Mâk 16
16
Ojwóbe ké Bukyû mú Jisos
(Mátyuu 28:1-8; Lûk 24:1-12; Jǒn 20:1-10)
1Ńdyí dyicí-ékwâbashi ńdyí banet-Jûs dii/shwôm, Salóme ne Méryi mú o/fím Mágádála ne Méryi mú boné-Jêmsyi ba/ré bakút ḿbé badanyîn kyinung ba/fu, mbé ba-da ng esabe ké kyikwóm-okúsí-Jisos. 2Pirípirí ké orî-dyicí, ányi ké dyicí-ékwâbashi, ké nkéré esû ee/byí, mbé ba/dim ba-wâa ké dyikun. 3Ké nkéré mbe ba-cen n ba-câ ké bukwóp, ba/kpet eraa ne barî ba/fu, yeě o/chi o-bírî bě buká ḿbú mbu ké ocím-dyikun. 4Buká ámbu bu/mû bu/rêe kanong kanong. Ne mbé ba-bírî kâng achi ba-ri ké buká ámbu boo/bírî bu/firi ké bukô. 5Ne mbé ba-nung ké dyikun, ba-ri wǎn-kyisat ányi me ké kyicê ńkyí bubwô-etyebéng ne ágbádá nyí kpárádádát ké byiko. Ne mbé ba/waa ocím ké dyishí fúú.
6Ne nyǐ o-raa ne mbé o/fu, ofong o*da běn ekédê*. Me mu n-nyît ng n/fu, ben bamu ba-kyé ng Jisos mú o/fím Názáret, mú ba/mû ba/mán ǎ ké kyikwap ńkyí badashwân onet. O*fí nyín*. Osówo oo/jwóbê ǎ ké bukyû. Kan n̂ achi ba-ri, nyín nké ba/mû ba/ren ǎ. 7Nké ca n̂g ba-da-sét bǎmgbán emen cibicibi ne Pyíta ńkyín, ba/fu, nyǐ oo/bwóp běn kashú mu o-câ ḿbú Gályílyi. Ányi nké ba/chi ba-ri ǎ, wǎ eringe nyí o/mû o/sét běn.
8Ne mbé ba-byí kâng ké dyikun, ba-zóngê e ba-câ, ké ebóng, bushî bu/mû boo/sú kámbé ké dyityém. Ba*da/sét onet nang obónge chwǒm* ké ebóng, ba/mû mbe ba-shî ng.
NKULI KYIKÛ-BǍMPÉM ḾBÉ MÂK, MÚ KPÁKPÁ
Jisos o/byí o-kâm Méryi mú o/fím Mágádála
(Mátyuu 28:9-10; Jǒn 20:11-18)
[ 9Ńdyí Jisos o/jwóbê ké bukyû, pirípirí ké dyicí-ékwâbashi, nyǐ o/byí kpá o-kâm Méryi mú o/fím Mágádála, mú nyǐ o/mû o/ró ǎ byibî-bací káchâtkányi ké byiko. 10Méryi o-dim o-da-sét banet ḿbé ba/mû ne Jisos kpákpá. Banet ámbe ba/mû mbe ba-ta ng dyikán ba-tii ng. 11Ne ké nkéré ba/jwo ńkyí Méryi o/sét kámbé o/fu, Jisos mu okpó, nyǐ o/ri ǎ ké achi, mbé ba*da/bángê ne nyǐ*.
Jisos o/byí o-kâm Bǎmgbán Emen Ashí Afee
(Lûk 24:13-35)
12Ké nkéré mú ńkyín kii/shwôm, Jisos o/byí ké dyizong-onet dyikíri o-kâm bǎmgbán emen ashí afee ké nkéré mú ba/dim ké oshê mbe ba-cen n ba-câ. 13Mbé ba-bwa esim ba-da-sét bábe ḿbé áku, nké bábe ámbe ba*da/bángê*.
Jisos o/byí o-kâm Bǎmgbán Emen Ashí Diǐkpú ne Din
(Mátyuu 28:16-20; Lûk 24:36-49; Jǒn 20:19-23; Âak 1:6-8)
14Ké nkuli kyikû, Jisos o/byí o-kâm bǎmgbán emen ashí diǐkpú ne din ké nkéré mú mbe ba-ryí i byiryíng. O-kpet ebîn kámbé, ké ebóng, ba/mû ba*fí ba-tî ng atyém ebe ne nyǐ* ne ké atyém ebe to erêe, ké ebóng, mbé ba*da/bángê ne banet ḿbé ba/ri ǎ okpó*. 15Ne o-raa ne mbé o/fu, ca n̂g kâng ké ejíí emúmú ba-sét ng kángkáng banet Bǎmpém ḿbé Banong ba-câ. 16Nang yeě nké o/bángê ne dyityém emen ne ba-kye ǎ to osoo mú Osówo, Osówo o/chi o-nyii ǎ. Nang yeě nké o*da/bángê* Osówo o/chi o-pan ǎ kyibî-mpan. 17Banet ḿbé ba/tî atyém ebe ne me ba/chi ba-kûtông ekap-busa ńnyín. Ba/chi ba-kûró byibî-bací ké dyizîn ejí. Ba/chi ba-kûraa ejá nyí banet ba*fí ba-jwo ng kyikû*. 18Chwǒm kii*ba/chi kyi-chi kámbé* â nang ba/níbî efyi ké abwô* nang ba-jwáp kyibî-bukye*. Ba/chi ba-kûtwôom banet-byirwóm abwô ké byiko, erwôm ebe e-man.
Osówo o/yip Jisos o-jâ ne Nyǐ Kyíbóng
(Lûk 24:50-53; Âak 1:9-11)
19Ké nkéré mú Jisos, Otu Kyítá oo/pem ne mbé, Osówo o/kúng ǎ o-yú o-jâ kyíbóng, o-da-kyú ké kyicê-bubwô-etyebéng emen. 20Bǎmgbán emen ba-dim ba-sét ng Bǎmpém ḿbé Banong ba-câ ké kángkáng byikit. Otu Kyítá o-chwáp kámbé, ne o/tông o/fu, bǎmpém ebe mbe ntûntû, ké ekap nyí busa nyí o/kye kámbé mbe ba-chi i.]
NKULI KYIKÛ OKÍRI MÚ BǍMPÉM ḾBÉ MÂK, MÚ KPÁKPÁ
[ 9 Ḿbé banyinyi ámbe ba-dim ba-kâm Pyíta ne bacín emen, ba-sét kámbé kaǎkím kyi-kim ne kángkáng byěm ḿbyí ba/mû ba/sét kámbé. 10 Ké nkéré ńkyín kii/shwôm, Jisos oyén o/twóm Bǎmpém ḿbé Banong ḿbé baa*tánê ne banyá* kyi-kim ne onyii mú onong mú ne banyá, ba-cen ké bubwô-bǎmgbán emen, ba-byí kángkáng byikit kyi-fím ké kyicê ńkyí esû edabyí tata kyi-ribi ké ńkyí edaríbî.]
હાલમાં પસંદ કરેલ:
Mâk 16: BKY
હાઇલાઇટ
નકલ કરો
તુલના કરો
શેર કરો
શું તમે તમારા બધા ઉપકરણો પર તમારા હાઇલાઇટ્સ સાચવવા માંગો છો? સાઇન અપ અથવા સાઇન ઇન કરો
Published by the Bible Society of Nigeria @ 1985
