Lûk 3
3
Bǎmpém ḿbé Jǒn mú o/mû o-kyâ Banet Osoo mú Osówo o/pem
(Mátyuu 3:1-12; Mâk 1:1-8; Jǒn 1:19-28)
1Kyi/mû kii/byí aje onyiryiká, ké nkéré mú onyinchéng obónge mú odabángê Tabyíryos o/mû otu mú Rûm. Ányi Póntus-Pálet o/mû otu-dyishí mú Judyâ. Otu Hérot o/mû otu mú Gályílyi. Wǎn-boné emen mú odabángê Fyílip o/mû onet-dyishí mú Eturyâ ne Torokónyítis. Lyisányas o/mû onet-dyishí mú Abyíléne. 2Ánas ne Káfas ba/mû batu-banchi kyifen-Osówo. Kyi/mû ké nkéré mún nké Osówo o/kó Jǒn mú wǎn-Zákaryâ ké kyikim-dyikán o/fu, osét kyitwóm emen. 3Ne Jǒn o-dim kâng o-cen ké esí emúmú nyí kace ńké badakó Jódan. O-sét ng banet o-câ o/fu, byiko byikpú běn ba-mîng byibî echi, n-kye běn osoo mú Osówo, ne Osówo o/chi o-pwoo běn ké byibî enen. 4Wǎ eringe nyí mkpábé mú odasét byiraa-Osówo, mú odabángê Azáya o/sáng ké nwet emen o/fu, onet obónge mu o-wonge e ké kyikim-dyikán o/fu, nap n̂g bukwóp ḿbú Otu Kyítá ba-tî ǎ. Chi n̂g kiǐfáng kyi-kyú dángdáng ńkyí odacen ké nkyí. 5Ba-man ba-fé ecing ké kángkáng ewo. Ne ba-man ba-sé kángkáng ecím-eku ne eku nyí eryên. Ba-man ba-chi akwóp nyí a*fí dángdáng* a-firi dángdáng. Ne ba-chi to biǐfáng ḿbyí byi*fí kanong* byi-firi kanong. 6Kángkáng banet ba/chi ba-ri onyii mú Osówo mu o-nyii ng banet.
7Bujê-banet chwóó ba-byí ba-kâm Jǒn ba/fu, okye kámbé osoo mú Osówo. Jǒn o-raa ne mbé o/fu, ben bamu wǎ efyi. Yeě o/sét běn o/fu, ben ba-man n efem ké busa-dyityém ḿbú Osówo, ḿbú bu-kú bu-bâ ebê. 8Chi n̂g byěm ḿbyí byidatông byi/fu, byiko bii/kpú běn ba-mîng byibî enen. *Da n̂g echi ba-kpet eraa ne barî ba/fu, be byi-chi i banet ḿbé kyikû ńkyí Ébarahâm*. Me mu n-sét ng běn n/fu, Osówo o-man n eyip byirim-aká ḿbyín o-chi kámbyí byi-firi banet ḿbé kyikû ńkyí Ébarahâm. 9Dyikye dyi/firi kyísí ńdyí badafîm byichí ké eriri ba-twóp kyísí. Kyichí nang kyirá ńkyí kyi*fí kyi-zím m byirim ḿbyí byinong* ba/chi ba-twom kánkyí ba-fé ké okwâ.
10Banet ámbe ba-bí ǎ ba/fu, kántîk kâng, be byichi nǎ.
11Nyǐ o-faa kámbé o/fu, nang yeě nké mu ne bankyû bafee, o-man o-fîm obónge o-kye onet mú nkyû o*fí ǎ nang obónge*. Nang yeě to nké mu ne byiryíng, o-man o-kyii kámbyí ne barî-banet.
12Kyicê-banet ḿbé mbe ba-koo ng akpuga-dyishí ba/bê ba/fu, mbé ba-bâ ng ekoo osoo mú Osówo. Ne mbé ba-bí ǎ ba/fu, ntánge byiraa-Osówo, be byichi nǎ.
