Ehanita Lefahat 10

Petro iko Kornelio

1Owon nyia obo latulo ibore gala Cesaria afure honyi Kornelio. Ara nyia inyi ajafit jio obo akatiba oseŋer anna anya, “Katiba Ittali.” 2Abaŋ nyia inyi Hollum bebe; inyi iko ahaŋ honyi 'daŋ. Imorot nyia inyi bebe jio alociaŋak, buo fe odulo imojotio jio Hollum. 3To obo oloŋ, ninyia ara ihuo saa hunihoi otto otoriai, oleyehino nyia ajilo olo Hollum jihonyi ihuo arigiai. Ihum nyia inyi igonyuna ajilo alia ottu, ette iloŋ inyi jiojio, “Kornelio!”

4Attati inyi ihum mijio jio ajilo alia ta abaŋi, ette jiaran, “Lamonye, nyio?”

Buo ajilo ette itarraŋ ojio, “Omuno Hollum emojiti iko emorot hoi jio alociaŋak. Attuba luŋa jihonyi itarraŋarie iyye. 5Ihuania, ifak omuk aati Joppa iloŋuniere obo latulo, afure honyi Simone Petro. 6Itoŋo inyi jio obo atulo ehuhumani muhuny, afure honyi Simone ollo owon ahaŋ honyi iger hari enne ittokon.” 7Attati ajilo alia leten addi, buo Kornelio ette iloŋuna omuk egiamak honyi arrihai iko obo olo oseŋer alla ara a habaŋani Hollum, buo fe ara lobo olo aluak Kornelio. 8Ninyia iramak inyi isi erre hoduo iduoŋi 'to jihonyi, ette inyi ifahina isi Joppa.

9Jio ebotie holoŋ, ninyia afuoi isi many iliaharik Joppa, adak nyia Petro ihide#10:9 …adak nyia Petro ihide haji : arai nyia asik Yudei ihuo ebecio to hide. haji imojori, ninyia ara ihuo akil fanni. 10Oniama nyia inyi, ette iwahan obo aŋiyo. Buo ninyia hemayei aŋiria, ojotoro nyia inyi, ette obo ariŋ ileyehino jihonyi ihuo arigiai, 11ette inyi igonyuna edou aŋaa, buo obo ariŋ enne iyalu amilaya anna alat, enne itawauni ifau ta aguli honyi huna aŋuan. 12Itua ariŋ ania, owoni nyia afacani caŋi 'daŋ iko erre ihuo amunuok, buo fe aheny. 13Itayiru nyia inyi obo etuk ojio jihonyi, “Petro, otte, ottohoi, ohonyai.”

14Ati itarraŋ Petro jiojio, “Lamonye, obeŋ luŋa! Nyio, habeŋ ni anya obo ariŋ onno orroho kuyya enne itiboti.”

15Ati inyiak nyia etuk nyia jiaran jihonyi, “Hèjio jio iboti erre hunno ojio Hollum jio olibori.” 16Iduoŋ nyia eram ania enyiahita hunihoi, attati inyiaharu ariŋ nyia idou.

17Ninyia hegigilo Petro awoyo hiram ono ariŋ onno oleyehino 'to ania jihonyi ihuo arigia, owotiai nyia aati hunyia ifahu Kornelio ikat haŋ Simone. Ittittifuni nyiadi isi amaji anna awanari ahaŋ ania. 18Iloŋi nyia isi, ette ifiyo jiojio, “Owon soho obo atomononi dini alla anya Simone Petro?”

19Ninyia harasa Petro igigilo awoyo hiram ono ariŋ ninyia oleyehino 'to jihonyi ihuo arigiai, ette Oloholio jiaran jihonyi, “Itayirie, omuk aati hunihoi#10:19 Hunihoi : igioroni omuk egierita jio, Omuk aati, buo obo abotie igiorok jio, Arrihai. hullo ottifiai iyye. 20Ihuania, ihuhuma ahuan, olluai ifau! Hèkuaya aleten ikosi, nyio ani efahu isi.” 21Ania, ette Petro illuuna ifau, ette jiaran jio aati hia, “Nani olo atulo elle ittifiati itai. Ifuanna itai inyio?”

22Itarraŋi nyia isi jio, “Jafit, Kornelio ifahu hohoi. Ara inyi atulo oloyijio buo fe abaŋ Hollum. Omunoi Yudei inyi 'daŋ. Iramak nyia ajilo olo Hollum inyi oŋida iloŋu iyye ihaŋ honyi itayiruniere ekenita huttonohoi.” 23Ania, ette Petro iloŋuna aati hulia attua, ette jiaran ijiara isi oferihini arue nyia diya.

