Marko 1
1
YEKH
1Kadya telyardya o Lašo Nevimos anda o Isus Kristo, o Šav le Devlesko. 2O Izeya, kay sas profeto, ramosardya, “Eta, muŕi sluga kay bišalav les tuke te lašarel tuke o drom. 3Ekh glaso kay tsipil ande pusta, ‘Getisaren o drom le Rasko. Vortosaren leski vurma.’”
4Avilo o Yovano, o Bolitori, ande pusta. Bolelas tay phenelas, “Musay te keyin‐tume tay te bolen‐tume tay si t'aven yertime tumare bezexa”. 5Avenas avri leste, savoŕe katar e Yudeya tay o Yerusalemo. Avenas yertime lenge bezexa tay o Yovano bolelas le ando doryav kay bušol o Yordano.
6Phiravelas o Yovano le tsoalya kerde anda'l kemilake bal tay pe leste sas ekha mortyaki haravli. Xalas le grastoŕe la čarake tay vi o avdžin le vešengo. 7Tay vestilas o Lašo Nevimos tay mothodya, “Pala mande avel yekh may baro sar mande. Me či sim dosta lašo te bandžuvav te putrav leske tsurulya. 8Bolav tume me le payesa. Vo bolela tume le Svuntone Duxosa.”
9Tay ande kodya vryamya, avilo o Isus katar e Nazareta kay si ande Galileya, tay o Yovano boldya les ando Yordano. 10Tay kana dya avri anda o pay, yekhatar dikhlya ke puterdilo o čeri, tay o Duxo vulisto pe leste, sar ekh golumbo. 11Tay ašundilo ekh glaso ando čeri, “Tu san muŕo yekh drago šav, but veselis ma.”
12Atunči, o Svunto Duxo tradya les ande pusta, 13tay ašilo ande pusta štarvardes dyes. Tay o Beng zumavelas les. Le selbatičine živinentsa bešelas o Isus tay le andželya lenas aminte pe leste.
14Atunči kana sas phandado o Yovano, avilo o Isus ande Galileya tay vestilas o Lašo Nevimos anda e Amperatsiya le Devleski. 15Phendya, “Avili e vryamya. Pašol e Amperatsiya le Devleski. Keyisaren tay patyan‐tume ando Lašo Nevimos.”
16Tay, yekh dyes, kana delas le bregonentsa la Maryake la Galilyaka, dikhlya le Simones tay leske phrales, le Andreyasos. Šudenas penge mryaža ando pay ke mašarya‐le. 17Phendya lenge o Isus, “Phiren mantsa tay kadya kerav ke aven mašarya kay astaren le manušen.” 18Anda yekh, mekline penge mryaža tay line‐pe pala leste.
19Tay kana gelo may angle, dikhlya le Yakobos tay le Yovanos, le šaven le Zebedeyaske. And ekh ladžiya sas tay getinas penge mryaža. 20Akhardya le tay mekline penge dades ande ladžiya le butyarentsa tay line‐pe pala o Isus.
21Porme, avile ka o Kaperneyo tay, Savatone, kay si a svunto dyes le Židovongo, dya ande sinagoga tay sityarelas, 22tay le žene mutsosayle katar lesko sityarimos ke sityarelas vorta sar kay sas les le Devleski putyarya tay či sar le Zakonarya.
23Tay ande sinagoga sas ekh manuš kay sas les ande leste ekh nevužo. Bendžaylo sas. 24Tay tsipisardya, “Sostar hamis tu amende, Isusa anda e Nazareta. Avilyan te xalyares ame? Žanav tu kon san. San o Svunto le Devlesko.”
25Numa, o Isus porunčisardya pe leste, “Aš miro. Av avri anda leste.” 26Tay o nevužo izdradya les tay regnisardya les tay avilo avri anda leste. 27Tay sa čudisayle savoŕe tay mothodine yekh avreske, “So si kadya? Nevo sityarimos la putyaryasa? Vi pe le nevuže porunčil tay patyan lesko muy.” 28Yekhatar, gelya o glaso pa leste ande soŕo them kay bušol e Galileya.
29Tay anda yekh o Isus meklya e sinagoga tay dya andre ando kher le Simonesko tay le Andreyasosko. Le Yakobosa tay le Yovanosa sas. 30Eta, e sakra le Simoneski pašlolas ke nasvali‐la, tay anda yekh mothode leske pa late. 31Atunči, dya tay lya la le vastestar tay vazdya la. Tay, anda yekh meklya la o nasvalimos, tay lya sama lendar.
32Sa kodya ryat kana pelo o kham tele, ingerde leste sa le nasvalen tay vi kodolen kay sas le nevuže ande lende, 33Tay sa le žene anda o foro tyidinisayle angla o vudar. 34Tay sastyarelas bute našvalen tay but nasvalimata tay vi gonilas avri bute nevužen. Či meklya le nevužen te den duma ke prinžarenas les.
35Atunči, anda e ryat, kana sas inke tunyariko, vuštilo tay telyardya and ekh miro than tay rudžilas‐pe. 36Tay geline o Simone tay vi le aver pala leste. 37Kana arakhline les, mothodine leske, “Savoŕe roden tu.” 38Mothodya lenge, “Žas amenge and aver foruri paše te šay vestiv vi kote, ke pala kodya avilem avri”. 39Tay gelo la intregonya Galileyasa tay vestilas ande lenge sinagogi tay gonilas avri le nevužen.
40Tay avilo leste ekh manuš pherdo gerasa. Kodo pelya p'el čangende tay manglya lestar, “Te kames, šay sastyares ma.” 41Pelya leske mila lestar tay anzerdya pesko vas tay azbadya le gerales tay phendya leske, “Ey, kamav. Te sastyos.” 42Tay anda yekh xasayli e ger lestar tay sastilo. 43Porme, may anglal te delas les drom, o Isus phendya leske zurales, 44“Na motho kanikaske khanči. Numa, ža tay sikav tu le rašaske tay ker so porunčisardya o Moze tay kadya si te žanen le žene ke vorta sasto san.” 45Numa o manuš dya avri tay delas duma pa leste kaygodi tay mothodya savoŕenge. Pala kodya, našti may žalas and el foruri o Isus numa p'el gava ašelas. Tay vi intyal tay vi ordal avenas leste le žene.
נבחרו כעת:
Marko 1: Kald71
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
maintained by the British and Foreign Bible Society