Efesios 4
4
Espíritu is̈acpensa̱tcap as̈am tu'jcatu
1Ʉ̱ tʉtsʉ̱nap presu ni'c tʉncupʉcp el Señor. Tʉnʉmgʉs̈ap pi yo'yga as̈am iguiwa'n ayé Dios jeme is̈ya̱s̈caway. 2Camnimʉjninʉ́mgʉjʉ, más oy pi jayawanga. Nimajmóygʉjʉ en nu'pʉjʉn ni'c mijchat miniwangʉjʉp. 3Espíritu Santu is̈acpensa̱tcap as̈am tu'jcatu, mit cuji'cs̈iga pa intsʉ̱ngawa'n wename, mit jinap tsʉ̱́nga en paz ni'c mitu'jcatu. 4Nu'pʉjʉn nacupʉjcapay natsʉ̱ngap as̈am tu'c cuerpu, mit itp tu'c Espíritu Santu tsʉ̱napay najo̱tni'jcat, mit itp tu'c cosa oyway na-atsʉ̱ngapay ni'c Dios nas̈ya̱s̈cau. 5Itp tu'gu Señor nas̈manda̱tcapay, mit je'yu nacupʉjcap, mit itpey tu'gu nʉ'gutem. 6Itp tu'gu Dios Nate̱jat pa nanu'pʉjʉjnat. Je' imanda̱tp nu'pʉjʉn, je' nas̈actuwatcap nu'pʉjʉn lo que je' iwampay, mit je' tsʉ̱nap mit ʉjtsat nanu'pʉjʉjnat.
7Cristu imoyp cada jayau tu'c yos̈ pa iguiwatwa'n pa Dios, as̈am je' iguimoyp favor. 8Jemni'c itsʉ̱na ja'yic Dios ilibruni'c:
Cuandu el Señor icu'jt pa tsajpni'c, imunʉs̈cʉs̈ jayajwat jeme tsʉ̱ngaway as̈am presujat,
mit imoygʉs̈ favor pa nu'pʉjʉn jayajwat.
9Mit mam iguinʉjm ni'c je' cu'tway, ayé inʉmo'jcʉp ni'c je' it ti imanajcʉ'jc hasta más pa'tm na̱s̈cʉtʉm. 10Mit jeme manacway, ayé nije'yu Cristu jeme cu'tway más yucm tsajpni'c pa jem iguimanda̱twa'n nu'pʉjʉn. 11Mit nije'yu Cristu iyajcʉs̈ una̱c jayajwat pa apóstojlat, una̱c pa profetajat jeme cotscámpay pa Dios, una̱c pa iguinʉmdacyo'ygawa'n oyway noticia, mit una̱c iyajcʉs̈ ma cuida̱tca Dios ijayajwat mit ma ajque's̈cʉs̈a. 12Cristu iyajcʉs̈ ayé favojrat pa Dios ijayajwat ma jatca oy, pa iyos̈watcawa'n mit Dios, pa ma pʉjca maj Cristu icupʉcpajyat. 13Ni'c Dios iwamp ʉjtsat nanu'pʉjʉjnat natsʉ̱́nga as̈am tu'jcatu ni'c nacupʉjcap je', mit iwampey na-is̈cápcaja más je' iway, mit nas̈-is̈capcawa'n más may, mit we'n najatcáj más oy mit más nu'tsic, mit napʉctsougáj nu'pʉjʉn Cristu ijtʉpay pa ʉjtsat. 14Nagajatsʉ̱́nga as̈am ya̱wájat jeme cunʉs̈igapay jʉmgapa'tu, ne nagatunitʉ́gʉygʉjʉ nu'pʉjʉn ama̱s̈an as̈am tu'c s̈e'm nas̈cus̈újigapay, nagaca'uga mit we̱tpay jayajwat, ni'c je'jat ito'jcʉjʉp maña pa nas̈we̱jta̱jcáj. 15Po nasiguiá̱tcaja lo que iyacs̈ta'cway pa naniwángʉjʉ, mit nas̈pichingajáj oy nu'pʉjʉn nawatcapay ni'c namutʉgʉygau Cristu, mit je' as̈am nacopajcat ni'c nas̈manda̱tcap. 16Cristu as̈am nacopajcat mit ʉjtsat as̈am je' icuerpu ni'c nanesita̱tcap je'. Nu'pʉjʉn nacuerpujat tsʉ̱nap bien tsowic mit cada pajc ijtʉp iyos̈, mit jemé nas̈actuwatcap nu'pʉjʉn, mit natsʉ̱ngap oy cuandu cada parte nacuerpuni'cway nimajyigʉjʉp. We'ney natsʉ̱́nga mit Cristu, naye'jcap oy mit nanimajyigʉjʉp ni'c naniwangʉjʉp.
