1Korinto 4
4
Lefahat Kristo
1Oŋida luŋa itai igigiloti jio era hohoi a hegiamak Kristo, hulle ihanani a hattoŋok hulo elahode Hollum onno obeŋi omijani. 2Tania, ariŋ anna awahi jio egiamak hulia, ojiori ijiara luŋa isi oniŋie elettok hosi. 3Obeŋ odiaha itaji hoŋ oŋotok duo bu obo atulo kuyya obo olokikoi jihoŋ epali. Abeŋ buo fe ni aŋotoro eram hoŋ hama. 4Afaŋ egigilo hoŋ, ati obeŋ ania itahutak jio abeŋ ni epal. Lamonye ara ahaŋotoni hiram hoŋ. 5Tania, hèŋototo eram obo hobeŋ asaa ottuba, buo fe hobeŋ Lamonye ottu. Lamonye adi ottu isalana erre 'daŋ hunne idimani idumele, ette italeyehina ewahiti hunne idimai 'to itajia waati. Tania, ifuotuni adi aati 'daŋ olohuo onno oremik 'to tenyi jio Hollum.
6Illarak iko haniyarak hoŋ, ehanak ni ahuan hoŋ iko Apolo etarriamai ikianari jihatai erre hunia 'daŋ; jio oŋida bati ittiyenuna anyio onno ojiori ekenita huna, “Ijifatiete efahita hunna arai 'to ahode.” Hèlaha obo jihatai itadara ta atulo abotie buo iyasio ollobo. 7Ŋai ihanak iyye elettok hullomuk? Obiaŋara soho Hollum isiarak jihoi erre 'daŋ hunno owoni 'to jihoi? Nyioti itadara iyye, ihuo ollo obeŋi erre huttonohoi hunia arai esiorita?
8Irumana itai erre 'daŋ hunne iwahata itai? Isamata itai? Isata itai a hobuok duadi bu ebeŋ hohoi era a hobuok? Eii! Oyyu duo elle irata itai luŋa a hobuok ette duo hohoi irahan a hobuok arabotie ikatai. 9Egigilo ni isiarak Hollum jihohoi efahat, amaji esidi 'daŋ. Era hohoi ihuo aati hulla aŋotoni naye, iyeri ihosiere waati oŋida ajilohien huttedou iko aati hutta fau iŋiŋialai. 10Era hohoi abuyaŋak te eram Kristo; buo itai ilofiorojoto to Kristo. Obeŋ agolon jihohoi, buo itai igoloto. Iyasie hohoi, buo itahabuye itai. 11Many ihuania eniama hohoi buo fe ewon iko ebuoti hari. Eyyafatio hohoi aboŋojin hunna aguguasai; abahie hohoi; esiabita hohoi amasik 'daŋ; 12#Ehanita 18:3efuto hohoi egiama. Elle ittarrohojie aati afureta hohoi, emojok hohoi jihosi ayiji, buo elle ittigemie hohoi, edik hohoi. 13Elle ittarrohojie afureta hohoi, etarraŋ hohoi isi te ekenita ayijok. Era hohoi ihuania efuri haranyanya waati hutta fau.
14Abeŋ ni egiorok erre huna jihatai, itanyahiniere itai ariri; ati isiŋiere itai, aduri hoŋ hullo obuor ataji hoŋ bebe. 15Duadi bu oluaji esiŋak hulo amanya Kristiani jihatai, ara Monyatai abotie ijiai. Ara ni a monye hatai to Kristo Yesu te eyaŋuno hoŋ jihatai Asayo Ayijok. 16#1Kor 11:1; Fil 3:17Tania, attana ni itai jio, ijifatiete ehanita hoŋ. 17Te eram ania, efak ni jihatai Timoteyo, lonyi hoŋ ollo obuor ataji hoŋ bebe ta amanya ono Kristiani, itagiluniere itai ekotia hunna amanyari ni to Kristo. Ekotia hunia hunne ettiyenio ni jio eluluŋi heruhok 'daŋ ababo imasik 'daŋ. 18Itadarai omuk hulatai, nyio, igigiloi nyia isi jio abeŋ adi ni attu imijaru itai. 19Alla ara awahan ono Lamonye, attu adi ni jihatai, irumaniere agolon ono etadarak hulia, buo obiaŋara ekenita hosi hunia ijiai. 20Nyio, obeŋ Olobie Hollum ara te ekenita ijiai, ati ara inyi ta agolon. 21Anani enne iwahata itai? Ijiara ani attu iko alioto, kuyya ijiara ani attu ta abuaran taji iko ta anyalami?
હાલમાં પસંદ કરેલ:
1Korinto 4: EA2003
Highlight
નકલ કરો
Compare
શેર કરો
Want to have your highlights saved across all your devices? Sign up or sign in
© The Bible Society in South Sudan 2003