Ehanita Lefahat 7

Ekiana ono Stifen

1Attati ehumani elle ittokon ifiyo Stifen jio, “Arai soho erre hunia ahode?” 2Itarraŋ nyia Stifen jiojio, “Itai illarak hoŋ iko monyie hoŋ, itaniŋiete jihoŋ! Ninyia hobeŋ hohonyi hohoi Abramo iwot Haran, oleyehino nyia Hollum lakuatani jihonyi buo inyi howon ifau Mesopotamia, 3ette jiaran jihonyi, ‘Idiaharu aati hutta haŋ hoi iko afau hatai. Ilo jio afau anna alo ni itahutana iyye.’ 4Ania, ette inyi idioto ta fau hosi, ette leten imanya Haran. Ninyia aye monye Abramo, ette Hollum ifahuna Abramo teya many jio afau enne imanyatti itai ania. 5Ati obeŋ nyia Hollum isio jihonyi obo amaji ahononyi ara duadi bu ollo odiha. Ati ocorok nyia Hollum jio, esio adi inyi afau ana jio Abramo iko lonyirok honyi, duadi bu obeŋ nyia inyi hito. 6Erre hunia hunyia ikiana Hollum jihonyi jio, ‘Ofuoi adi aati hutto woyo honyi imanya jio obo amiji waati onno ofuarik isi irari apiti. Ittigemie adi isi diya aŋasi esiha aŋuan (400). 7Ati ojio nyia buo fe Hollum jio aŋot adi ni eram waati hullo ofuarik isi ipitori, buo teya ofuonni adi aati hutto woyo hoi addi jio afau nyia, ette imojo jihoŋ jio amaji ania.’ 8Attati Hollum isiarana jio Abramo ehumi ono aboso irari etamijani ono ecorit ania. Ania, ninyia ara Isako lonyi Abramo esabit abotie, ette Abramo ibos inyi; ihuo nyia buo fe ette Isako ibos lonyi honyi Yakobo; buo fe Yakobo ette ibos lonyirok honyi, hohonyiok hohoi hula 'tomon harrihai.

9“Ati ahaini nyia hohonyiok hohoi hulia jio illasi Yosefu, ette isi itinyiaŋara inyi jio aati Masir. Ati odulo nyia Hollum mijio inyi, 10ette italuahuna inyi jio ettigemita honyi 'daŋ. Buo ninyia lattu inyi ihosiere Faro, hobu Masir, ette Hollum isiarana jihonyi ayiji iko elofioro, ania ihananiere Faro inyi amondir olo afau Masir buo fe ahamijani hirre hutta haŋ hobu 'daŋ. 11Attati ahure ittuna ifau Masir iko Kana 'daŋ, ette iyaŋuno ettigemio onno obolo. Tania, obiaŋarak nyia aŋiyo hohonyiok hohoi. 12Ninyia itaniŋu Yakobo jio owoni emma ifau Masir, ette inyi ifahina lonyirok honyi, hohonyiok hohoi, tetteri idahit hosi diya. 13Attati jio edahit etarrihi, ette Yosefu itahutana ahuan honyi jio illarak honyi, ania omijaniere Faro aati hutta haŋ ba Yosefu. 14Ania, ette Yosefu itasaruna monyonyi Yakobo iko aati hutta haŋ hosi 'daŋ oŋida ofuonni Masir. Arai nyia isi aati atomuana hattarik homiyet. 15Attati Yakobo leten Masir iko lonyirok honyi 'daŋ, ette imanya diya many oyerik. 16Inyiaharai nyia ahuattek hosi Sekem, ette inuhana isi ilume ninyia inyiaŋu Abramo jio lonyirok Hamor ta arobiyaa.

17“Ninyia iliaha noloŋ enne itasiruniere Hollum ecorit honyi jio Abramo, aluluajunie nyia bebe aati hohoi hunyia owoni 'to ifau Masir. 18Attati lobo oobu ollo otimo Yosefu, ilohobu ifau Masir, 19ette inyob hohonyiok hohoi, ette ittigemio isi, ette iramana isi ta ajore ijiara idehini olodolioo hosi illet oŋida bati oye. 20Jio oŋitek hunia, isiuni nyia Mose, leto alalaman. Itadasie nyia inyi ayafajin hunihoi ihaŋ monyonyi. 21Buo ninyia ibirori isi inyi ta haŋ allet, ette ŋarri hobu Masir ilatuna inyi aholonyi, ette ittoŋotio inyi alonyi honyi. 22Ittiyenie nyia Mose olofioro 'daŋ huno aati Masir, ette inyi golon te ekenita iko te ehanita honyi.

