റോമക്കാറാര് 8
8
സാമിണിഗാല് ണഡാത്ത്‌റവാര് ആയിരിരി
1അദ്‌ണാലെ ഇപ്പ് ക്‌റ്‌സ്‌ത്ത് ഏസുക്ക് എജേന്ത് പെ്ളേക്കവാര്‌ക്ക് പാവാക്ക് കെ്ഡേക്ക ദണ്ടണെ ഇല്ലെ. 2ക്‌റ്‌സ്‌ത്ത് ഏസുക്ക് എജേന്തിര്‌ക്കാദ്‌ണാലെ ണമാക്ക് സാമിണിഗാല് തര പുദ്യ പെ്ളേപ്പ് കെ്ഡേത്തിര്‌ക്ക്‌ദ്. അച്ചെ പാവാക്ക്‌മ് സാവുക്ക്‌മ് ആളാക്കി ഇര്‌ക്ക സട്ടാത്തിലിര്‌ന്ത് ണമാണ സാമിണിഗാല് ബ്‌ഡ്‌സിര്‌ക്ക്‌ദ്. 3ആന മോസെ ബെത്ത സാമി സട്ടപഡി ണഡാന്ത് പാവാത്തിലിര്‌ന്ത് ദെങ്കി കഡാക്ക്യ ണമാക്ക് മുഡിരാദില്ലെ. എന്ത്‌ക്കെന്റ മന്‌സാരാന ണമ്മ കുറ്റകൊറെവുള്ളവാര് ആനാദ്‌ണാലെ സാമി സട്ടാക്ക് കെ്ട്ട്‌പട്ട് ണഡാക്ക്യ ണമാക്ക് പറ്റ്‌റാദില്ലെ. അദ്‌ണാലെ ണമ്മ് പാവണ തീക്ക്യ ബേ്ണ്ടി ണമ്മ് ഉരുവാത്തിലി ണമാണ പാസെ ഇര്‌ക്ക ഒരു മന്‌സാനായി സാമി തന്ന് മഗാന ഉലഗാക്കെ അന്‌പ്പി ബ്‌ട്ടാ്. അച്ചെ ണമ്മ് പാവാക്ക് കെ്ഡേക്ക ദണ്ടണേന അവാ് ഏറ്റ്‌കൊണ്ടാ്. 4അച്ചെ ണമ്മോഡെ ഇര്‌ക്ക പാവ പളാക്കാക്ക് ണമ്മ കെ്ട്ട്‌പട്ട് ണഡാക്കാദെ സാമിണിഗാല്‌ക്ക് കെ്ട്ട്‌പട്ട് ണഡാക്ക ണമാക്ക് സാമി സട്ടാത്തിലി സൊല്ലിര്‌ക്ക ണേര്‌മെ ഉള്ള കാര്യഗ ണമ്മ് പെ്ളേപ്പിലി സെയ്യ മുഡ്യു.
5പാവ പളാക്കാത്തിലി പെ്ളേക്കവാര് തമ്മ്‌ദ് പാവ പളാക്കാക്ക് തഗ്‌ന്ത ആസെപഡി ണഡാക്കാര്. സാമിണിഗാല്‌ക്ക് കെ്ട്ട്‌പട്ട് ണഡാക്കവാര് സാമിണിഗാല് ആസെപട്ട കാര്യഗണ ണെനേക്കാര്. 6പാവ പളാക്കാക്ക് കെ്ട്ട്‌പട്ട് ണഡാക്കവാര്‌ക്ക് സാവു ബരു. സാമിണിഗാല്‌ക്ക് കെ്ട്ട്‌പട്ട് ണഡാക്കവാര്‌ക്ക് ണിമ്മദിമ് ഉജുറുമ് കെ്ഡേക്കു. 7മന്‌സാന്‌ക്ക് ഇര്‌ക്ക പാവ പളാക്ക സാമ്യോഡെ പോട്ടിക്ക് ണില്ല്‌ദ്. അദ് സാമി സട്ടാക്ക് കെ്ട്ട്‌പഡ്‌റാദ്‌മില്ലെ. സാമി സട്ടാക്ക് കെ്ട്ട്‌പഡ്യ മുഡ്യാമ് മാട്ട. 8സാമിന പിര്യപഡ്‌സ്യ പാവ പളാക്ക ഇര്‌ക്ക മന്‌സാര്‌ക്ക് മുഡ്യമാട്ട.
