Жаратылыу 12
12
Аллах Ибрамны чакъырады
1Раббий Ибрамгъа былай айтханды:
– Кеси жерингден, жууукъларынгы къатларындан эмда атангы юйюнден кетип, Мен санга кёргюзтюрюк жерге бар.
2Мен сенден уллу миллет жаратырыкъма
эм сени алгъышлы этерикме;
атынгы махтаулу этерикме да,
сен кесинг алгъыш боллукъса.
3Санга алгъыш этгенлеге, Мен алгъыш этерикме,
санга къаргъыш этгенлеге уа, налат берликме.
Сени юсюнг бла битеу дунияны миллетлери
алгъышлы боллукъдула.
4Сора Ибрам, Раббий анга айтханыча, тебирегенди. Лут да аны биргесине атланнганды. Ибрам Харандан чыкъгъан заманында 75 жыллыкъ эди. 5Ибрам къатыны Сарайны да, къарындашыны жашы Лутну да, битеу ала жыйгъан мюлкню да, Харанда тургъанларында алгъан битеу къулларын да биргесине алып, Кенанны жерине барыр ючюн, жолгъа чыкъгъанды. Сора Кенанны жерине жетгендиле.
6Ибрам бу жерни юсю бла Шекем деген жерге дери, Море атлы сыйлы эмен терекге дери баргъанды. Ол заманда бу жерде Кенанлыла жашай эдиле. 7Раббий Ибрамгъа кёрюнюп:
– Мен бу жерни сени туудукъларынга берликме, – дегенди.
Ибрам анда, анга кёрюннген Раббийге къурман этилиучю жер къурагъанды.
8Алайдан ол, Бейт-Элден кюн чыкъгъан жанындагъы тау жерге кетгенди. Сора анда, Бейт-Эл андан кюн батхан жанында, Гай а кюн чыкъгъан жанында болурча, чатырын алай салгъанды. Анда Раббийге къурман этилиучю жер къурап, Раббийни атын айтып, дууа этгенди. 9Сора Ибрам, андан чыгъып, Негеб жанына барып тургъанды.
Ибрам Мисирде
10Бир замандан ол жерге ачлыкъ киргенди. Ибрам тургъан жерде ачлыкъ бек къысханы себепли, ол жашаргъа Мисирге кетгенди. 11Мисирге жууукълашханда Ибрам къатыны Сарайгъа:
– Ма, сен бек ариу сыфатлы тиширыу болгъанынг ючюн жарсыйма, – дегенди. – 12Мисирлиле сени кёрселе: «Бу аны къатыныды», – деп, мени ёлтюрюрле да, сени уа сау къоярла. 13Ол себепден, сен мени эгечимсе, деп айт. Сени хатерингден манга игилик болсун, эмда сени хайырынгдан сау къалайым.
14Ибрам Мисирге келгенден сора, мисирлиле Сарайны бек ариу тиширыу болгъанын кёргендиле. 15Фыргъауунну ёзюрлери да аны эслеп, ариулугъун фыргъаууннга махтагъандыла. Алай бла Сарай фыргъауунну тоханасына алыннганды. 16Сарайны хайырындан фыргъауун Ибрамгъа игилик этгенди. Аны къой-эчкилери, тууарлары, эркек эм тиши эшеклери, къуллары, къарауашлары, къадырлары, тюелери да болгъанды.
17Алай а Раббий фыргъаууннга бла аны юйюрюне Ибрамны къатыны Сарай ючюн къыйын ауруула жибергенди. 18Сора фыргъауун, Ибрамны чакъырып:
– Сени манга бу этгенинг неди? – деп сорду. – Ол сени къатынынг болгъанын манга нек билдирмегенсе? 19«Ол мени эгечимди», – деп, нек айтханса? Сени хатангдан мен аны кесиме къатыннга алгъанма. Энди уа ма къатынынг, ал да кет!
20Сора фыргъауун Ибрамны юсюнден адамларына буйрукъ бергенди да, ала аны да, къатынын да эм битеу болгъан затын да ашыргъандыла.
נבחרו כעת:
Жаратылыу 12: МалкъСК
הדגשה
שתפו
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© Институт перевода Библии, 2020-2024