23“Ninyia arai aŋasi Mose atomuana aŋuan, odioto nyia to hou honyi ilari igonyuniere erre hunne ihanie jio aati hosi, Israele. 24Igonyu nyia inyi lobo olo Masir ihanio onno orroho jio lobo olo Israele, ania, ette inyi iluak olosi, ette inienuna olosi ta attohoro honyi olo Masir alia. 25(Igigilo nyia Mose jio oremehini adi aati hosi Israele mijana jio tenyi, italuahu adi Hollum isi, ati otimoi nyia isi.) 26Jio ebotie holoŋ, onyurak nyia inyi omuk aati Israele arrihai, aŋalafai, ette inyi iwahan itimuarana isi, ette jiaran jihosi, ‘Hulo, nyio iŋalafati itai? Irata itai ellarak.’ 27Attati linyia ihanio 'to onno orroho jio ollobo isulara Mose addi, ette jiaran, ‘Ŋai ihanak iyye elettok buo fe ahaŋotoni hiram hohoi? 28Iwak iyye ittohoro ani ihuo oŋole ittohori iyye olo Masir?’ 29Ninyia itaniŋu Mose ekiana ania, ette inyi ifuhororo, ette manya ifau Midian. Diya, isihinierek jihonyi laduri arrihai.

30“Ihalu aŋasi atomuana aŋuan oleyehino nyia ajilo jio Mose ollo owulo ahima igurumari ihidiofo etteger doŋe Sinai. 31Ninyia igonyu Mose ariŋ ania, ette inyi illilliha, ette ihum ihutonia igonyuniere onno oyyu. Ati itayiru nyia inyi ekiana ono Lamonye onno ojio, 32‘Ani Hollum olo hohonyiok hoi, Hollum olo Abramo, olo Isako, iko olo Yakobo.’ Tania, inef nyia abaŋi Mose ette inyi ikikiro, ette biaŋan inyiak irinyana amijio adiya. 33Attati Lamonye iramana inyi jio, ‘Ohou addi amuha to hejek hoi, nyio, iwotia iyye imaji elibo. 34Egonyu ni ettigemio ono aati hoŋ ifau Masir. Etaniŋu ni etudita hosi, inyi anna attuniere ni ihouniere isi. Ihuania, waŋ, efak ni iyye ifau Masir.’

35“Mose alia linyia ihari aati Israele. Ette isi ifiyo inyi jiojio, ‘Ŋai ihanak iyye elettok buo fe ahaŋotoni hiram hohoi?’ Ifahu nyia Hollum inyi irari elettok buo fe a hetaluahani waati Israele ta aluahio ono ajilo linyia oleyehino 'to jihonyi totua hidiofo ahima onno owulo igurumari. 36Iyaŋuno nyia Mose isi addi ta fau Masir. Ihanio nyia inyi eduariti iko ellillihita jio afau ania iko ihari Mile buo fe ihidiofo aŋasi atomuana aŋuan. 37Mose linyia ojio 'to jio aati Israele jio, ‘Ifahu adi Hollum jihatai ekianani honyi, ihuo enne ifahuniere inyi nani. Odetuno adi inyi tehiji hatai’#7:37 ihuo enne ifahuniere inyi nani : kuyya ihuo ani.. 38Mose buo fe alia linyia owon 'to jio eluluŋ Israele ninyia to hidiofo. Owon nyia inyi diya iko hohonyiok hohoi buo ajilo linyia ikiana 'to jihonyi to doŋe Sinai. Ifuotu nyia inyi jio Hollum asayyo hunne iyaŋunie 'to nesu, isiaraniere jihohoi.

39“Ati obeŋi nyia hohonyiok hohoi oniŋie eram honyi. Ittaŋari nyia isi inyi addi, ette igigilo jio ecaharu duo fe isi Masir. 40Ania, ette isi iramana Arone jiojio, ‘Oyyehi jihohoi omuk arrijiorita jiohin oŋida orihotie hohoi. Ebeŋ hohoi emijak anyio orroho jio Mose, atulo linyia iyaŋuno 'to hohoi ta fau Masir.’ 41Tonyia, oyyeuni nyia isi arrijiori tawwo, ette isiarana ehumita jihonyi, ette ihanana agari itahabuyere ariŋ enne ihuhumuni isi ta ahas hosi. 42Ania, ette Hollum iyitonia isi oruoŋ, ette ibusana isi itahabuye elelefi huttedou ihuo igioroni ibuk ono ekianak honyi jio:

‘Itai aati Israele! Obiaŋara nyia jihoŋ

icuhonia itai aciaŋi buo fe isiarana ehumita

aŋasi atomuana aŋuan ihidiofo.

