Daniyɛ́li Glɛ̌sigbe 3

Azaliya xo ɖɛ

24Mɛ atɔn lɛ́ɛ ɖo zɔnlin ɖi wɛ ɖo zo ɔ́ tɛ́ntin, bó ɖo Mawu xomlá wɛ bó ɖo susu kpa nú Aklúnɔ wɛ. Yě mɛ atɔn énɛ́ lɛ́ɛ sín nyǐkɔ ɖíe: Hananiya, Azaliya kpódó Mikayɛ́li kpó. 25Énɛ́ gúdo ɔ́, Azaliya nɔ te ɖo zo ɔ́ tɛ́ntin, bó xo ɖɛ élɔ́ ɖɔ:

26 È ni kpa we,

è nǐ sɔ́ we su Aklúnɔ,

Mawu tɔ́gbó mǐtɔn lɛ́ɛ tɔn.

Nyǐkɔ towe ní xɔ susu káká sɔ́yi tɛgbɛ gbe.

27Nǔ e a wa nú mǐ lɛ́ɛ é bǐ wɛ jlɔ́, bó sɔgbe,

ali towe lɛ́ɛ bǐ wɛ jlɔ́;

hwɛɖiɖɔ towe bǐ nɔ xwedó nǔgbó.

28Nǔgbó wɛ, tó e a dɔn nú mǐ,

bó dɔn nú Toxo mímɛ́ Jeluzalɛ́mu tɔ́gbó mǐtɔn lɛ́ɛ tɔn ɔ́,

bǐ wɛ xwedó hwɛjijɔ.

A xwedó nǔgbó kpó nǔ jlɔ́jlɔ́ kpó;

A dɔn hwɛ e mǐ hu lɛ́ɛ sín tó nú mǐ.

29Nǔgbó ɔ́, mǐ hu hwɛ;

mǐ wa nǔ mɛ ma tunwun we ɖɔhun;

mǐ bló káká bó klán mǐɖée sín wǔ we;

mǐ jɛ agɔ ɖo nǔ bǐ mɛ.

Mǐ wlí tó sɛ́n towe lɛ́ɛ wú vɔ́vɔ́ ǎ.

30Mǐ ɖó sísí nú yě ǎ.

Mǐ wa nǔ mlɛ́ yě ǎ.

É ɖo mɔ̌ có ɖagbe mǐtɔn wú wɛ a nǎ yě mǐ.

31Nǔgbó wɛ, tó e a dɔn nú mǐ ɔ́,

nǔ e a wa nú mǐ lɛ́ɛ bǐ ɔ́,

a blǒ dó hwɛjijɔ jí.

32A jǒ mǐ nú kɛntɔ́ mǐtɔn lɛ́ɛ,

kɛntɔ́ mǐtɔn nǔmaɖitɔ́, nǔvɛ́mɔ, gǔfɔ́ntɔ́ lɛ́ɛ;

a jǒ mǐ nú axɔ́sú dídá e nylá hú mɛ bǐ ɖo ayǐkúngban jí é.

33Din ɔ́, mǐ sɔ́ sixú kɛ nu lobo ɖɔ xó ǎ.

Winnyá kpó hɛ̌n kpó wɛ nyí mǐ mɛ e ɖo kan towe nu lɛ́ɛ tɔn,

mǐ mɛ e nɔ sɛn we lɛ́ɛ tɔn.

34Kpɔ́n dó nyǐkɔ mímɛ́ towe wú;

ma jó mǐ nú kɛntɔ́ sɔ́ yi ó;

ma hɛn alɛ e a nu xá mǐ é gblé ó.

35Lɛ̌ kpɔ́n dó Ablaxámu xɔ́ntɔn towe ɔ́ wú;

kpɔ́n dó Izáki kpódó Jakɔ́bu,

mɛsɛntɔ́ gbejínɔtɔ́ towe lɛ́ɛ kpán wú;

bónú mǐ má jɛ wǎn yíyí towe sín flǔ mɛ ó.

36Yě wɛ a ɖɔ ná ɖɔ émí ná bló bɔ kúnkan yětɔn ná sukpɔ́;

yě ná sukpɔ́ sunví e ɖo jǐxwé lɛ́ɛ ɖɔhun;

yě ná sukpɔ́ xutó nyɛ́kɛ́n ɖɔhun.

37Áo, Aklúnɔ!

Mǐ ɖíe húzú togun e hwe hú togun lɛ́ɛ bǐ ɖo gbɛ ɔ́ mɛ ɔ́ e,

mǐ sɔ́ ɖi nyǐ ɖěbǔ ɖo ayǐkúngban ɔ́ jí égbé din ǎ;

mǐ sɔ́ ɖi nyǐ ǎ ɖó hwɛ mǐtɔn lɛ́ɛ wú.

38Hwe mǐtɔn nu din ɔ́, gǎn ɖo mǐ nu ǎ;

gbeyíɖɔ ɖe ǎ, axɔ́sú ɖě sɔ́ ɖe ǎ,

vɔ̌ e è nɔ dó zo é ɖě sɔ́ ɖe ǎ,

nǔníná ɖě sɔ́ ɖe ǎ,

vɔ̌ sá dó hwɛhuhu tamɛ sɔ́ ɖe ǎ;

zǎlínkpɔ́n dó zo ɖě sɔ́ ɖe ǎ,

tɛnmɛ mímɛ́ e mɛ mǐ nǎ xwlé jinukún nukɔntɔn mǐtɔn lɛ́ɛ we,

bó ná mɔ hwɛsɔ́kɛmɛ towe yí ɖe ɔ́ sɔ́ ɖe ǎ.

39Nǔ nyí mɔ̌ có, Aklúnɔ,

yǐ mǐ kpódó mɛ ɖé má nyí mǐtɔn kpó,

ayi ma wlí hwǐn mǐtɔn kpó.

