Daniyɛ́li Glɛ̌sigbe 14
14
Daniyɛ́li kpódó vodúnnɔ Baalu tɔn lɛ́ɛ kpó
1Axɔ́sú Asitiyaji yi su mɛ tɔn lɛ́ɛ, bɔ Silusi Pɛ́sinu ɔ́ jɛ tɛn tɔn mɛ. 2Axɔ́sú ɔ́ ná susu Daniyɛ́li hú wěɖexámɛtɔ́ tɔn ɖě lɛ́ɛ bǐ, bó jó éɖée bǐ n'i. 3 Babilɔ́nunu lɛ́ɛ ká ɖó bǒcyɔ ɖokpó ɖo to ɔ́ mɛ, bɔ è nɔ ylɔ́ ɖɔ Baalu. Yě nɔ́ gú akwɛ́ dó wǔ tɔn taala. Ayǐhɔ́ngbe ayǐhɔ́ngbe tɛgbɛ ɔ́, yě nɔ́ sɔ́ linfín nǔjlɛ́gannú wěwe, lɛ̌ngbɔ́ asi kanɖé (40), vɛ̌ɛn lǐtli afɔɖé kanɖé wǒ (250) dó sá vɔ̌ ná n'i. 4Axɔ́sú ɔ́ ɖó sísí ɖaxó nú bǒcyɔ ɔ́, lobɔ ayǐ hɔ́n tɛgbɛ ɔ́, é nɔ́ wá sɛn ɛ; Daniyɛ́li ɔ́ ká nɔ sɛn nǔmɛsɛn éyɛ́ tɔn nɛ́ ɔ́ ɖě ǎ. Axɔ́sú ɔ́ ɖɔ n'i ɖɔ aniwútu a mɔ nɔ sɛn vodún Baalu ǎ. 5É yí gbe n'i ɖɔ: Un nɔ sɛn bǒcyɔ e gbɛtɔ́ sɔ́ alɔ dó bló ná ɔ́ ǎ; lo ɔ́, Mawu Gbɛɖe e ɖó jǐnukúnsin kpódó ayǐkúngban kpán, bɔ nǔ bǐ ɖo alɔ tɔn mɛ ɔ́ wɛ un nɔ sɛn. 6Hwenɛ́nu ɔ́, axɔ́sú ɔ́ ɖɔ n'i ɖɔ: Hǔn a ɖi ɖɔ Baalu nyí Mawu Gbɛɖe ǎ wɛ a? Nǔ e é nɔ́ ɖu kpó ahan e é nɔ́ nu gbe ɖokpó ɔ́ kpó ɔ́, a nɔ mɔ ǎ wɛ a? 7Daniyɛ́li ko nǔ, bó ɖɔ: Axɔ́sú, è ma blɛ́ mɛɖée ó, ko kpódó kɔ́ kpó wɛ è dó bló ná; é nɔ́ ɖu nǔɖé ǎ, é ká nɔ́ nu nǔɖé ǎ. 8Ée axɔ́sú ɔ́ se mɔ̌ ɔ́, xomɛ sin i taala, bɔ é zɔ́n ɖɔ è ylɔ́ vodúnnɔ Baalu tɔn lɛ́ɛ wá. Ée yě wǎ ɔ́, é ɖɔ nú yě ɖɔ: Ényí mi ma ɖɔ mɛ e nɔ ɖu nǔ e è nɔ xwlé vodún Baalu lɛ́ɛ ɔ́ nú mì ǎ ɔ́, mi ná yi kú. Lo ɔ́, ényí mi ɖe xlɛ́ ɖɔ Baalu ɖésú wɛ nɔ ɖu nǔ lɛ́ɛ ɔ́, Daniyɛ́li ná kú, ɖó é nylá nu dó Baalu wú. 9Daniyɛ́li ɖɔ nú axɔ́sú ɔ́ ɖɔ é ní bló gbɔn lě e é ɖɔ gbɔn é.
