Ehanita Lefahat 5

Ananiya iko Safira

1Ati owon nyia obo latulo, alla anya Ananiya iko ŋoruoi honyi Safira. Itinyiaŋari nyia isi obo amana hosi. 2Ati omuanak nyia Ananiya omuk agurusi, buo ette isiarana hunnomuk jio lefahat. Iruk nyia ŋoruoi honyi eram ania. 3Attati Petro ifiyo inyi jiojio, “Ananiya, nyio ibusak iyye Sittan ojiŋak itaji hoi, igiosomori jio Loholio Olibo itte imuanana agurusi hunnomuk hoduo itinyiaŋaniere iyye amana hoi? 4Neduo hèbeŋ iyye itinyiaŋak inyi, obeŋ duo soho inyi ara ahonohoi? Buo agurusi hoduo itinyiaŋaniere iyye, obeŋi duo arai 'daŋ ahunohoi? Nyioti odioto inyi ihou hoi ihaniere ihuania? Ibeŋ iyye igesem jio aati, igesem iyye luŋa jio Hollum.” 5Ninyia itaniŋu Ananiya ekenita hunia, ette inyi ikuahino ifau, ette iye. Teya, inef nyia abaŋi onno obolo bebe aati 'daŋ hunyia itaniŋuni 'to eram ania. 6Buo monyomiji ette idioto, ette ibubunana ahuan honyi, ette ikafaru inyi addi, ette inuhana inyi.

7Ihalu asahien hunihoi, ette ŋoruoi honyi ifanyan onno otimo erre hoduo iduoŋi 'to. 8Buo Petro ette ifiyo inyi jiojio, “Iramak ani, isi agurusi hua huna 'daŋ hoduo itinyiaŋaniette itai amana hatai?” Itarraŋ inyi ojio, “Aafe, isi hunia 'daŋ.”

9Ania, ette Petro jiaran jihonyi, “Nyioti odioto inyi to hossi hatai jio iremehina tai ikemio Oloholio olo Lamonye? Imija, aati anuhak habi hoi huttekat hulia! Akafarai adi buo fe isi iyye allet.” 10Teya teya, ette inyi kuahino ihosiere Petro, ette iye. Ania, ette monyomiji ifuanna inyurana inyi aye, ette ikafaru inyi allet, ette inuhana iger habi honyi. 11Attati abaŋi onno obolo bebe inef eluluŋ heruhok 'daŋ iko aati 'daŋ hunyia itaniŋuni 'to erre hunia.

Eduariti iko Ellillihita

12Ihanie nyia lefahat eduariti iko ellillihita arriai ihiji waati. Ottubanie nyia eruhok 'daŋ arabotie idafata Solomon. 13Obeŋ nyia obo jio aati hutto let orinyak enosonio iko eluluŋ heruhok, ara duadi bu itahuye aati ayiji heruhok. 14Ati inyiahi nyia ifonihina aati arriai jio eluluŋ heruhok agalik ottoloŋi; eluluŋ liawa iko ono aŋoruo hunyia iruhi 'to jio Lamonye. 15Te ehanio ono lefahat eduariti, akafuttai nyia aati aŋuak hosi, ette itaferihina iŋerefi iko ibirisi iger hikoi jio oŋida bati abali Petro ottir lomuk hulo laŋuak hulia alla attu inyi tolia. 16Ofuonni nyia eluluŋi waati arriai to borejin gala hutteger Yerusalem. Iyaŋunie nyia isi aati aŋuak iko aati miniaŋa, buo ette itaŋida isi 'daŋ.

Ittigemie Lefahat

17Ati ahainori nyia ehumani elle ittokon bebe lefahat, inyi iko lejifak honyi hunyia arai 'to te eluluŋ Sadusei. Ania, ette isi idioto, 18ette inefuna lefahat, ette ifitana isi ibabus waati asai. 19Ati nyia arue, ottu nyia ajilo olo Lamonye, ette iŋa ekatin babus, ette irihuna isi allet, ette jiaran jihosi, 20“Ifuatta ihaji emojit enne ittokon, iramana jio aati eram ono namanya aŋejuk ana.” 21Iruhi nyia lefahat eram ono ajilo ania, ette iwanyihina nyia motie hanyik berien itua Haji emojit enne ittokon, ette ittiyenio aati.