9സാമിണിഗാല് ണിമ്മോഡെ ഇര്‌ക്കദാനാക്കി ണിമ്മ മന്‌സാര്‌ക്ക് ഇര്‌ക്ക പാവ പളാക്ക ഇര്‌ക്കവാരല്ല, സാമിണിഗാല്‌ദ് ആസെപഡി ണഡാക്കവാര്‌ത്തെ. ക്‌റ്‌സ്‌ത്ത് ണിഗാല് ഇല്ലാത്തവാ് അവാന്‌ക്കുള്ളവാനല്ല. 10ആന ക്‌റ്‌സ്‌ത്ത്‌ദ് ണിഗാല് ണിമ്മ്‌ദൊപ്പ ഇര്‌ക്കദാനാക്കി ണിമ്മ സെയ്‌ദ പാവാക്ക് ണിമ്മ് സരിഗല അളിന്തെക്കിനാല്‌മ് സാമി ണിമാണ ണേര്‌മെക്കാറാര് ആക്കിനാദ്‌ണാലെ ണിമ്മ്‌ദ് ണിഗാല്‌കുട്ടി പെ്ളേക്കു. 11സാമി സത്തവാര് പട്ടിലിര്‌ന്ത് ഏസുണ ഉജുറേ്ത്തിനാ്. അയ്യി സാമിണിഗാല് ണിമ്മ്‌ദൊപ്പ ഇര്‌ന്താക്കി ക്‌റ്‌സ്‌ത്ത്‌ണ സത്തവാര് പട്ടിലിര്‌ന്ത് ഉജുറേ്ത്തിന സാമി ണിമ്മോഡിര്‌ക്ക തന്ന്‌ദ് ണിഗാല്‌ണ ബെത്ത് അളിന്ത് പോര ണിമ്മ്‌ദ് സരിഗലാക്ക്‌മ് ഉജുറു കൊഡുക്കുവാ്.
12അദ്‌ണാലെ ഏസുക്കാറാരെ, ഇനി ണമ്മ മന്‌സാര്‌ക്ക് ഇര്‌ക്ക പാവ പളാക്കുള്ള ആസെപഡി പെ്ളേക്ക്യ ണമ്മ അയ്യി പളാക്കാക്ക് കഡാമെപട്ടവരല്ല. 13എന്ത്‌ക്കെന്റ മന്‌സാര്‌ക്ക് ഇര്‌ക്ക പാവ പളാക്കുള്ള ആസെപഡി പെ്ളേക്കദാനാക്കി കണ്ടിപ്പായി ണിമ്മ സാവേര്. ആന സാമിണിഗാല്‌ക്ക് കെ്ട്ട്‌പട്ട് ണഡാന്ത് ണിമ്മ് സരിഗല ആസെപഡ്‌റ കെ്ട്ട കാര്യഗണ ണിമ്മ തള്ളിന ണിമ്മ പെ്ളേക്കുവേര്. 14സാമിണിഗാല് ണഡാത്ത്‌റ ഏവാര്‌മ് സാമിദ് പ്‌ള്ളെഗാത്തെ. 15പിന്നേമ് ണിമാണ കോവെപ്‌ഡിസി അദ്‌ക്ക് ആളാക്ക്‌റ ണിഗാല്‌ണ അല്ല ണിമാക്ക് കെ്ഡേത്താദ്. ആന ണിമാണ സാമിക്ക് പ്‌ള്ളെഗ ആക്ക്‌റ ണിഗാല്‌ത്തെ ണിമാക്ക് കെ്ഡേത്താദ്. അയ്യി സാമിണിഗാലിലി ണമ്മ സാമിന: <<അപ്പ, എന്ന് അപ്പ>> എന്ത് ഒളേക്കാമ്. 16അച്ചെ സാമിണിഗാല്‌മ് താന്‌മ് ണമ്മ് ണിഗാലോഡെ എജേന്ത് ണമാണ സാമിദ് പ്‌ള്ളെഗ എന്ത് ഒറേപ്പ് തര്‌ദ്. 17ണമ്മ സാമിക്ക് പ്‌ള്ളെഗ ആനാക്കി സാമി കൊഡുക്കാദ്‌ക്ക് ണമ്മ ഉരിമെക്കാറാര്‌ത്തെ, അദ് ക്‌റ്‌സ്‌ത്ത്‌ദൊപ്പ ണമാക്ക്‌മ് കെ്ഡേക്കു. അവാന്‌ക്കിര്‌ക്ക മദ്‌പ്പ്‌മ് പേര്‌പെര്‌മേമ് ണമാക്ക്‌മ് കെ്ഡേക്കുഡൊ എന്ത ണമ്മാമ് അവാ് കജട്ടപട്ട പാസെ കജട്ടപഡുഡൊ.
