1 കൊരിന്ത്യക്കാറാര് 12
12
സാമിണിഗാല് തര ബാക്ക്‌വരഗ
1ഏസുക്കാറാരെ, സാമിണിഗാല് ബാക്ക്‌വരഗണ പറ്റി ണിമ്മ ണല്ല അറുവുള്ളവാര് ആയിര്‌ക്കുഡൊ എന്ത് ണാന് ആസെപഡ്‌റെ. 2ണിമ്മ ഏസുണ ണമ്പാദിര്‌ന്ത ഗള്യേലി മ്‌ണ്ട്യ മുഡ്യാത്ത ഉജുറില്ലാത്ത സെലെഗണ കുമ്മുഡികൊണ്ട് തപ്പാന ബയ്യിമേലെ ണഡാന്തിര്‌ന്തേര്. 3അദ്‌ണാലെ ണിമ്മ ഈ കാര്യ തെരിന്തിര്‌ക്കുഡൊ: സാമിണിഗാലിലി പേസ്‌റവാ് ആര്‌മ് <<ഏസു സാപ പ്‌ഡിത്തവാ്>> എന്ത് സൊല്ലമാട്ടാ്. സാമിണിഗാലിലി അല്ലാദെ <<ഏസുത്തെ ആണ്ടവാ്>> എന്ത് ആര്‌ക്ക്‌മ് സൊല്ല്യ മുഡ്യമാട്ട.
4സാമിണിഗാല് തര ബാക്ക്‌വരഗ പല ദിന്‌സിലി ഇര്‌ക്ക്‌ദ്. ആന അദ്‌ണ ണമാക്ക് തര സാമിണിഗാല് ഒന്റുത്തെ. 5പല ദിന്‌സ്‌ക്ക് പട്ട സാമിദ് കാര്യഗ ണമാക്ക് സെയ്യ മുഡ്യു, ആന അദെല്ല ഒരേ ആണ്ടവാന്‌ക്ക്‌ത്തെ സെയ്‌രാദ്. 6പല ദിന്‌സ്‌ക്ക് പട്ട അദിസ്യമാന കാര്യഗ സെയ്‌രാദ്‌ക്കുള്ള ഉക്കിമെ ണമാക്ക് ഇര്‌ക്ക്‌ദ്, ആനാല്‌മ് എല്ലാര്‌മ് എല്ലാദ്‌ണാമ് സെയ്യ ഉക്കിമെ കൊഡുക്ക സാമി ഒരുത്താ്ത്തെ.
7ണമ്മ എല്ലാര്‌ക്ക്‌മ് ഉവഗാരപഡ്യ ബേ്ണ്ടിത്തെ സാമിണിഗാല് ഒരൊരു ആള്‌ക്ക്‌മ് ഒരൊരു ദിന്‌സ് ബര കൊഡുത്ത് കാട്ട്‌റാദ്. 8സാമിണിഗാല് ഒരു ആള്‌ക്ക് ബുദ്ദിലിമ് അറുവിലിമ് ണായ സൊല്ല്യ ഉള്ള ബര കൊഡുക്കാ്, അദേ സാമിണിഗാല് താനെ ഇനി ഒരുത്താന്‌ക്ക് ആണ്ടവാ് ബെ്ളിപഡ്‌സി കൊഡുക്ക കാര്യഗണ ണെപ്പ്‌കെ്ഡേസ്‌റാദ്‌ക്കുള്ള ബര കൊഡുക്കാ്. 9അദേ സാമിണിഗാല് താനെ ബേ്റെ ഒരുത്താന്‌ക്ക് മിദിമീ്റിന ണമ്പിക്കെ കൊഡുക്കാ്. അദേ സാമിണിഗാല് താനെ ഇനി ഒരുത്താന്‌ക്ക് ണോയി തെ്ള്‌സ്‌റ ബര കൊഡുക്കാ്. 10ബേ്റെ ഒരുത്താന്‌ക്ക് അദിസ്യമാന കാര്യഗ സെയ്യുള്ള ബര കൊഡുക്കാ്. പിന്നെ ഒരുത്താന്‌ക്ക് സാമി സൊല്ലുറാദ്‌ണ ണേരെ കേ്ട്ട് സൊല്ലുറ ബര കൊഡുക്കാ്. ബേ്റെ ഒരുത്താന്‌ക്ക് സാമിണിഗാല് സൊന്നാദൊ അല്ലാത്ത ണിഗാല് സൊന്നാദൊ എന്ത് ണെപ്പ്‌കെ്ഡേസ്‌റ ബര കൊഡുക്കാ്. ബേ്റെ ഒരുത്താന്‌ക്ക് സാമിണിഗാല് സാമിലിര്‌ന്ത്‌ത്തെ ബരാദ അല്ലഗ എന്ത് ണെപ്പ്‌കെ്ഡേസ്‌റാദ്‌ക്കുള്ള ബര കൊഡുക്കാ്. ഇനി ഒരുത്താന്‌ക്ക് പല ദിന്‌സ് ണായഗ സൊല്ലുറാദ്‌ക്കുള്ള ബര കൊഡുക്കാ്. ബേ്റെ ഒരുത്താന്‌ക്ക് അയ്യി ണായാത്തിലി സൊല്ലുറ പൊറുള് എന്തായെന്റ് പുരുപ്പാക്കി കൊഡുക്ക്യ ഉള്ള ബര കൊഡുക്കാ്. 11ആന ഈ ബരഗെല്ല കൊഡുക്കാദ് ഒരേ സാമിണിഗാല്‌ത്തെ. അദ് തനാക്ക് പ്‌ഡിത്ത പാസെ ഒരൊരു ആള്‌ക്ക്‌മ് അദാദ് ബരഗണ പങ്കി കൊഡുക്കാ്.