10Vodúnnɔ Baalu tɔn lɛ́ɛ ɔ́, kanɖé gban (70) wɛ, è xa nyɔ̌nu lɛ́ɛ kpódó yɔkpɔ́vú lɛ́ɛ kpán ǎ. Axɔ́sú ɔ́ kpódó Daniyɛ́li kpó zɔn kpɔ́ wá vodún Baalu xɔ kɔn. 11Hwenɛ́nu ɔ́, vodúnnɔ Baalu tɔn lɛ́ɛ ɖɔ n'i ɖɔ: Axɔ́sú, mǐdɛɛ lɛ́ɛ ná tɔ́n, bɔ hwi ɖésúnɔ ná zé nǔɖuɖu lɛ́ɛ kpódó vǐwunsin ɔ́ kpán ɖó Baalu nukɔn, énɛ́ ɔ́ gúdo ɔ́, a na sú hɔn ɔ́, bó ná ɖó wuntun towe jǐ tɔn. 12Ényí mǐ wá sɔ zǎnzǎn bónú a ma mɔ ɖɔ Baalu ɖu nǔ lɛ́ɛ bǐ ǎ hǔn, è nǐ hu mǐ, abǐ Daniyɛ́li ná kú, ɖó é ɖó nǔvú dó mǐ nu. 13Vodúnnɔ Baalu tɔn lɛ́ɛ ɖeji dó yěɖée wú, lobo yí go. Yě ɖe ali gbɔn nǔglɔ́ káká yi távo Sinsɛnxɔ ɔ́ tɔn glɔ́. Fínɛ́ wɛ yě nɔ́ gbɔn tɛgbɛ lɛ́ɛ bǐ dó byɔ́ Sinsɛnxɔ ɔ́ mɛ, bó nɔ́ bɛ́ nǔɖuɖu lɛ́ɛ bǐ.
14Ée axɔ́sú ɔ́ sɔ́ nǔɖuɖu lɛ́ɛ ɖó Baalu nukɔn gúdo ɔ́, Daniyɛ́li ɖɔ nú kásɛntɔ́ tɔn lɛ́ɛ ɖɔ yě ní wún afín bó fúnfún gbɔn Sinsɛnxɔ ɔ́ bǐ mɛ, ɖo axɔ́sú ɔ́ ɖokpónɔ géé nukún mɛ, bɔ yě tɔ́n, bó sú hɔn ɔ́, bɔ axɔ́sú ɔ́ ɖó wuntun tɔn hɔn ɔ́ jí. 15Vodúnnɔ Baalu tɔn lɛ́ɛ zɔn zǎn lě e yě ko nɔ bló gbɔn é; yě kplá asi yětɔn lɛ́ɛ kpódó vǐ yětɔn lɛ́ɛ kpán bó wá ɖu nǔɖuɖu lɛ́ɛ, bó nu vǐwunsin ɔ́ bǐ. 16Axɔ́sú ɔ́ fɔ́n zǎnzǎn tɛɛn, bɔ é kpó Daniyɛ́li kpó zɔn kpɔ́ bó byɔ́ Sinsɛnxɔ ɔ́ mɛ. 17Axɔ́sú ɔ́ kanbyɔ́ Daniyɛ́li ɖɔ: A mɔ wuntun ce ɖo tɛn tɔn mɛ ǎ cé? Daniyɛ́li ɖɔ: Ɛɛn, axɔ́sú! 18Ée yě hun hɔn ɔ́, axɔ́sú ɔ́ mɔ ɖɔ nǔɖuɖu lɛ́ɛ ɖě kún sɔ́ ɖo távo ɔ́ jí ó, bó sú xó syɛ́nsyɛ́n ɖɔ: Baalu, a d'agba mɛ, a nɔ blɛ́ mɛ ǎ. 19Daniyɛ́li ko nǔ, bó gbɛ́ nú axɔ́sú ɔ́ ɖɔ é ní má byɔ́ Sinsɛnxɔ ɔ́ mɛ ó. É ɖɔ n'i ɖɔ é ní kpɔ́n kɔ́ mɛ, mɛ lɛ́ɛ sín afɔxwixwí nɛ́! 20Axɔ́sú ɔ́ ɖɔ: Un mɔ gbɛtɔ́ sín afɔxwixwí, mɛxó kpó yɔkpɔ́vú kpó.