സാമി തര മദ്‌പ്പ്
18സാമി ണമാക്ക് തര്യ പോര തന്ന്‌ദ് മദ്‌പ്പ്‌ണാമ് പേര്‌പെര്‌മെനാമ് ണെനേത്ത ഈ കാലാത്തില്യ കജട്ടഗെല്ല ഒരു സുക്കുമല്ല എന്ത് ണാന് കണക്കാക്ക്‌റെ. 19തന്ന് പ്‌ള്ളെഗ ആരാരെന്ത് കാട്ടി കൊഡുക്ക്യ ബേ്ണ്ടി സാമി ദ്‌ട്ടിസിര്‌ക്ക എല്ലാമെ കാണുഡൊ എന്തുള്ള ആസോഡെ കാത്തിര്‌ക്ക്‌ദ്. 20-21അദ്‌താനെമല്ല സാമി ദ്‌ട്ടിസിര്‌ക്കാദെല്ലാമ് അളിന്ത് പോരാദ്‌ക്ക് സിക്കിര്‌ക്കാദിലിര്‌ന്ത് ബ്‌ഡ്‌സി കഡാക്കുഡൊ എന്ത്‌മ് സാമി പ്‌ള്ളെഗ എങ്ക മദ്‌പ്പ്‌ക്ക് പങ്ക്‌ക്കാറാര് ആരാദുക്കുള്ള തഞ്ച കെ്ഡേക്കുഡൊ എന്ത്‌മ് ണെഞ്ചഡോഡെ അയ്യി ണാള്‌ക്ക് ബേ്ണ്ടി കാത്ത്‌കൊണ്ടിര്‌ക്ക്‌ദ്. എന്ത്‌ക്കെന്റ അവാനവാ് പിര്യാക്കല്ല, സാമി പിര്യാക്ക്‌ത്തെ ദ്‌ട്ടിസിനാദ്‌ഗെല്ല അളിന്ത് പോര ബിദിക്ക് സിക്കിനാദ്.
22ദ്‌ട്ടിസിര്‌ക്ക എല്ലാദ്‌മ് ഇന്നാരമാട്ട്‌ക്ക്‌മ് ഒരുത്തി പ്‌ള്ളെ ഉറുസുക്ക് അഗാറി കൊണ്ടിര്‌ക്ക പാസെ അഗാറി കൊണ്ടിര്‌ക്ക്‌ദ് എന്ത് ണമാക്ക് തെര്യുമല്ല. 23സാമിണിഗാല് എങ്ക ഇനാമ്‌ണ മുദ കെ്ഡേസിര്‌ക്ക ണമ്മാമ് അളിന്ത് പോര ഈ സരിഗലാത്തിലിര്‌ന്ത് തപ്പിസി കഡാന്ത് സാമി പ്‌ള്ളെഗ ആയ ബേ്ണ്ടി മനേസ്സ്‌ക്കുള്ളുക്ക് മുട്ടുമുഡുത്ത്‌കൊണ്ട് കാത്തിര്‌ക്കാമ്. 24ഈ ണെഞ്ചഡെണാലെത്തെ ണമ്മ ദെങ്ക്‌സി കഡാന്താദ്. കാണ്‌റ എന്താറ്റൊന്റുക്ക് ണെഞ്ചഡെ ബെക്കാദ് ണെഞ്ചഡെ അല്ല. കണ്ണിലി കാണ്‌റ എന്താറ്റ്‌ക്ക് ബേ്ണ്ടി ണമ്മ എന്ത്‌ക്ക് ണെഞ്ചഡെ ബെക്കാദ്? 25കാണാത്ത എന്താറ്റ്‌ക്ക് ബേ്ണ്ടി ണമ്മ ണെഞ്ചഡെ ബെക്കാട്ടി, അദ്‌ക്ക് ബേ്ണ്ടി ണമ്മ പൊറിമോഡെ കാത്തിര്‌ക്കാമ്.
