2 Corintios 7
7
1Mijchat tʉwangʉs̈pay, Dios nas̈prometia̱tcajap nas̈wayjatcáj, jemni'c nanilimpiá̱tcʉjʉ de nu'pʉjʉn mal nawatcapay mit jeme nas̈jingapay, mit nache'nga más pa nayo'ygawa'n limpiu ni'c napʉ̱tcap Dios.
Tu'ngau ijo̱jtat Corintojatway
2Pʉctsougac injo̱tni'jcat ni'c nepʉn mam mijchat tʉngawatcajawu mal, mit nepʉn tʉnga-actupʉctangawu mal, ne tʉngawe̱jta̱jcawu nepʉn. 3Tʉngaculpa̱tp nepʉn ni'c tʉnʉmgʉs̈away wen-ijt ni'c tʉmuyo'ygap tʉnjo̱tni'jcat pa tʉ-o'jcawa'n mit pa tʉtsʉ̱ngawa'n tu'gu mit mijchat. 4Tʉconfia̱to'cp mit mijchat mit may tʉ-oyninʉmgʉs̈ey. Tʉntunas̈o'cp po contentu tʉtsʉ̱́na mit mijchat, mit ji'go'cp tʉnjo̱jt.
5Cuandu tʉcóygaj Macedoniajway na̱s̈, ca-oyawu tʉpo'cs̈ca nes̈ʉ̱n, jʉmgapa'tu tʉs̈tunás̈caj. Mam tʉyo'ygaj, iwatcau puru tsuguin mit tʉpʉ̱tcau tʉnjo̱tni'jcat. 6Po Dios i-acji'jcʉs̈ap ijo̱jtat jeme desmaya̱tcapay, mit ʉjtsat tʉs̈acji'jcajawey tʉnjo̱jtat icojy Tito. 7Ji'c tʉnjo̱jtat caje'yu ni'c coy Tito po ni'c je' tsʉ̱nau contentu mit mijchat, mit je' tʉs̈actujawigau nat inwangap is̈-e'pcájatu, nat itu'n injo̱jtat ni'c inwatcau mal, mit jinap inwangap is̈jayaumaygáj ʉ̱, mit jemni'c más iji'c tʉnjo̱jt.
8Te tʉ-actu'ngʉs̈au injo̱jtat ni'c tʉja'ygʉs̈au ayé noc, jinap catu'mp tʉnjo̱jt. Primeru tu'n tʉnjo̱jt ni'c tʉn-is̈ ni'c ayé noc is̈actu'ngajau injo̱jtat, po pa tu'c tiempuwáyu. 9Mit jinap ji'cp tʉnjo̱jt, po caje' ni'c tu'n injo̱jtat. Ji'cp tʉnjo̱jt ni'c incuyaguigau inma̱lway to̱jwat. Tu'n injo̱jtat ni'c we'n iguiwa'n Dios, pa we'n inganʉmgáj ni'c ʉjtsat tʉwatcajau mal. 10Itu'nwa'n ijo̱jt tu'c jayau as̈am iguiwa'n Dios, ayé pa ma cuyagui ima̱lway to̱u pa ma nisalva̱jtʉ. Jeme ijayaumaynupay Dios magajatu'n ijo̱jt, po maljayajwat ayʉ̱́j mundujway tu'mp ijo̱jtat po igacuyaguigap ima̱lway to̱jwat, mit ayé jayajwat togoygáj. 11Tu'n injo̱jtat as̈am Dios iguiwa'n mit cʉs̈ mini-animá̱tcʉjʉu. ¡E'pca nat inyidefendiá̱tcʉjʉj pa intángaj oy, mit inaparta̱tcau ayé mal! Ʉ̱ is̈pʉ̱tcapate mit jinap inwangap is̈-e'pcáj. Inwano'jcap is̈watcawa'n oy mit inactunas̈cau ayé iwatway mal. Mit jinap nu'pʉjʉn inactujawigap ni'c miyo'ygap limpiu mit ayé asuntu. 12Tʉja'ygʉs̈au po caje' pa jeme iwatway ayé mal ne caje' pa jeme itunas̈way por ayé mal, po tʉja'ygʉs̈au pa pi jawiga nat tʉcuidá̱tca mam igui-e'p Dios. 13Jemni'c iji'c tʉnjo̱jtat ni'c mijchat mitsʉ̱ngap contentu, po más ji'cp tʉnjo̱jtat ni'c Tito tsʉ̱napey contentu ni'c minu'pʉjʉjnat mijchat inmajyigau pa magajapensa̱t. 14Mit te tʉnyajau Tito ni'c inwatcap oy, tʉgawinchu̱gap. Nu'pʉjʉn lo que tʉnʉmgajaway ayé iyacs̈ta'cway, mit we'ney pichin iyacs̈ta'cway lo que tʉnyajaway Tito de mijchat. 15Mit Tito más is̈wangap mijchat ni'c inijawip nat is̈jayaumáygaj je'. Je' inijawip nat is̈respetá̱tcaj mit is̈pʉ̱́tcaj cuandu is̈pʉctsóugaj je'. 16Ji'cp tʉnjo̱jt ni'c tʉconfia̱tp mit mijchat en nu'pʉjʉn cosa.
હાલમાં પસંદ કરેલ:
2 Corintios 7: PSNT
Highlight
નકલ કરો
Compare
શેર કરો
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].