Attati Lehumani elle ittokon iko lejifak honyi iloŋuna lahou Yudei 'daŋ jio ewwaha enne ittok, ono Lokikoi Yudei. Ette ifahina eram ibabus oŋida iyaŋunie lefahat ihosiere hosi. 22Ati ninyia lafanyi oseŋer hia ibabus, obeŋi nyia isi onyurani lefahat itua babus, ette isi icohuno ilokikoi Yudei, ette iramana jiojio, 23“Erumak hohoi ababus ihiana rid rid, buo fe lerririak irririai ekatin. Buo neduo eŋa hohoi ababus, ebeŋ hohoi enyurak obo atulo diya.” 24Ninyia itaniŋuni ehumak elettaha iko ajafit herririak Haji Emojit enne ittokon asayyo hunia, ette ossi hosi iŋala, ette igigilo jio iduoŋ duo 'tadi anyio jio lefahat hulia. 25Attati obo latulo ittuna, ette iramana isi jio, “Itayiriete dini! Hoŋole waati ifitana itai ibabus hulle ittiyenie aati ihuania itua Haji Emojit enne ittokon!” 26Ania, attati ajafit lia ifuatan iko oseŋer honyi, ette iyaŋuno lefahat hulia. Ati obeŋi nyia isi iyaŋunie isi ta agolon, nyio, abaŋi nyia isi jio ŋadi aati iruoŋi isi.

27Ninyia iyaŋunie isi lefahat, ette itawojihina ihosiere lokikoi Yudei, attati ehumani elle ittokon jiaran jihosi, 28#Mat 27:25“Ehum nyia hohoi ittittohina itai jio hèttiyeniete ta afure atulo alia! Ati itufutana itai Yerusalem 'daŋ te ettiyenita hatai, buo fe iwahata irosonia naye ono latulo alia jihohoi.”

29Ati itarraŋi nyia Petro iko lefahat hullomuk ojio, “Ijiara luŋa eniŋio eram Hollum, buo obiaŋara eram waati. 30Hollum olo hohonyiok hohoi nyia itubuhu Yesu toye ninyia ittohoro itai inyi, te esihonia hatai inyi likruce. 31Itubuhu nyia Hollum inyi, ette ititoŋonia iŋati iŋet honyi, irari ellettok iko ahetalahani jio, oŋida bati aati Israele ihari eyyata hosi, buo ette ihohina eyyata hosi. 32Era hohoi iko Loholio Olibo asuuti hulo erre hunia. Ara Loholio Olibo esiorio ono Hollum jio hia hullo oniŋie 'to inyi.”

33Ninyia itaniŋuni aati lokikoi erre hunia, ette atajia hosi isuaharu, ette iwahan itattohoro lefahat hulia. 34Ati, owon nyia obo olosi afure honyi Gamaliel. Ara nyia inyi Afariseitanani buo fe ahettiyanani ifahita alla abaŋi aati bebe. Odioto nyia inyi ette ihum iramana jio ijiara do iyarai lefahat allet. 35Attati inyi jiaran jio aati Lokikoi hulia, “Itai Israele hohoi, ihumata mijio anyio enne iwahata itai ihanio jio aati hulia! 36Ogiluna Tadeyo, hetek nyia idetuno ette ikafatio ahou jio inyi lobo, ette eluluŋ waati ihuo esiha aŋuan ijifatio inyi. Ati attohori nyia inyi, ette eluluŋ hejifak honyi 'daŋ itturo, ette isarrahina. 37Ihalu honyi, odetuno nyia buo fe Yuda, Agalileatanani, jio oŋitek hunyia ihenierek aati, buo aati arriai ette ijifatio inyi. Ati attohori nyia buo fe inyi, ette buo fe lejifak honyi isarrahina. 38Ihuania, ajio ni jihatai, hèhanata obo ariŋ jio aati hulia. Obusana isi dee! Nyio, alla ara egigilo kuyya egiama tulo ottonosi ania, isid adi. 39Buo alla ara inyi ahono Hollum, ibiaŋata adi itai iremehina itapuak inyi. Ara herumana itai jio itaŋalafayete tai Hollum!”

Tania, ette isi iruk esiŋita Gamaliel, 40ette iloŋuna lefahat, ette ifodok, ette ihum iramana isi jio hèlaha inyiahi ikiana jio aati ta afure Yesu, ette ihohina isi. 41Omunoi nyia lefahat ninyia lafuoi isi addi to Lokikoi Yudei, nyio, to hosiere Hollum osiru nyia jihosi irumaniere ettigemita ta nafure Yesu. 42Oŋitek 'daŋ odulori nyia isi ettiyenio iko ettittoyo Asayyo Ayijok huno Yesu, Olonyimoto, Ihaji emojit enne ittokon iko ihaŋitek 'daŋ.

હાલમાં પસંદ કરેલ:

Ehanita Lefahat 5: EA2003

Highlight

નકલ કરો

Compare

શેર કરો