26അദേപാസെ താനെ ണമ്മ കുറ്റകൊറെവുള്ളവാര് ആയിര്‌ക്കാദ്‌ണാലെ സാമിണിഗാല് ണമാണ കയ്യിതാങ്ക്യ ബര്‌ദ്. സെരിക്ക്‌മ് എന്ത്‌ക്കെല്ല പരേസുഡൊ എന്ത് ണമാക്ക് തെര്യ. ആന സാമിണിഗാല് ണമാക്ക് ബേ്ണ്ടി അനാഗി കൊണ്ട് പരേസ്‌ദ്. അദ് ണമാക്ക് ണെപ്പ്‌കെ്ഡേക്കാദ്‌മില്ലെ. 27ആന സാമിക്ക് പട്ടവാര്‌ക്ക് ബേ്ണ്ടി സാമി ആസെപഡ്‌റ കാര്യണാത്തെ സാമിണിഗാല് ബേ്ണ്ടികൊള്ളുറാദ് എന്ത് മന്‌സാന്‌ദ് മനേസ്സ്‌ണ സോദണെ സെയ്‌ര സാമിക്ക് തെര്യു.
28ആന സാമി സീവാ് ബ്‌ഡ്‌റവാര്‌മ് താന് ണെനേത്തിര്‌ക്ക കാര്യാക്ക് ബേ്ണ്ടി ഒളേത്ത് ബെത്തിര്‌ക്കവാര്‌മാന ആള്‌ഗാക്ക് ബേ്ണ്ടി എല്ല കാര്യഗണാമ് സാമി ണല്ലാദ്‌ക്ക് ബേ്ണ്ടി സെയ്‌രാ് എന്ത് ണമാക്ക് തെര്യു. 29എന്ത്‌ക്കെന്റ താന് ണേരാത്ത്യെ തെരിന്തെ്ഡ്‌ത്ത് ബെത്തിര്‌ന്തവാര്‌ണ തന്ന്‌ദ് മഗാന്‌ക്ക് ഇര്‌ക്ക ഉരുവണ പാസെ ആയ ബേ്ണ്ടി സാമി അവാര്‌ണ അലാക്ക പ്‌റ്‌ത്ത് ബെത്ത് തന്ന് മഗാന സാമി അവാര്‌ക്ക് തലെകോഡി അണ്ണാ് ആക്കി ബെത്താ്. 30താന് അലാക്ക പ്‌റ്‌ത്ത് ബെത്തിര്‌ക്കവാര്‌ണ അവാ് ഒളേത്താ്, താന് ഒളേത്തവാര്‌ണ ണേര്‌മെക്കാറാര് ആക്കിനാ്, ണേര്‌മെക്കാറാര് ആക്കിനവാര്‌ണ തന്ന് മദ്‌പ്പ്‌ക്ക് പങ്ക്‌ക്കാറാര് ആക്കിനാ്.