21Axɔ́sú ɔ́ sin xomɛ taala, bó zɔ́n ɖɔ è kplá vodúnnɔ lɛ́ɛ wá, asi yětɔn kpódó vǐ yětɔn lɛ́ɛ kpán, bɔ yě xlɛ́ bɛli, fí e yě nɔ́ gbɔn byɔ́ Sinsɛnxɔ ɔ́ sá, bó nɔ́ ɖu nǔ lɛ́ɛ é. 22Axɔ́sú ɔ́ zɔ́n, bɔ è hu yě bǐ, bó jó Sinsɛnxɔ ɔ́ nú Daniyɛ́li, bɔ é gba vodún ɔ́ kpódó xɔ tɔn kpán.
Daniyɛ́li kpó Dan baɖabaɖa ɔ́ kpó
23Dan ɖaxó ɖé tíin, Dan baɖabaɖa ɖé wɛ, bɔ Babilɔ́nunu lɛ́ɛ nɔ sɛn. 24Axɔ́sú ɔ́ wá ɖɔ nú Daniyɛ́li gbe ɖokpó ɖɔ: A sixú ɖɔ nú mì ɖɔ éyɛ́ kún nyí Mawu Gbɛɖe ó a? Hǔn, bo sɛn éyɛ́. 25Daniyɛ́li yí gbe ɖɔ: “Aklúnɔ Mawu nyɛ tɔn ɔ́ wɛ un nɔ sɛn, ɖó é ɖokpó géé wɛ nyí Mawu Gbɛɖe. 26Lo ɔ́, Sɛ́mɛɖó, ényí è sixú ná gbe mì ɔ́, un na hu Dan nɛ́ ɔ́ alǐnnyánú mɛ vo.” Axɔ́sú ɔ́ ɖɔ: “Un ná gbe we.” 27Daniyɛ́li mlí nǔ ataklɛ ɖɔhun ɖé lɛ́ɛ, bó sɔ́ dó nu mɛ nú Dan ɔ́, bɔ Dan ɔ́ ɖu bó kú. Hwenɛ́nu ɔ́, Daniyɛ́li ɖɔ: Mi vɛ́ kpɔ́n nǔ e sɛn wɛ mi ɖe ɔ́.
28Ée Babilɔ́nunu lɛ́ɛ se nǔ e jɛ nɛ́ ɔ́, xomɛ sin yě taala bɔ yě fɔ́n gǔ dó axɔ́sú ɔ́ kpó Daniyɛ́li kpán jí, bó ɖɔ: Axɔ́sú mǐtɔn ɔ́ húzú Judéenu Mawusɛntɔ́; é gba vodún mǐtɔn Baalu, bó hu Dan mǐtɔn kpódó vodúnnɔ mǐtɔn lɛ́ɛ bǐ kpán. 29Énɛ́ gúdo ɔ́, yě yi axɔ́sú ɔ́ gɔ́n, bó ɖɔ n'i ɖɔ: Jǒ Daniyɛ́li nú mǐ, é má nyí mɔ̌ ǎ ɔ́, mǐ ná hu we, hwi kpódó hɛ̌nnumɔ towe lɛ́ɛ bǐ kpó.
30Ée axɔ́sú ɔ́ mɔ ɖɔ yě jɛ kú jɛ́n wɛ ɔ́, é gbɔ bó jó Daniyɛ́li nú yě. 31Bɔ Babilɔ́nunu lɛ́ɛ sɔ́ Daniyɛ́li nyi dó kinnikínní lɛ́ɛ sín do mɛ. Bɔ é nɔ fínɛ́ nú azǎn ayizɛ́n.
