Roma 15
15
Itamunoyete Aati Hullomuk, Obiaŋara Ahuattek Hatai
1Ijiara hohoi hullo ogol eruk, eluak hullo obeŋ eruk hosi ogol; oŋida isi odihuni eruk hosi. Hèlaha etamunoyo ahuattek. 2Ati, hétamunoyete 'daŋ eruhok hullomuk iyaŋuniere jihosi ayiji, oŋida eruk hosi ogol. 3#Afureta 69:9Nyio, obeŋ nyia Kristo itamunoyo ahuan honyi; ati ihuo ojio Abuk Hollum jio, “Ewwok ni emoriti hunno osehini aati jihatai.” 4Erre 'daŋ hunne igioroni Ibuk Hollum, igioroni nyia isi ettiyenita hohoi jio, oŋida bati ewon iko eyihina ta adihuna iko agolon tajia enne iyaŋunie egierita hutto Buk Hollum hunia. 5Ijiara Hollum, elle iyaŋuno 'to adihan iko agolon tajia, isiarak jihatai amanya arabotie onno oyyu 'to te ejifatio hatai ehanita Kristo Yesu; 6oŋida bati itai 'daŋ itahabuyete Hollum, Monye Yesu Kristo, Lamonye hohoi te etuk abotie!
Iramani Asayyo Ayijok jio Alufajak
7Ihuo ifuotu Kristo itai, ifuotuttati ahuattek hatai ta namuno, itakuaciere Hollum. 8Eramak ni itai jio, ara nyia Kristo ahegiamani jio Yudei itahutaniere nelahode Hollum, itasiruniere ecoriti hunyia ocorok Hollum jio hohonyiok hosi. 9Ihan nyia inyi ihuo nyia jio, oŋida bati Alufajak itahabuye Hollum ta awanan honyi iko amehino. Ihuo ojio Abuk Hollum jio,
“Tania, etahabuyo adi ni iyye ihiji Lufajak,
edolo adi ni etahabuta jihoi.”
10Inyiak buo fe inyi jiaran jio,
“Lufajak, omunoti iko aati Hollum!”
11Idas fe inyi ajiaran jio,
“Alufajak 'daŋ, itahabuyete Lamonye.
Ijiara aati 'daŋ itahabuye inyi!”
12Buo fe Isaya ojio jio,
“odetuno adi atulo to woyo Yese.
Ottu adi inyi ilohittok jio Alufajak.
Iyihini adi isi jihonyi.”
13Ijiara Hollum, elle iyaŋuno 'to eyihina, itufutak jihatai namuno 'daŋ iko nelik tajia te eruk hatai jihonyi; oŋida eyihina hatai obobolororo ta naduaran ono Loholio Olibo.
Eram enne Igioroniere Paulo Sar Sar
14Illarak iko haniyarak hoŋ: Amijak ni, ta ahuan hoŋ, jiojio, ifut ayiji jihatai, buo fe iwanata iko ofioro 'daŋ. Iremehina itai ittiyenio ahuattek hatai. 15Ati te eram omuk ekenita hunna awak ni oŋida igiluttati, egiorok ni jihatai sar sar. Nyio, etasiru ani Hollum amiji 16irari ahegiamani Kristo Yesu, igiamari jio Alufajak. Te ettittoyo hoŋ Asayyo Ayijok hunno ofuonni 'to jio Hollum, egiama ni ihuo ehumani jiojio oŋida bati Alufajak arai ihuo esiorita hunne iruk Hollum, hunne italibo Loholio Olibo. 17Te enoso iko Kristo Yesu, aremik ni itadara te egiama hoŋ jio Hollum. 18Abeŋ ni ajio ekiana obo ariŋ, arari fe erre hunyia ihan Kristo toni, te eyaŋuno hoŋ Alufajak ibaŋari Hollum, te ekenita iko te ehanita hoŋ; 19ta agolon ono eduariti iko etamijanita buo aduaran ono Loholio Olibo. Tania, atuhok ni ettittoyo 'daŋ ono Asayyo Ayijok huno Kristo to ninyia alari ni, to Yerusalem many iŋacio Illirikum. 20Oŋitek 'daŋ awak atua hoŋ ettittoyo Sayyo Ayijok jio amasik hunno hobeŋi 'to omijani Kristo, nyio, ŋadi ani ara ihuo atulo ollo oduho 'to jio etiwoji haji enne ehuhum obo atulo hama. 21Ihuo ojio Abuk Hollum jio:
“Hia, hullo hobeŋi iramani eram honyi jihosi, igonyuni adi isi,
buo fe hia, hullo hobeŋi 'to itayiruni, omijani adi isi.”
Ihuhuma Paulo Ilari Roma
22 #
Rom 1:13
Eram ania nyia itihotio nani enyiahita arriai ittuniere jihatai. 23Aŋasi arriai, awak nyia ni leten imijuno itai, ati ihuania, atuhok ni egiama jio aŋacio huna; 24egigilo ni alo 'tadi buo ni ittuna ihuania. Attu adi ni imijaru itai alla alo ni Spein, buo itai ifuatta iluak ani ilari diya buo ni abalu obo kai ikatai. 25#1Kor 16:1-4Ihuania, halo ni Yerusalem. Eyaru ni aluahio jio aati Hollum hullo owoni 'to diya. 26Nyio, ta awahan ottonosi, isiori aati Klesia hutto Masedonia iko hutto Akaya omuk esiorita iluahiere alociaŋak hullo owoni 'to ihiji waati Hollum hutto Yerusalem. 27#1Kor 9:11Isi nyia, ta ahuattek hosi, awahi ihan ihuo nyia. Buo elle ekiana ahode hode, ijiara isi luŋa oluahi isi; nyio, ifuotuni buo fe Alufajak emuniti huno oloholio hunyia ifuotuni Yudei. Ijiara luŋa isi oluahi Yudei ta asaŋ emanyiti. 28Alla atuhok ni egiama ana, buo fe esiarak jihosi arobiyaa huna 'daŋ hunyia iddudduhuni tesi, attu adi ni imijaru itai alla alo ni Spein talia. 29Amijak ni jio, alla attu ni jihatai, eyaŋuno adi ni jihatai emuniti 'daŋ huno Kristo.
30Attana ni itai illarak iko haniyarak hoŋ, to Yesu Kristo, Lamonye hohoi iko ta abuaran taji enne isiarak Loholio; hamojoti 'daŋ onno ogol jio Hollum toni. 31Omojoti jio, ijiara italuahuni nani ta has waati Yudea hullo obeŋi 'to iruhi jio Yesu Kristo; buo fe jio, ijiara aati Hollum hutto Yerusalem ifuotuni egiama hoŋ, ta amuno. 32Tania, alla ara awahan Hollum, attu adi ni jihatai ta namuno onno obolo 'to, iyiriari onno oyyu ikatai arabotie. 33Ijiara Hollum, elle iyaŋuno 'to nelik tajia, hatawana ikatai 'daŋ. Amen!
હાલમાં પસંદ કરેલ:
Roma 15: EA2003
Highlight
નકલ કરો
Compare
શેર કરો
Want to have your highlights saved across all your devices? Sign up or sign in
© The Bible Society in South Sudan 2003