ഏസുക്കാറാര് ക്‌റ്‌സ്‌ത്ത് സരിഗലാദ് മൂട്ടുമുറിഗ
12ഒരു സരിഗലാക്ക് പല മൂട്ടുമുറിഗ ഇര്‌ക്ക്‌ദ്, അയ്യി പല മൂട്ടുമുറിഗ സേന്ത്‌ത്തെ ഒരു സരിഗല ആരാദ്. അദേപാസെത്തെ ക്‌റ്‌സ്‌ത്ത് ഒരു സരിഗലാമ് ണമ്മ അയ്യി സരിഗലാദ് മൂട്ടുമുറിഗാമ്‌ത്തെ. 13പല ആള്‌ഗ ആയിര്‌ക്ക ണമ്മ എല്ലാര്‌മ് ഒരേ ണിഗാല്‌ണ കെ്ഡേസി ഒരേ കൂട്ട ആനാമ്. അയ്യി കൂട്ട എങ്കാദ് പല മൂട്ടുമുറിഗ മൂണ്ടിര്‌ക്ക ഒരു സരിഗലണ പാസെത്തെ. അച്ചെ ഒരേ ണിഗാല്‌ണ കെ്ഡേസി പെ്ളേക്ക ണമ്മ് കൂട്ടാത്തിലി എഗുദാരെന്തൊ, ഗ്‌റീക്ക്‌ക്കാറാരെന്തൊ, പണ്ണ്യക്കാറാരെന്തൊ, പണ്ണ്യക്കാറാ് അല്ലാത്തവാരെന്തൊ ഇല്ലെ.
14സരിഗല എങ്കാദ് ഒരേ മൂട്ടുമുറിഗല്ല, പല മൂട്ടുമുറിഗ സേന്തുള്ളാദ്‌ത്തെ. 15<<ണാന് കയ്യി അല്ലാത്താദ്‌ണാലെ സരിഗലാക്ക് പട്ടാദല്ല>> എന്ത് കാല് സൊല്ലുറദാനാക്കി കാല് സരിഗലാക്ക് പട്ടാദല്ല എന്ത് സൊല്ല്യ മുഡ്യുമ? 16<<ണാന് കണ്ണ് അല്ലാത്താദ്‌ണാലെ സരിഗലാക്ക് പട്ടാദല്ല>> എന്ത് കാദ് സൊല്ലുറദാനാക്കി കാദ് സരിഗലാക്ക് പട്ടാദല്ല എന്ത് സൊല്ല്യ മുഡ്യുമ? 17ണമ്മ് സരിഗല മുച്ചുഡ കണ്ണ് താനെ ആന എച്ചെ കേ്ക്ക്യ മുഡ്യു? സരിഗല മുച്ചുഡ കാദ് താനെ ആന എച്ചെ ബാഡെ എ്ഡ്‌ക്ക്യ മുഡ്യു? 18സാമി തന്ന് ആസെപഡി മൂട്ടുമുറിഗണ സരിഗലാത്തിലി അദാദ് പട്ട്‌ക്ക് ബെത്ത് മൂട്ടിര്‌ക്കാ്. 19എല്ലാമെ ഒരേ മൂട്ടുമുറി ആയെക്കിന സരിഗല ഏദിലി? 20ആന മൂട്ടുമുറിഗ പല ദിന്‌സ് ആനാല്‌മ് സരിഗല ഒന്റുത്തെ.