32Kinnikínní tɛ́nwe wɛ ɖo do ɔ́ mɛ, bɔ ayǐhɔ́ngbe, ayǐhɔ́ngbe tɛgbɛ ɔ́, é nɔ ná yě cyɔ we kpódó lɛ̌ngbɔ́ we kpó. Amɔ̌, gbe nɛ́ gbe ɔ́, è tɛ nǔɖuɖu yě, bónú yě ná sixú ɖu Daniyɛ́li.
33Gbeyíɖɔ Mawu tɔn Xabakúku ɖo Judée hwenɛ́nu; é bló nǔɖuɖu bó ná sɔ́ yi jó nú azɔ̌watɔ́ tɔn lɛ́ɛ ɖo gle mɛ. 34Wɛnsagun Aklúnɔ tɔn tɔ́n dó jǐ tɔn, bó ɖɔ n'i ɖɔ: Sɔ́ nǔɖuɖu e a hɛn ɔ́ yi jó nú Daniyɛ́li ɖo Babilɔ́nu, ɖo do e mɛ kinnikínní lɛ́ɛ ɖe ɔ́. 35Xabakúku yí gbe ɖɔ: Un yi Babilɔ́nu kpɔ́n gbeɖé ǎ; un ka tunwun do e xó ɖɔ wɛ a ɖe ɔ́ ǎ. 36 Azɔn ɖokpó ɔ́, wɛnsagun Aklúnɔ tɔn ɔ́ hɛn ɖa tɔn lɛ́ɛ, bó zé e mɔ̌ káká yi Babilɔ́nu ɖo kinnikínní lɛ́ɛ sín do ɔ́ jí, ɖo jɔhɔn ɖé sín hlɔ̌nhlɔ́n mɛ. 37Xabakúku sú xó bó ɖɔ: “Daniyɛ́li, Daniyɛ́li, nǔɖuɖu e Mawu sɛ́ dó we ɔ́ ɖíe!” 38Daniyɛ́li ɖɔ: “Áo, Mawu! A flín mì, bó ká ɖe xlɛ́ mì ɖɔ a kún nɔ wɔn mɛ e yí wǎn nú we lɛ́ɛ ó.”
39Daniyɛ́li sí te bo ɖu nǔ, bɔ énɛ́ gúdo ɔ́, wɛnsagun ɔ́ lɛ́ zé Xabakúku wá to tɔn mɛ fí e é gosín ɔ́ tlóló.
40Ée azǎn tɛ́nwegɔ́ ɔ́ gbe wá su é ɔ́, axɔ́sú ɔ́ wá do ɔ́ kɔn, bó ná dó gbɛvíhan, ɖó mɛvívɛ́ná tɔn Daniyɛ́li tamɛ; ée é wá do ɔ́ kɔn é ɔ́, é mɔ Daniyɛ́li ɖo ayǐjínjɔ́n. 41Hwenɛ́nu ɔ́, é sú xó ɖaxó ɖé, bó ɖɔ: A d'agba mɛ, Aklúnɔ, Mawu Daniyɛ́li tɔn, bɔ Mawu ɖě sɔ́ tíin zɛ hwi ɖokpónɔ wú ǎ. 42Énɛ́ gúdo ɔ́, é wá ɖe gbe ɖɔ è nǐ ɖe Daniyɛ́li tɔ́n sín do ɔ́ mɛ, bɔ è bɛ̌ mɛ e ɖo Daniyɛ́li ná hu wɛ lɛ́ɛ nyi do ɔ́ mɛ, bɔ kinnikínní lɛ́ɛ tlɛ́n yě ɖu tlóló ɖo axɔ́sú ɔ́ nukún mɛ.
Praegu valitud:
Daniyɛ́li Glɛ̌sigbe 14: FONDC
Tõsta esile
Kopeeri
Võrdle
Jaga
Kas soovid, et sinu esiletõstmised oleksid salvestatud kõigis sinu seadmetes? Registreeru või logi sisse
La Bible en langue fon © Alliance Biblique du Bénin, 2012.