Jio ebotie holoŋ, odioto nyia Petro ette leten ikosi. Ofuoi nyia buo fe omuk eruhok to Joppa ikosi. 24Jio ebotie holoŋ, afanyi nyia isi Cesaria ninyia itilari Kornelio inyi. Ottubanio nyia Kornelio arabotie iko aati hutta haŋ hosi buo mottiarak honyi hunyia iloŋu inyi. 25Ninyia hojiŋu Petro, ette Kornelio irraŋuna inyi, ette irigoŋo, ette itahabuyo inyi. 26Ati itadet nyia Petro inyi, ette jiaran, “Otte ahide; ara ni atulo ihuo iyye.” 27Odulo nyia Petro ekiana jio Kornelio buo isi ojiŋari attua haji ninyia onyuraniere inyi aati arriai ottubanie; 28ette Petro jiaran jihosi, “Imijana itai ta ahuattek hatai jio, obeŋi efahita Yudei aŋatani olo Yudei irriahari kuyya idahari iko Alufajak. Ati itahutak Hollum jihoŋ jio, hèlaha luŋa nani ajio jio orroho kuyya ibot obo atulo. 29Ania, ninyia ifak iyye aati jihoŋ, attu ŋole ni buo abeŋ eha. Ihuania, efiyo ni iyye, nyio itiloŋo iyye ani?”

30Itarraŋ nyia Kornelio ojio, “Allaŋi oŋitek hunihoi many to ninyia amojori#10:30 amojori : igioroni omuk egierita jio, amojori buo fe aferutta. ni ihaŋ hoŋ amojo otto otoriai saa hunihoi ihuo ana. Teya teya, owotia nyia obo latulo ihosiere hoŋ elle iyyafatio aboŋojin hunno opipiahi 31ette jiaran jihoŋ, ‘Kornelio! Itayiru Hollum emojiti hoi buo fe igonyu emorot hoi jio alociaŋak. 32Ihuania, ifak obo latulo Joppa iloŋuniere obo latulo afure honyi Simone Petro. Itoŋo inyi jio Simone ehuhumani muhuny ollo owon ahaŋ honyi iger hari enne ittok.’ 33Ania, efahiniere ni aati jihoi teya teya, buo iyye itte ittuna ta nayiji ottonohoi. Ihuania, ettubanio hohoi 'daŋ dini ihosiere Hollum, itaniŋuniere jihoi erre 'daŋ hunne iramak Lamonye jihoi ikianari.”

Ekiana ono Petro

34 # Edasita 10:17 Ikiana nyia Petro, ette jiaran, “Hode egonyu ni jio, orriamari aati 'daŋ to hosiere Hollum. 35Ifuotu inyi aati 'daŋ hulla abaŋi 'to inyi iko hulle ihanie 'to onno oyyu, nyio, obeŋ inyi igigia. 36Imijana itai asayyo hunyia ifahu inyi jio aati Israele; ettittoyo ono Asayyo Ayijok huno nelik tajia to Yesu Kristo, Lamonye waati 'daŋ. 37Imijana itai erre hunyia iduoŋi 'to ifau Yudea 'daŋ. Itterie nyia isi Galilea ihalu batisimo ninyia ittittoyo Yoane. 38Imijana buo fe itai eram ono Yesu a Nasaretanani. Isiarak nyia Hollum jihonyi Loholio Olibo iko aduaran. Ilur nyia inyi amasik 'daŋ buo ihanio onno oyyu buo fe itaŋidario hia 'daŋ hullo ogottiere Sittan, nyio owon nyia Hollum ikonyi. 39Era hohoi asuuti hulo erre 'daŋ hunyia ihanio inyi itua Yerusalem iko jio aŋacio hunnomuk 'daŋ hutta fau Israele. Attati Yudei ittohoro inyi, te esihonia hosi inyi likruce. 40Ati itubuhu nyia Hollum inyi toye, ihalu oŋitek hunihoi, ette italeyehina inyi 41jihohoi hama, hunyia eŋiyo 'to buo fe emata ikonyi ninyia ibuhu inyi toye. Hohoi hulia hunyia anyimu Hollum asuuti. Ati obeŋi nyia italeyehini inyi jio aati 'daŋ. 42Ihum nyia inyi iramana hohoi ittittoyere Asayyo Ayijok jio aati, buo fe itahutaniere jio inyi alia luŋa ollo onyimu Hollum ahaŋotoni olo eram ono esuok iko eram ono ayaak. 43Ikianai nyia lekianak Hollum 'daŋ te eram honyi jio, hia 'daŋ hulle iruhi 'to jihonyi, ohohini adi eyyata hosi, ta aduaran fure honyi.”

Ifuotuni Alufajak Loholio Olibo

44Ninyia hekiana Petro, ette Loholio Olibo isuuna jio aati 'daŋ hunyia itayirie 'to jio ekiana honyi. 45Illillihai nyia Yudei eruhok hinyia ofuonni 'to iko Petro to Joppa te esiarana Hollum esiorio honyi ono Loholio Olibo ara duadi bu jio Alufajak. 46Nyio, itaniŋuni nyia Yudei isi ikianai te etuhe hunno olufaji buo fe itahabuye agalihina Hollum erre 'daŋ. Ania, ette Petro jiaran, 47“Ifuotuni aati hulo Loholio Olibo ihuo ninyia efuotuniere. Ŋai ti oremik itik isi efuotuna batisimo ta aari?” 48Ania, ette inyi iramana jio ijiara isi ifuotuni batisimo ta afure ono Yesu Kristo. Attati isi jiaran ijiara inyi itoŋok omuk oŋitek kai ikosi.

હાલમાં પસંદ કરેલ:

Ehanita Lefahat 10: EA2003

Highlight

નકલ કરો

Compare

શેર કરો