13Nyǐ o-sét kámbé o/fu, *da n̂g ekûkoo akpuga-dyishí a-shwôm ocím mú kyije kyi/fu*.
14Kyicê-basúja ba-bí ǎ to ba/fu, aa be kâng. Be byichi nǎ.
Nyǐ o-raa ne mbé o/fu, *da n̂g ebam akpuga nyí onet nang obónge ké busa ba-koo* ba-bât to onet nang chwǒm ńkyí kyi*fí ké kafâ*. *Da n̂g enabe kyitông ké chwǒm kyikíri* kyi-cibi ne akpuga-otukáku nyí mbe ba-kyâ běn*.
15Okabe mú banet o-kpet eyángê o-câ. Ba-kpet ebwóp ne dyityém kyi-kim ne Jǒn. Ba-kpet ekabe ba/fu, katô nyǐ nké mu onet mú Osówo o/kúng ǎ butu. 16Jǒn kâng o-sét kámbé ashí amúmú o/fu, me mu n-yip ng omu ne n-kye běn osoo mú Osówo. Nké onet mú o/rêe o-shwôm mě mu o-bâ. Me n*da/kwárê mú nda ǎ epii nang abe emen*. Nyǐ nké o/chi o-yip Busun-Osówo ne okwâ o-kye běn osoo mú Osówo. 17Nyǐ oo/kám kiincage-byěm emen ké abwô, ńkyí odacage kángkáng esang-byichí. O-cá esang nyí enong enong o-bwât o-tî. Nké o/chi o-yip boǒmpwǎt-esang o-shí kámbú ké okwâ mú oo*ríbî ne banyá*.
18Ké azong-akwóp chwóó chwóó, Jǒn o/tírîng banet o/fu, bajwo ǎ ńdyí mu o-sét ng kámbé Bǎmpém ḿbé Banong. 19Nké Jǒn o/bîn Otu Hérot. Ké nǎ, Otu Hérot o/mû o/bé onyinyi obónge mú odabángê Heródyas, mú o/mû onyi mú wǎn-boné emen. Otu Hérot to o/mû oo/chi byibî-byěm byikíri chwóó. 20Otu Hérot kâng o-bwa o-chi kyibî-chwǒm ńkyí kyi/bwa kyi-bên kyi-shwôm, ńkyí o/fé Jǒn ké mgbokobá.
Jǒn o/kye Jisos Osoo mú Osówo
(Mátyuu 3:13-17; Mâk 1:9-11)
21Ké nkéré mú Jǒn oo/kye kángkáng banet osoo mú Osówo, o-kye to Jisos osoo mú Osówo. Ké nkéré mú Jisos mu o-fâ nshwam, bubóng bu-bâa. 22Ne Busun-Osówo bu-shû éné wǎ karúú, bu-bâ ǎ ké byiko. Ejá e-fím kyíbóng e-raa e/fu, wo a-chi i Wǎn ejí mú dyityém. Dyityém ejí ndyi dyi-nyîn n mě kanong kanong ne wo.
