याकूब 2

निष्पक्ष व्यवहार

1हे मोरिक विश्वासी भैयो, तुहुरे हमार महिमामे प्रभु येशू ख्रीष्टके चेला हुइतो। तबेकमारे तुहुरिन्के भित्तर भेदभावके भावना ना रहे। 2मानो कि यदि कौनो मनैया सोनक औँठी और सुग्घुर लुग्गा घालके तुहुरिन्के सभामे आइल। और एकथो गरीब मनैया फेन फाटल-चिँठल लुग्गा घालके आइल कलेसे, 3तुहुरे उ सुग्घुर लुग्गा घालल मनैयाहे आदर देके कबो, “अप्नि यहाँ मजा ठाउँमे बैठी।”, और उ गरीब मनैयाहे, “तैँ वहैँ ठरह्याइल रो।” अथवा “मोरिक गोरातिर तरे बैठ।” कबो कलेसे, 4का तुहुरे यहाँ भेदभाव नै देखैलो? और का तुहुरे खराब विचारसे न्याय करुइया नै हुइलो? 5हे मोरिक प्रिय भैयो, सुनो, परमेश्वर यी संसारमे गरीब मनैनहे बहुत विश्वास देले बताँ। और परमेश्वर ओइन्से यी वाचा कर्ले बताँ कि ऊ ओइन्हे अपन राजके उत्तराधिकारी बनैहीँ। और उ सक्कुहुनहे फेन जेनहे परमेश्वर प्रेम करथाँ। 6पर तुहुरे उ गरीब मनैयक अपमान करलो। बेन तुहुरे जन्थो कि यहे धनी मनै हुइँत, जेने तुहुरिन्हे अत्याचार करथाँ। और यनेहेँ हुइँत, जेने तुहुरिन्हे बरबत्ति अदालतमे लैजिथाँ। 7यी वहे मनै हुइँत, जेने येशू ख्रीष्टके आदरणीय नाउँक विरोधमे खराब बात बत्वैथाँ, जोन नाउँसे तुहुरिन्के सम्बन्ध बा। 8यदि तुहुरे पवित्र शास्त्रक सक्कुहुनसे खास मोशक नियम कानुनके पालन करबो कलेसे तुहुरे सक्कु चिज मजै करबो। यी मोशक नियम कानुन हम्रिहिन्हे आज्ञा देहत कि हम्रे दोसुर जहनहे ओस्तेहेँके प्रेम करे परत जसिके हम्रे अपनहे कर्थी। 9पर यदि तुहुरे भेदभाव करथो कलेसे तुहुरे पाप करथो, और मोशक नियम कानुन तुहुरिन्हे अपराधी ठहराइत। 10काकरेकी जे सक्कु मोशक नियम कानुन पालन करत। पर ऊ एक्केथो आज्ञा किल नै मानत कलेसे, मोशक नियम कानुनके सक्कु बातमे ऊ दोषी ठहराजाई। 11तबेकमारे जोन परमेश्वर यी कलाँ, “तैँ व्यभिचार ना करिस।”, ऊ यी फेन कलाँ, “तैँ हत्या ना करिस।” तबेकमारे यदि तुहुरे व्यभिचार नै कर्लो, पर हत्या भर कर्लो, कलेसे फेन तुहुरे मोशक नियम कानुनहे नै मनुइया ठहरलो। 12तबेकमारे तुहुरे उ मनैनके हस बोलो, और ओइनेहेँन्के हस काम फेन करो, जेनके न्याय मोशक नियम कानुन अनुसार हुइहिन जोन मोशक नियम कानुन हम्रिहिन्हे स्वतन्त्र कराइत। 13काकरेकी जोन मनैया दया नै देखाइत, ओकर न्याय परमेश्वर बिना दया देखैले करहीँ। पर यदि तुहुरे दोसुर जहनहे दया देखैथो कलेसे परमेश्वर फेन तुहुरिन्के न्याय करेबेर तुहुरिन्केमे दया देखैहीँ।

विश्वास और काम

14हे मोरिक विश्वासी भैयो, यदि केऊ कहत कि मै प्रभु येशू ख्रीष्टकेमे विश्वास करथुँ। पर दोसुर जहनके लग भलाइक काम नै करत कलेसे उहिहे का फाइदा हुइलिस्? का असिन विश्वास उहिहे बँचाई सेक्हिस? 15यदि कौनो विश्वासी भैया या बाबुहे लुग्गक जरुरी बतिन। और ओइन्हे रोट्दिन खानक कमि हुइथिन। 16और ओइन्हे तुहुरिन्मेसे केऊ असिक किल कहि कि, “शान्तिसे जाऊ। दँदुर रहो, और पेट भरके खाऊ।” पर जोन चिज शरीरके लग जरुरी बा उ चिज यदि तुहुरे ओइन्हे नै देबो कलेसे का फाइदा हुइल? 17ओस्तेके जोन विश्वास भलाइक काममे प्रकट नै हुइत कलेसे उ विश्वास मुअल हो। 18मानो यदि केऊ मोरिक बातमे असहमत होके कहत कि, “भलाइक काम बिना कर्ले फेन विश्वास करना सम्भव बा।” कलेसे मै तुहुरिन्हे कहतुँ भलाइक काम बिना कर्ले तुहुरे अपन विश्वासहे साबित करो। और मै भलाइक काम करके अपन विश्वासहे साबित करम। 19तुहुरे विश्वास करथो कि परमेश्वर एक्केथो बताँ कलेसे यी मजा बात हो। अस्तेके भूत्वन फेन यहे विश्वास करथाँ और डरकमारे थरथरैथाँ। 20पर हे मूर्ख मनै, काम बिनक विश्वास बेकार बा कहिके का तुहुरे नै जन्थो?

21पक्कै फेन हमार पुर्खा अब्राहाम जब अपन छावा इसहाकहे वेदीमे चह्राइल। तबजाके ऊ अपन कामके माध्यमसे परमेश्वरके आघे धर्मी ठहरागिलस। 22तुहुरे देखलेहल बतो कि अब्राहामके विश्वास और ओकर काम दुनु एक्के संग मिलके काम कर्लिस। और ओकर कामसे ऊ साबित करदेहल कि ओकर विश्वास पूरा बतिस। 23और पवित्र शास्त्रक यी वचन पूरा होगिल, “अब्राहाम परमेश्वरकेमे विश्वास करल, और ओकर विश्वासके कारण परमेश्वर उहिहे एकथो धर्मी मनैयक रुपमे स्वीकार कर्लिस।” और ऊ परमेश्वरके संघरिया कहिगिलस। 24तुहुरे देख्लेलो कि मनैया अपन विश्वाससे किल नै, पर ऊ अपन कर्लक कामके माध्यमसे एकथो धर्मी मनैयक रुपमे स्वीकार हुइत। 25ओस्तेके राहाब, जब सुराकिनहे ऊ अपन घरेम स्वागत करल, और ओइन्हे दोसुर डगर ओहोँरसे पठादेहल, असिके उ वेश्या फेन अपन कामके माध्यमसे धर्मी ठहरल। 26जसिके शरीर आत्मा बिना मुअल रहत, ओस्तेके विश्वास फेन भलाइक काम बिना मुअल बा।

נבחרו כעת:

याकूब 2: DVGNT

הדגשה

העתק

השווה

שתפו