲᐌᓰᒪᐞ᙮ 36.1-43
ᒎᓴᑉ ᔑᑾ ᐐᒋᑭᐌᔭᐞ᙮ 37.1—45.28
ᐃᔅᕒᐃᔭᓬᐊᒃ ᐃᐃᒫ ᐊᑮᕽ ᐄᒋᑉ᙮ 46.1—50.26

सुनें - ᒉᓂᓯᔅ ᒦ ᐅᐌ ᑫᐅᒋᓂᓯᑐᑕᒪᓐ ᐅᐅᐌ ᒉᓂᓯᔅ ᑳᐃᒋᑳᑌᒃ ᒪᓯᓇᐃᑲᓐ