Kyikû-Banet ńkyí Jisos
(Mátyuu 1:1-17)
23Ké nkéré Jisos o/kpet bǎmkpóngé emen echi, nyǐ o/mû oo/rí chwǒm wǎ aje bujam esim diǐkpú. Banet ba/mû ba-kabe ng ba/fu, nyǐ o/mû wǎn mú Josêf, mú o/mû wǎn mú Helyí. 24Helyí o/mû wǎn mú Mátat. Mátat o/mû wǎn mú Lyíva. Lyíva o/mû wǎn mú Mékyi. Mékyi o/mû wǎn mú Janyâ. Janyâ o/mû wǎn mú Josêf. 25Josêf o/mû wǎn mú Matatáyas. Matatáyas o/mû wǎn mú Émos. Émos o/mû wǎn mú Náhum. Náhum o/mû wǎn mú Éselyi. Éselyi o/mû wǎn mú Nagyâ. 26Nagyâ o/mû wǎn mú Mât. Mât o/mû wǎn mú Matatáyas. Matatáyas o/mû wǎn mú Sémin. Sémin o/mû wǎn mú Jósek. Jósek o/mû wǎn mú Jóda. 27Jóda o/mû wǎn mú Jowánan. Jowánan o/mû wǎn mú Résa. Résa o/mû wǎn mú Zerubábel. Zerubábel o/mû wǎn mú Shátyel. Shátyel o/mû wǎn mú Néryi. 28Néryi o/mû wǎn mú Mékyi. Mékyi o/mû wǎn mú Ádyi. Ádyi o/mû wǎn mú Kósam. Kósam o/mû wǎn mú Emádam. Emádam o/mû wǎn mú Êe. 29Êe o/mû wǎn mú Jóshwa. Jóshwa o/mû wǎn mú Elyěze. Elyěze o/mû wǎn mú Jórim. Jórim o/mû wǎn mú Mátat. Mátat o/mû wǎn mú Lyíva. 30Lyíva o/mû wǎn mú Syímyon. Syímyon o/mû wǎn mú Júda. Júda o/mû wǎn mú Josêf. Josêf o/mû wǎn mú Jónam. Jónam o/mû wǎn mú Elyǎkim. 31Elyǎkim o/mû wǎn mú Mélya. Mélya o/mû wǎn mú Ména. Ména o/mû wǎn mú Matatâ. Matatâ o/mû wǎn mú Nátan. Nátan o/mû wǎn mú Otu Dívit. 32Otu Dívit o/mû wǎn mú Jésyi. Jésyi o/mû wǎn mú Obêt. Obêt o/mû wǎn mú Bówaz. Bówaz o/mû wǎn mú Sálamon. Sálamon o/mû wǎn mú Náshwon. 33Náshwon o/mû wǎn mú Amínádap. Amínádap o/mû wǎn mú Ádamin. Ádamin o/mû wǎn mú Anyí. Anyí o/mû wǎn mú Hézoron. Hézoron o/mû wǎn mú Pérez. 34Pérez o/mû wǎn mú Júda. Júda o/mû wǎn mú Jekôp. Jekôp o/mû wǎn mú Ázik. Ázik o/mû wǎn mú Ébarahâm. Ébarahâm o/mû wǎn mú Téra. Téra o/mû wǎn mú Náho. 35Náho o/mû wǎn mú Séruk. Séruk o/mû wǎn mú Rû. Rû o/mû wǎn mú Pélek. Pélek o/mû wǎn mú Éba. Éba o/mû wǎn mú Shéla. 36Shéla o/mû wǎn mú Kánan. Kánan o/mû wǎn mú Áfasat. Áfasat o/mû wǎn mú Shêm. Shêm o/mû wǎn mú Núwa. Núwa o/mû wǎn mú Límek. 37Límek o/mû wǎn mú Metúséla. Metúséla o/mû wǎn mú Énok. Énok o/mû wǎn mú Járet. Járet o/mû wǎn mú Mahalályi. Mahalályi o/mû wǎn mú Kénan. 38Kénan o/mû wǎn mú Énoshi. Énoshi o/mû wǎn mú Sêt. Sêt o/mû wǎn mú Ádam. Ádam o/mû wǎn mú Osówo.
હાલમાં પસંદ કરેલ:
Lûk 3: BKY
હાઇલાઇટ
નકલ કરો
તુલના કરો
શેર કરો
શું તમે તમારા બધા ઉપકરણો પર તમારા હાઇલાઇટ્સ સાચવવા માંગો છો? સાઇન અપ અથવા સાઇન ઇન કરો
Published by the Bible Society of Nigeria @ 1985