മ്‌ഗ്‌ന്ത സാമി സീവാ്
31ണമ്മ ഇനി ഇദ്‌ണ പറ്റി എന്തണ സൊല്ല്യ? സാമി ണമ്മ്‌ദൊപ്പ ഇര്‌ന്ത ഏവാന്‌ക്ക് ണമ്മോഡെ മുട്ട്യ മുഡ്യു? 32തന്ന് സൊന്ത മഗാനെന്ത് ഗൂഡി ണോഡാദെ അവാന ണമാക്കെല്ലവാര്‌ക്ക് ബേ്ണ്ടി ഒപ്പഡിത്ത സാമി അവാന്‌ദൊപ്പ തനാക്കിര്‌ക്ക എന്തണാമ് ണമാക്ക് തരാദെ ഇര്‌ക്കുവാന? 33സാമി തെരിന്തെ്ഡ്‌ത്ത് ബെത്തിര്‌ക്കവാര്‌ണ ആര്‌ക്ക് കുറ്റ സൊല്ല്യ മുഡ്യു? സാമി താനെ അവാര്‌ണ കുറ്റക്കാറാര് അല്ല എന്ത് സൊല്ലുറാ്. 34അപ്പ് ആര്‌ക്ക് അവാര്‌ണ കുറ്റക്കാറാരെന്ത് ബിദിക്ക്യ മുഡ്യു? ക്‌റ്‌സ്‌ത്ത് ഏസു സത്തവാ്, സത്തിര്‌ന്ത് ഉജുറെ്ന്തവാ്ത്തെ, അവാ് ഇപ്പ് സാമിദ് ബല സാരി ഇര്‌ന്ത്‌കൊണ്ട് ണമാക്ക് ബേ്ണ്ടി ബാദാഡ്‌റാ്. 35ക്‌റ്‌സ്‌ത്ത് ണമ്മോഡെ ബ്‌ട്ടിര്‌ക്ക സീവാനിലിര്‌ന്ത് ആര്‌ക്ക് ണമാണ പ്‌റ്‌ക്ക്യ മുഡ്യു? കജട്ടഗാക്കൊ, ബുദ്ദിമുട്ടുഗാക്കൊ, കൊഡിമെഗാക്കൊ, പജിപട്ടിണിഗാക്കൊ, സീലെസിലാപ്പ് ഇല്ലാത്താദ്‌ക്കൊ, അവങ്കേ്ഡ്‌ഗാക്കൊ, ബാള്‌ക്കൊ ണമാണ പ്‌റ്‌ക്ക്യ മുഡ്യുമ? മുഡ്യാഗെമാട്ട.
36<<ണിനാക്ക് ബേ്ണ്ടി എമ്മ എമ്മ് ഉജുറുക്ക് ബര അവങ്കേ്ഡ്‌ഗണ ദിനാമ് താങ്കികൊണ്ടിര്‌ക്കേര്.
അറ്‌ക്ക്യ ബെത്തിര്‌ക്ക കൊറ്യാഡ്‌ഗണ പാസെത്തെ എമാണ ണെനേക്കാര്>>#സാമി പാട്ട് ബുക്ക് 44:22
എന്ത് എ്ള്‌ദിര്‌ക്ക്‌ദല്ല. 37ആന ണമ്മാഗൊ, ണമ്മോഡെ സീവാ് ബ്‌ഡ്‌റവാനാലെ ഇദ്‌ഗണെല്ല ഒരേപെ്ട്ട് ഗെലിസി കഡാക്കാമ്. 38-39സാവു ബേവുക്കൊ, ഉജുറുക്കൊ, സാമിദൂദലാക്കൊ, മാഗെ ലോഗണ ആള്‌റ കെ്ട്ട ണിഗാല്‌ക്കൊ, അദിഗാരിഗാക്കൊ, ഇപ്പിര്‌ക്കാദ്‌ക്കൊ, ഇനി ബര്യ പോരാദ്‌ക്കൊ, മേലോഗാക്കൊ, കീ്ലോഗാക്കൊ, ദ്‌ട്ടിസി ബെത്തിര്‌ക്ക ഏദോരു ജാദിക്ക്‌മ്, ണമ്മ്‌ദ് ആണ്ടവനാന ഏസു ക്‌റ്‌സ്‌ത്ത് കാട്ടിന സാമി സീവാനിലിര്‌ന്ത് ണമാണ പ്‌റ്‌ക്ക്യ മുഡ്യമാട്ട എന്ത് എനാക്ക് ഒറേപ്പിര്‌ക്ക്‌ദ്.
נבחרו כעת:
റോമക്കാറാര് 8: സാമിദ് സേദി
הדגשה
שתפו
העתק
רוצים לשמור את ההדגשות שלכם בכל המכשירים שלכם? הירשמו או היכנסו
New Life Literature