פסוקים פופולריים מ- HINI UWASI-BIADRCIMOWA ya-sfadoci MAFIYO 6

שתפו

Pvyaqv gelvwv nhihtv nvtunahvmuku ugimrwi u drmkumi, macimi u tapvsvwelaf ewa; macimi jrivhki yolumv wiahi gah goludrgopwv gelvwv.

Tagi waciganv’ hini wvyrpvgi si wesrfeku : xvga ini wvyrpvgi wah pasiqi wesrfeiv. Dapfaga ini grsagigi ini tvsi vhdawi majrfigi.

Waciganvhi gi talapwv nelv, Tagi si wesrci-tahaku ki ta lanvwawewanwv, wiahi wvh meciyaqa, walr wvh manayaqa; walr tagi nuhgi geyrnwv, wiahi wvh betanvmaqa. Hv mvtv ini lanvwawewa vlikv inwi notv ini wihfanewa, macimi inv weyrnv notv ini betanikv?

Wakv gelv, ina mvmrtumaivna, huttvnu pihtvwi-betiga ya-drivni, macimi mahci giphvmvna gi sqrdami, mvmrtumi g’ Uhfv ga-gircsikv, macimi g’ Uhfv ga-girci si tapinvkv gah patagfadrqv gelv.

Waciganvhi nrwvhvi yomv yagi si mvmrtumaku : N’ Uhfanv ya-pivni wafapvh-kvmigigi, Hvhbalamaqvnwi gi wefowa. G’ ugimrwewa biaiv. Gi ta sitahawa wih silvwepi, brsi betiga wafapvh-kvmigigi, yone ivskv usgi-drmqa.

Melinrga tfana wrpvgi ni tvkuwhrnanv inugi grsagigi.

Macimi pvgfalatv-mvwinrga ni mosinahikv-nanv, yasi nahfrpi mahci pvgfalatv-mvwvgici ma-mosinahwhiv-magicki.

Chena tagi myrsi-vshadewa-nagi si biasinrga, wakv inv uci udwaninrga mvci wiyafv.

Xvga qahqi pvgfalatv-mvwaqa ilaneki ut vlfwrci-lvwewanwv gelvwv, k’ ufapi k’ Uhfwv nahfrpi gah pvgfalatv-mrkuwv gelvwv.

Wrpvmahku nihki wisgiluhfvki ini Ir manqvtwi, yasi bur nihki vhcigawrci, nuhgi bur kvwvsqhrwrci nihki, bur nuhgi kvwvsqigrnv si mvwvtunigawrci; macimi ufapi k’ Uhfwv u csvmvhi nihi. Hv mvtv gelvwv msi vlikv ki ta Jalamakufipwv notv nihki?

Tagi geyrwv si nhvwrci bonvhfvtvmuku pvwawa ini usgici drmqa, yrtvh moqvtaqv macimi yaqrqvlgi jrgilutvgi, macimi yrtvh grgimotagiki srbwewrci macimi gimotuwrci : wakv nhvwrci si bonvh-fvtvmuku geyrwv pvwawa betiga wafapvh-kvmigigi, yrtvh moqvtaqv macimi yaqrqvlgi bur jrgilutvgi, maci-mi yrtvh gr-gimotagiki bur srbwewrci macimi bur gimotuwrci : xvga tv vhdagi gi pvwawa nahfrpi ntvsi wa vhdawi gi tahi.

Mvtv ilani u kvtvwi mamaginilutvwvhi neswi mastalahi : xvga nr-nakuti nili wah segalamrli, macimi nili kutvkvli ut vhqalamrli; walrga wa hryetvtanrli nakuti, macimi u Ivsegrdalamrli nili kutvkvli. Mvtv ki tvh kvtvwi mamagini-lutvwrwv Mvnatu macimi pvwrwilahfi.

Wakv qahqi Mvnatu yone lvsahdota nili mskutahqvlu ini yala lskvhgi, yagi nili inugi grsagigi, macimi wrpvga ini gisifikv-nagi ipvgi-dota, hv mvtv maci laghi si vlikv ga hinv lvsaghukuwv

Wakv gelv ina gisrcigawa silvweivna, tagi welrni gi nvmvjengi wrkutafeyrga ya-silvweyrgi gi mvyrwengi : wvhsi gelv gi gisrcigawa manvwvhi gircfagi : macimi g’ Uhfv ga-girci si tapinvkv gah patagfadrqv gelv.

Gcitvwrfeku wvhsi bur pagilutv-maqa ki tapvsvwelafewanwv yalvhfvmewrci ilaneki, wvhsi nihki nvulwrqa : belaba gelvwv mvtv ki bonrnrwv taphufewa k’ Uhfwrgi ya-pitv wafapvh-kvmigigi.

Chena nuhgi ina fvfvhqi-ucigayaqa gelvwv, tagi ilafiki, brsi nvya-luhcilvwecki, mvcilabwr-pasgrki : xvga nihki u wivgrcidonrwv u ta Irbawanwv, wvhsi manvwv’ hilanihi nvukuwrci yasi fvfvhqi-ucigawrci. Tapilo gi talapwv nelv, Naiahkv nihki utfakunrwv u taphufewanwv. Wakv gelv, ina fvfvhqi-ucigaivna, lumqelu, macimi gifeqrlu; wvhsi bur gelv nawuhgi ilaneki yasi fvfvhqi-ucigaivni, g’ Uhfv wakv ga-gircsikv : macimi g’ Uhfv ga-girci si tapinvkv, gah patagfadrqv gelv.