Matiwu 1
1
Culi Kǝra Yesu Biya Sara Gwa
(Luka 3:23-38)
1Tsǝfǝ ar kǝra culi gǝ Yesu Kǝrsiti zǝr Dawuda, kǝra tsu zǝr Ibrahimu ngau.
2Ibrahimu ngǝ yabiya Ishaku,
kǝ Ishaku yabiya Yakubu,
kǝ Yakubu yabiya Yahuda ǝnga zamǝ nyi ˈyar.
3Yahuda tsu ngǝ yabiya Parisu ǝnga Zara, kǝra mǝrnda ngǝ Tamaru.
Parisu ngǝ yabiya Hesaruna,
kǝ Hesaruna yabiya Aramu,
4kǝ Aramu yabiya Aminadaɓǝu,
kǝ Aminadaɓǝu yabiya Nashanu,
kǝ Nashanu yabiya Salmonu.
5Salmonu ngǝ yabiya Buˈaza, kǝra mǝnyi ngǝ Rahapǝu.
Buˈaza ngǝ yabiya Obida, kǝra mǝnyi ngǝ Ruthlu.
Obida ngǝ yabiya Jesi,
6ǝnga Jesi ngǝ yabiya tǝl Dawuda.
Dawuda ngǝ yabiya Solomanu, kǝra mǝnyi ɗǝɗǝmǝ mala Yuraya ngau.
7Solomanu ngǝ yabiya Rahubwamu,
kǝ Rahubwamu yabiya Abijanu,
kǝ Abijanu yabiya Asa,
8kǝ Asa yabiya Jahwashafatu,
kǝ Jahwashafatu yabiya Jahwaramu,
kǝ Jahwaramu yabiya Uziya.
9Uziya ngǝ yabiya Jothlamu,
kǝ Jothlamu yabiya Ahazu,
kǝ Ahazu yabiya Hezikaya,
10kǝ Hezikaya yabiya Manasa,
kǝ Manasa yabiya Amonu,
kǝ Amonu yabiya Josaya,
11ǝnga Josaya ngǝ yabiya Jakoniya ǝnga zamǝ nyi ˈyar. Ar pǝci kǝra nji faˈar nda a vwu mafakur a vwu ˈyiˈyir Babilanu.
12Ayukuɗa nji faˈar nda a vwu Babilanu,
kǝ Jakoniya yabiya Shaltiyalu,
kǝ Shaltiyalu yabiya Zarubabelu,
13kǝ Zarubabelu yabiya Abiyadu,
kǝ Abiyadu yabiya Iliyakimu,
kǝ Iliyakimu yabiya Azoru.
14Azoru ngǝ yabiya Zadoku,
kǝ Zadoku yabiya Akimu,
kǝ Akimu yabiya Iludu.
15Kǝ Iludu yabiya Iliyaza,
kǝ Iliyaza yabiya Matanu,
kǝ Matanu yabiya Yakubu.
16Kǝ Yakubu ngǝ yabiya Yusufu, saliya Maryamu, mala kǝra yabiya Yesu, ndǝra nju ngga ǝnga Kǝrsiti.
17Abangǝ ngǝ patǝkura zamana nyi ˈyar, dzǝgwar Ibrahimu baˈanǝ Dawuda zamanǝ kumo apǝ foɗǝu, dzǝgwar Dawuda baˈanǝ mafakur wu ˈyiˈyir Babilanu zamanǝ kumo apǝ foɗǝu, dzǝgwar mafakur wu ˈyiˈyir Babilanu baˈanǝ shilǝr Kǝrsiti zamanǝ kumo apǝ foɗǝu.
Yar Yesu Kǝrsiti
(Luka 2:1-7)
18Kǝja ǝnggǝra nji ya Yesu Kǝrsiti. Mǝnyi kǝra nju ngga ǝnga Maryamu a mbiyari alkawal nǝ hǝ dzǝ ǝnga Yusufu. Ama kadivira nda hǝr dzau, ba nji thlǝwa nyi ǝnga huɗǝ sara ara Mambǝl Cicau. 19Ara sal mǝmba nyi Yusufu ndǝ tsapǝ ngau ǝnga ǝtsu naju yiwu ja hǝna sǝli nyi wu pama nji mai, kǝ ji gwu ɗǝnga lagu kǝra ja sǝni sǝya nyi ɗǝɗǝwa.
20Ama tsu ju ɗǝnga sǝ kau, kǝ waladi Thlagǝ cabiya nyi kǝr wu shuni. Ji na anǝ nyi, “Yusufu zǝr Dawuda, a sara ga hivǝr hǝ Maryamu aga ja ɗa mala ngǝ mai, ara huɗǝ kǝra ara ja sara ara Mambǝl Cici nga nyi. 21Ju nda yabiya zǝr sal, ba ga fiya nyi thlǝmǝ Yesu, ariya ju nda mbǝɗana nji gǝ nda sara ara bikǝr nda.”
22Patǝkura sǝˈyar kǝ ɗarkǝr aga ja nyabiya sǝra Thlagǝ nana lagu miya nabi. Nabi nana, abǝr, 23“Zǝkwamalagǝ kǝra gǝra sǝni ndǝ sal, wu nda hǝr huɗǝu, ju nda yabiya zǝsal, nju nda fiya nyi thlǝmǝ Imanuwelu,” kǝra ca ngǝ, “Hyal ǝnga mǝn.”
24Ənggǝra Yusufu hyaˈari sara wu ghanyi, kǝ ji mǝliya sǝra waladi Thlagǝ nar nyi ja mǝl, ca ngǝ, ba ji hǝri Maryamu aga mala nyi. 25Ama nandǝ nggya ndǝ sal ǝnga mala mai, kǝl ayukuɗa ji yabiya zǝr nyi. Ba Yusufu fiya nyi thlǝmǝ Yesu.
©2024 Initiative for the Translation and Development of African Languages and Margi Tiwi Nga Təm