21കണ്ണ് കയ്യോഡെ <<ണീ എനാക്ക് തേവില്ലെ>> എന്ത്‌മ്, അദേപാസെ തലെ കാലോഡെ <<ണീ എനാക്ക് തേവില്ലെ>> എന്ത്‌മ് സൊല്ല്യ മുഡ്യമാട്ട. 22സരിഗലാത്തിലി ബില കൊറേന്താദ് എന്ത് ണെനേക്ക മൂട്ടുമുറിഗ താനെത്തെ ണമാക്ക് എത്തറാഗൊ ഉദാവ്യുള്ളാദ് ആയിര്‌ക്ക്‌ദ്. 23ബെലെ കൊറേന്താദ് എന്ത് ണെനേക്ക മൂട്ടുമുറിഗണാത്തെ ണമ്മ ണല്ല പാദ്‌ഗാപ്പോഡെ ബെത്ത് അദിഗാമ് തൊട്ട് തെനേസ്‌റാദ്. അളാഗ് കൊറേന്ത മൂട്ടുമുറിഗണാത്തെ ണമ്മ റമ്പ അളാഗ് ബീ്ത്ത്‌റാദ്. 24അളാഗിര്‌ക്ക മൂട്ടുമുറിഗണ അളാഗ് ബീ്ത്തുഡൊ എങ്ക തേവില്ലെ. മദ്‌പ്പ് കൊറേന്താദ് എന്ത് ണെനേക്ക മൂട്ടുമുറിഗാക്ക് റമ്പ മദ്‌പ്പ് കൊഡുത്ത്‌കൊണ്ട് സരിഗലാക്ക് സാമി മൂട്ടിര്‌ക്കാ്. 25അച്ചെ മൂട്ടുമുറിഗ സരിഗലാത്തിലി ഒത്തിമോഡെ ഇര്‌ന്ത് ആങ്കീങ്ക് ഒരേപാസെ ഉദാവി സെ‌യ്യ്‌ദ്. 26സരിഗലാത്തില്യ ഒരു മൂട്ടുമുറിക്ക് ബിജ എ്ഡ്‌ത്താക്കി സരിഗലാത്തിര്‌ക്ക മൂട്ടുമുറിഗാക്ക് മുച്ചുഡ ബിജ എ്ഡ്‌ക്ക്‌ദ്. സരിഗലാത്തില്യ ഒരു മൂട്ടുമുറിക്ക് മദ്‌പ്പ് കെ്ഡേത്ത ബാക്കിര്‌ക്ക എല്ല മൂട്ടുമുറിഗാമ് പിര്യപഡ്‌ദ്.
27ഇപ്പ് ണിമ്മ ക്‌റ്‌സ്‌ത്ത്‌ദ് സരിഗലാമ് ഒരൊരു ആള്‌ഗാമ് അയ്യി സരിഗലാത്തില്യ ഒരൊരു മൂട്ടുമുറിഗാമ് ആയിര്‌ക്കേര്. 28ക്‌റ്‌സ്‌ത്ത് സരിഗല ആയിര്‌ക്ക ഏസുക്കാറാര് കൂട്ടാത്തില്യ മൂട്ടുമുറിഗളായി മുദ അപ്പൊസലലണാമ് അദ്‌ക്ക് അഡി സാമിദാസ്‌ഗണാമ് അദ്‌ക്ക് അഡി ബേദ ബാത്ത്യലണാമ് പിന്നെ അദിസ്യമാന കാര്യഗ സെയ്‌രവാര്‌ഗണാമ് ണോയി തെ്ള്‌സ്യ ബര കെ്ഡേസി ഇര്‌ക്കവാര്‌ഗണാമ് ഉദാവി സെയ്യ ബര കെ്ഡേസി ഇര്‌ക്കവാര്‌ഗണാമ് ഏസുക്കാറാര് കൂട്ടണ ണഡാത്ത്‌റ ബര കെ്ഡേസി ഇര്‌ക്കവാര്‌ണാമ് പല പല ണായാത്തിലി പേസ്യ ബര കെ്ഡേസി ഇര്‌ക്കവാര്‌ണാമ് സാമി എ്ഡ്‌ത്ത് ബെത്തിര്‌ക്കാ്. 29എല്ലാര്‌മ് അപ്പൊസലലഗ? എല്ലാര്‌മ് സാമിദാസ്‌ലാഗ? എല്ലാര്‌മ് ബേദ ബാത്ത്യലാഗ? എല്ലാര്‌മ് അദിസ്യമാന കാര്യഗ സെയ്‌രവാര്‌ഗാള? 30എല്ലാര്‌മ് ണോയി തെ്ള്‌സ്യ ബര കെ്ഡേസിനവാര? എല്ലാര്‌മ് ബേ്റെബേ്റെ ണായ പേസ്യ ബര കെ്ഡേസിനവാര? എല്ലാര്‌മ് പല ണായാത്തിലി സൊല്ലുറ പൊറുള്‌ണ പുരുപ്പാക്കി തര്യ ബര കെ്ഡേസിനവാര? 31മ്‌ഗ്‌ന്ത ബരഗണ കെ്ഡേസ്യ സെരിക്ക്‌മ് ആസെപഡിരി.
ഇനി എല്ലാദ്‌ക്ക്‌മ് ബ്‌ഡ മുക്ക്യമാന ഒരു കാര്യ എന്തായെന്റ് ണാന് ണിമാക്ക് കാട്ടി തരെ.
נבחרו כעת:
1 കൊരിന്ത്യക്കാറാര് 12: സാമിദ് സേദി
הדגשה
שתפו
העתק
רוצים לשמור את ההדגשות שלכם בכל המכשירים שלכם? הירשמו או היכנסו
New Life Literature