43Ikafatti nyia itai aaji musiama ono ajiok alla anya 'to Molek,

iko arrijiori ono Refan, ajiok hatai anna ara 'to elelef.

Arrijiorita hunia hunyia ihuhumuna itai itahabuyere.

Tania, aŋatak adi ni anyarai itai agalarai Babilonia.’

44“Owoni nyia hohonyiok hohoi ihidiofo iko aaji musiama enne itahutak 'to jio owon Hollum ikosi. Ihuhumuni nyia aaji ania ihuo iramak nyia Hollum Mose ihuhumiere inyi; ette Mose ihuhumuna inyi ihuo arrijiori ninyia itahutani jihonyi. 45Ojio buo fe teya, ette hohonyiok hohoi kabuna aaji ania jio monyie hosi, ette iyaru inyi ikosi, to ninyia ofuarik isi iko Yosua ette ihoruna afau waati hunyia itattur Hollum. Owon nyia aaji ania ikosi many jio oŋitek hunyia tono Dafide. 46Omuno nyia Hollum Dafide bebe, buo Dafide ette ifiyo Hollum oŋida aŋatak inyi iduhoniere aaji enne itahabuyerek Hollum olo Yakobo#7:46 Hollum olo Yakobo : igioroni omuk egierita jio, Hollum olo Israele.. 47Ati, Solomon nyia ottu duhonia Hollum aaji.

48“Ati obeŋ Hollum Elle Ilomohi 'to 'daŋ, amanya ihasik hunno oduhi ta ahas waati, ihuo ojio ekianani honyi jio:

49‘Ojio Lamonye, ara edou aseger ilohittok hoŋ

buo afau ara ebalori hejek hoŋ.

Anyio haji 'tadi enne iduhonia itai jihoŋ?

Anani maji 'tadi anna ayiriari ni?

50Obiaŋara nyia soho aani hoŋ ihuhumu erre hunia 'daŋ?’ ”

51Attati Stifen leten ahosiere, ette jiaran, “Aii, ogoli hossi! Arai atajia hatai iko ayyaha 'daŋ ihuo huno aati hunyia ihari 'to ekiana Hollum! Irata itai ihuo hohonyiok hatai: iduloro itai ihara Loholio Olibo ihuo isi! 52Alali ekianani Hollum linyia obeŋi hohonyiok hatai ittigemi? Ottohori nyia isi leyak sayyo hulo Hollum hinyia iramani 'to jihosi berien attuna ono Egiamani honyi Labisani. Ihuania, itinyiaŋara itai inyi, ittata ittohoro. 53Itai ifuotuna efahita Hollum hunyia ifuotoni ajilohien jihatai, ati ibiaŋata itai iniŋiete efahita hunia.”

Eruoŋio ono Stifen

54Ninyia itaniŋuni aati Lokikoi Yudei ekenita Stifen hunia, ette isi ijoria bebe, ette omomite hosi imur eram honyi. 55Ati ifut nyia Loholio Olibo jio Stifen, ette inyi ibonno ahide dou, ette igonyuna akuatan Hollum buo Yesu owotia iŋati iŋet Hollum; 56ette jiaran, “Imijiete! Egonyu ni edou aŋaa buo Lonyi Tulo owotia iŋati iŋet Hollum!”

57Attati isi ituruhonia woŋ woŋ, ette ittuk ayyaha hosi, ette iburaru ajihonyi 'daŋ arabotie, 58ette ipihoro inyi addi totua bore gala, ette iruoŋio inyi ta amoruoi. Idiaharai nyia asuuti aboŋojin hosi jio lobo anyarhaluti afure honyi Saul oŋida irririyo. 59Odulori nyia isi eruoŋio Stifen, buo inyi omojo jio Lamonye jiojio, “Yesu, Lamonye, ifuotu oloholio hoŋ!” 60Origoŋo nyia inyi, ette iluaha woŋ woŋ jiojio, “Lamonye, hègottiere eyyata hosi hunia!” Iken nyia inyi ihuo nyia, ette initonia.

હાલમાં પસંદ કરેલ:

Ehanita Lefahat 7: EA2003

Highlight

નકલ કરો

Compare

શેર કરો