Maleko 9
9
1Pea nee folafola e ia kia natou: “E mooni, e au tala‐atu, e i ai niihi e nonofo mai nei, e mole natou iloi te mate, kae e natou sisio mua ki te Puleaga o te Atua kua haele‐mai ia mo te mafimafi.”
Ko te fakakololia o Sesu
2I te hili o aho e ono, nee too‐age e Sesu ia Petelo, mo Sakopo pea mo Soane, o ina taki natoupe ki he koga mea lavaki, ki he mouga maoluga. Pea nee liliu ia o kehe, i onatou mua, 3pea ko ona kofu nee liliu o gigila pea nee kehe aupito tonatou hihina o mole lava ke mau he mea e ina hihina feia. 4Pea nee ha kia natou ia Elia mo Moisese, pea ko naua nee na feleu mo Sesu. 5Pea nee haga ia Petelo o lea mo ui‐age kia Sesu: “Aliki, kua lelei tatatou nonofo i heni; tou fakatuu ai ni fale e tolu, tahi moo ou, tahi moo Moisese pea tahi moo Elia.” 6He nee mole ina iloi he lea ke ina fai, koteuhi nee lahi tonatou matataku. 7Pea nee tuu he ao e fakamalui natou, pea nee logoi mai te ao he leo nee ui: “Koeni toku Alo ofaina; koutou fakalogo ki ai.” 8Pea i tanatou fakasiosio fakavilivili ki onatou tafa, nee mole natou iloi he tokotahi, ko Sesupe nee nofo mo natou.
Ko te fehui o uhiga mo Elia
9I tanatou alu‐ifo mai te mouga, nee tapu e Sesu kia natou tanatou fakamatala ki he tokotahi te mea nee natou sisio ki ai, e gatape anai moka hili te tuu‐ake mai te mate a te Foha o te tagata. 10Nee natou taofi te fakatotonu aia, kae nee natou feekeaki pe kotea te uhiga o te lea aeni: “Tuu‐ake mai te mate.” 11Pea nee natou fehui‐age kia te ia: “Kotea e lau ai e te kau sekelipa e tomua hau anai ia Elia?” 12Pea nee ina ui‐age kia natou: “Io, e tomua hau ia Elia, pea e ina fakatokatoka anai ia mea fuli; kae logope te mea aia, kotea te mea kua tohi o uhiga mo te Foha o te tagata e amanaki mamahi ia mo fehiainai? 13Pea koia, kau fakaha‐atu, ko Elia kua osi hau ia, pea nee natou gaohi ia ia, o hage ko te mea nee natou loto ki ai, o hage foki ko te mea nee kua tohi o uhiga mo ia.”
Ko te tagata kua ulu sino ki ai he laumalie kovi pea kua kau ki te mahaki moa
14I tanatou toe fakatahi mo te u tisipulo, nee natou sio ki he hahai tokolahi aupito nee nonofo takafolifoli ia natou pea mo te u sekelipa nee natou fetalanoa‐aki mo natou. 15Pea, i te sio‐age a te hahai kia Sesu nee natou punamauli pea nee felelei‐age mo alofa kia te ia. 16Pea nee ina fehui‐age kia natou: “Kotea te mea e koutou fefihi‐aki ai mo natou?” 17Ko he tahi nee nofo i te hahai, nee ina ui‐age kia te ia: “Aliki, nee au aumai kia te koe toku foha e maua ia i he laumalie noa. 18Ka ina puke ia, e ina peehi ki te kele, pea e fiho tona gutu pea e makikikiki ona nifo, pea e pakeke tona sino. Pea nee au kole ki au tisipulo ke natou kapusia, kae nee mole lavai.” 19“Tagata hee tui”, ko tona tali aia, “o au ki afea taku nofo i te lotolotoga o koutou. O au ki afea taku maua kau katakii koutou? Koutou taki‐mai ia.” 20Pea nee natou aumai ia kia te ia. Pea, i tana sio kia Sesu, ko te laumalie kovi nee ina lulu malohi aupito te tamasii, o toka ia ki lalo pea makafulifuli, kae e fihope tona gutu. 21Pea nee fehui‐age e Sesu ki tana tamai: “Pe kua fualoa feafeai te hoko ki ai o te mea aia?” “Talu mai tona kei sii”, tana tali ia, 22“pea nee putuputu tana si ia ki te afi, pe ki te vai, ke mate ai ia. Kae, kapau e ke lavai he mea, pei ke ke tokoni‐mai, uhi ko tou alo ofa kia matou.” 23“Kapau e ke lavai …,” ko te tali aia a Sesu, “Ko mea fuli e lavai ia ae e tui.” 24Pea nee kalaga atu aipe te tamai a te tamasii: “E au tui; ke ke tokoni‐mai ki taku tui vaivai.”