Cristu nas̈moygap nam vida
17Jinap tʉnyʉmp lo que el Señor tʉs̈manda̱tway tʉnʉmgʉ́s̈a: ni'c pigajayo'yga as̈am jeme iga-is̈capcapay Dios, ni'c je'jat ca-oy lo que ipensa̱tcapay. 18Je'jat iga-entendia̱tcap neti, mit ca-itcʉjʉp parte mit ayé vida iyacpay Dios. Igajawigap neti ni'c copacmʉgʉgo'jcat. 19Mit como je'jat cajawinchú̱gagap, ni-entrega̱tcʉjʉu pa iguiwatcawa'n tigapa'tu, mit iwano'jcap nu'pʉjʉn cosa malway pa iguiwatcawa'n. 20Po Cristu is̈ca-actupʉctángawu pa is̈watcawa'n as̈am je'jat iguiwatca. 21Inmaraugau mit impʉctangau lo que Jesús i-ajque's̈way, mit je' i-ajque's̈ lo que iyacs̈ta'cway. 22Ambanu miyo'ygau mal po jinap cuyáguiga ayé ampay vida, ni'c ayé mal vida is̈actogoygáj ni'c nas̈we̱jta̱jcap ayé mal cosajat iyo'tpay najo̱jtat, 23mit ma namjat lo que impensa̱tcapay jinap injo̱tni'jcat. 24Pi yo'yga mit tu'c nam vida ni'c Dios nas̈namwatcau as̈am je' iguiwajn pa nayo'ygawa'n yacs̈ic, mit pa natsʉ̱ngawa'n limpiu najo̱tni'jcat ni'c na-is̈capcap lo que iyacs̈ta'cway.
25Jemni'c nacuyáguiga nu'pʉjʉn we̱t, mit cada jayau ma nʉm iyacs̈ta'cway mit imupro̱wije̱way, ni'c ʉjtsat nanu'pʉjʉjnat namutʉgʉygau Cristu mit natsʉ̱ngap as̈am tu'gu.
26Te mi-awa'nigap, po camwatca mal, mit cam-awa'niga jec. 27Ne cammoygawit laj Awayagatsna'.
28Jeme nu'mpayate magajanu'mwit, más oy ma yos̈wat mit icʉ'jat, mit we'n i-aguepáj pa iguimo'wa'n jeme itunas̈capay.
29Camnʉmga malway palabrajat, po nʉmga jeme oyway pa is̈majyigawa'n jayajwat, pa we'n tsʉ̱ngáj oy jeme is̈maraugámpay. 30Mit camactu'ngaja ijo̱jt Espíritu Santu jeme i-acminway Dios, ni'c je' is̈sella̱tcau pa is̈je'jatcáj Dios, mit cojáj ayé s̈ʉjw cuandu Dios is̈libra̱tcáj pa siempre.
31Niju'ptángʉjʉ de nu'pʉjʉn ayʉ̱́j mal cosajat: Cam-ánga jeme is̈watcajapay mal, cam-awa'niga, camjoranda̱jca, camya̱s̈cada̱jca, cammaltucotsca nepʉn ne camwatca nejʉmay mal. 32Po jayawánga, ayo̱wís̈ca, niperdoná̱tcʉjʉ minu'pʉjʉjnat as̈am Dios is̈perdona̱tcawey ni'c Cristu itso̱c nu'pʉjʉn inma̱jlat.
હાલમાં પસંદ કરેલ:
Efesios 4: PSNT
Highlight
નકલ કરો
Compare
શેર કરો
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].