25Ko Sesu, i tana fofoga‐ifo ki te hahai nee felelei‐mai, nee ina fakamatakui te laumalie kovi, o ina ui‐age ki ai: “Laumalie tuli mo noa, e au fekau‐atu, mavae‐la mai ia te ia, pea aua naa ke toe hu ki ai.” 26Pea, i tana osi kalaga‐ake, pea mo tana lulu malohi ia, nee mavae mai ai, pea nee hagepe te tamasii kua mate, koia nee lau ai e te tokolahi: “Kua osi mate ia.” 27Kae, ko Sesu, i tona puke tona nima, nee ina fakatuu pea nee nofo tuupe ia. 28I tona osi hu ki fale, nee fakalavelave ki ai e ana tisipulo, i tanatou nonofo ateaina mo ia: “Kotea nee mole matou lavai tona kapusia?” 29Pea nee ina tali‐age kia natou: “Ko te faahiga aia e hoki lava tona kapu aki te faikole.”
Ko te fakaha fakakikite o te Pasio — ko tona tua lua
30I tanatou mavae mai ai, nee natou fagona i loto Kalilea, pea nee mole loto ia ke iloi e he tahi. 31He nee ina akoi ana tisipulo, pea nee ina ui‐age kia natou: “Ko te Foha o te tagata e tuku anai ia kia nima o te u tagata, pea e natou fakapogi ia pea i te osi o tona tamatei, i te hili o aho e tolu, e toe tuu‐ake ia.” 32Kae nee mole natou malama ki te lea aia, pea nee mole natou faa fehui kia te ia.
Koai e maoluga ake
33Nee natou omai ki Kafanaume, pea i tanatou nonofo i te loto fale, nee ina fehui‐age kia natou: “Kotea te mea nee koutou fetalanoaaki ai i te ala?” 34Nee mole fegufi ai natou, koteuhi nee natou fekinauaki i te ala pe koai ia natou e maoluga ake. 35Pea nee heka leva ia mo ina paui te tokohogofulu‐ma‐lua, pea nee folafola ia kia natou: “Kapau e i ai he tahi e fia mua, pea ke liliu ia ko ia e muli pea ko iape te tagata fekau a te hahai fuli.” 36Pea nee ina taki mai he kii tamasii, mo ina tuku ia i te lotolotoga o natou pea i tana osi uma ki ai, e ina fai kia natou te folafola aeni: 37“Ko ae e ina tali he tahi o te u fanau liliki, koteuhi ko toku higoa, ko aupe e ina tali; pea ko ae e ina tali ia au, e mole ko au e ina tali, kae ko ae e ina fekaui au.”
Ko te fakaaoga o te huafa o Sesu
38Nee lea e Soane kia te ia: “Aliki, nee matou sio ki he tahi e ina kapu te u temonio i tou huafa, he tahi e mole mulimuli‐mai kia tatou, pea nee matou fia taofi te mea aia, koteuhi e mole mulimuli‐mai ia.” 39Kae nee folafola ia Sesu: “Aua naa koutou taofi ia, koteuhi e mole he tahi e ina lavai te fai o he milakulo i tana paui ki toku higoa, pea lea hala atu aipe o uhiga mo au. 40Ko ae e mole fihi‐mai ia e kau ia mo tatou.
Ko te kalitate ki te kau tisipulo
41“Ko ae e ina foaki‐atu he ipu vai ke koutou inu, koteuhi e koutou kau mo Kilisito, e au tala mooni atu, e molemo hala ia mo totogi.
Ko te faifaitakiaga kovi
42“Kae, kapau e i ai he tahi e ina amanaki tuku‐age he faifaitakiaga kovi ki he tahi o te u fanau liliki e tui‐mai, e lelei‐age kia te ia ke tautau ki tona kia he maka e fakatekateka e te u asino pea ke siaki ia i te loto tai. 43Pea, kapau ko tou nima e liliu kia koe ko he mea fakatupu agahala, tuusi ia: e lelei‐age kia koe tau hu mo te nima e tahi ki te mauli hee‐gata, i tau alu mo nima e lua ki ifeli, ki te afi e mole osiosi i he aho. 45Pea, kapau ko tou vae e liliu kia koe ko he mea fakatupu agahala, tuusi ia: e lelei‐age kia koe tau hu maimoa mo te vaepe e tahi ki te mauli hee‐gata, i tou laku mo ou vae e lua ki ifeli. 47Pea kapau ko tou mata e liliu kia koe ko he mea fakatupu agahala, kapei ia: e lelei‐age kia koe tau hu mo te mata e tahi ki te Puleaga o te Atua, i tou laku mo ou mata e lua ki ifeli, 48e molemo mate ai onatou ugaga pea e mole osiosi ai e te afi. 49Koteuhi e masimai fuli ai natou aki te afi. 50Ko he mea lelei te masima, kae kapau e liliu o puli te kona o te masima, e toe fakakona aki tea? Ke koutou mau he masima ia koutou pea ke koutou mauli fimalie i toutou vahaa.”
હાલમાં પસંદ કરેલ:
Maleko 9: WLS1971
Highlight
નકલ કરો
Compare
શેર કરો
Want to have your highlights saved across all your devices? Sign up or sign in
Published by the Bible Society in New Zealand 1971