Yǐ mǐ ɖi mɛ e ɖo lɛ̌ngbɔ́ agbo,

nyibúsú kpódó lɛ̌ngbɔ́ kloklo wɔ̌buwɔ́bú kpó xwlé we wɛ é ɖɔhun.

40Hwɛ mǐtɔn lɛ́ɛ sín vɔ̌ wɛ nyí nǔ e xwlé we wɛ mǐ ɖe éhɔ́nmɛ é.

Blǒ bónú mǐ ná xwedó we káká yí fó.

Nǔgbó wɛ, mɛ e nɔ ɖeji dó wǔ we lɛ́ɛ nɔ́ mɔ winnyá ǎ.

41Bɔ din ɔ́, mǐ jɛ gǔdo towe kpódó ayi mǐtɔn bǐ kpó,

mǐ ɖó sísí nú we, mǐ ɖo kpɔ́nɔxámɛ towe ba wɛ.

42Bo ma jó mǐ nyi winnyá mɛ ó,

kpɔ́n dó nǔbláwǔ kú nú mɛ towe ma ɖó jlɛ̌ ɔ́ wú,

bó nyɔ́ xomɛ dó mǐ wú.

43Aklúnɔ, kpɔ́n dó nǔ jɛ acɔ́ susu e a blǒ lɛ́ɛ wú,

bó hwlɛ́n mǐ gán, bó sɔ́ nyǐkɔ towe su.

44Mɛ ɖěɖě nɔ́ wa nǔ nyanya nú mɛsɛntɔ́ towe lɛ́ɛ é ɔ́ ní mɔ winnyá,

bó hwedó nǔ wú, bó ba hlɔ̌nhlɔ́n bǐ kpo.

45Yě ní tunwun ɖɔ hwi wɛ nyí Aklúnɔ Mawu susu ɖaxó nɔ ɖokpó géé e tíin

ɖo ayǐkúngban ɔ́ bǐ sésé jí ɔ́.

Han Daniyɛ́li xɔ́ntɔn atɔn lɛ́ɛ tɔn

46Hǔn, mɛsɛntɔ́ axɔ́sú ɔ́ tɔn lɛ́ɛ sɔ́ dɔ̌nkpɛvú atɔn lɛ́ɛ nyi dó myɔ ɔ́ mɛ. Yě nɔ́ ba nakí kpódó nǔywɛ́ kpó dó myɔ ɔ́ mɛ, nú é má cí ó. 47Myɔ ɔ́ syɛ́n káká bó yi jǐ hú myɔkpó ɔ́ awagodokan kanɖé tɛ́nnɛ (49). 48Myɔ ɔ́ vun blá kpó ɔ́ bǐ, lobo ji Babilɔ́nunu e sɛkpɔ́ fínɛ́ lɛ́ɛ bǐ. 49Lo ɔ́, wɛnsagun Aklúnɔ tɔn jɛ te wá myɔkpó ɔ́ mɛ, ɖo Azaliya kpódó hǎgbɛ́ tɔn lɛ́ɛ kpó gɔ́n. É ɖe myɔ ɔ́ bǐ tɔ́n sín kpó ɔ́ mɛ, 50bɔ kpó ɔ́ mɛ bǐ fá tɔ́tɔ́ ayǐtéhɔ̌nnu jɔhɔn ɖɔhun, bɔ zo ɔ́ wa nǔtí nú yě ǎ.

51Hwenɛ́nu ɔ́, dɔ̌nkpɛvú atɔn lɛ́ɛ bǐ ɖó gbe kpɔ́, bó ɖo han ji wɛ lélé, bó ɖo Mawu sɔ́ su wɛ, bó ɖo Mawu kpa wɛ ɖo myɔkpó ɔ́ mɛ, bó nɔ́ ɖɔ:

52È ni kpá we, Aklúnɔ, Mawu tɔ́gbó mǐtɔn lɛ́ɛ tɔn,

è ni kpa we, bó sɔ́ we su tɛgbɛ sɔ́yi.

È ni kpa nyǐkɔ mímɛ́ towe, bó sɔ́ we su káká sɔ́yi.

53È ni kpa susu nú we ɖo Nɔtɛn mímɛ́ towe.

È ni xomlá we, bó sɔ́ we su tɛgbɛ sɔ́yi.

54È nǐ kpa we, hwi mɛ e nɔ mɔ nǔ jɛ do gɔngɔn lɛ́ɛ mɛ,

bó ɖo aga ɖéé nú wɛnsagun Susunɔ lɛ́ɛ é,

è ni kpa we, bó sɔ́ we su tɛgbɛ sɔ́yi.

55È ni kpa we ɖo axɔ́súzinkpo towe jí,

bó sɔ́ we su tɛgbɛ sɔ́yi.

56È ni kpa we ɖo jǐxwé aga dɔ̌n,

bó sɔ́ we su tɛgbɛ sɔ́yi.

57Nǔɖíɖó Aklúnɔ tɔn lɛ́ɛ bǐ, mi xomlá Aklúnɔ,

mi sɔ́ ɛ su tɛgbɛ sɔ́yi.

58Mi nǔ e ɖo jǐxwé lɛ́ɛ mi,

mi bǐ ní kpa Aklúnɔ,

mi sɔ́ ɛ su tɛgbɛ sɔ́yi.

59Wɛnsagun Aklúnɔ tɔn lɛ́ɛ mi,

mi kpa Aklúnɔ, bó sɔ́ ɛ su tɛgbɛ sɔ́yi.

60Sin e ɖo jǐnukúnsin lɛ́ɛ bǐ,

mi kpa Aklúnɔ, bó sɔ́ ɛ su tɛgbɛ sɔ́yi.

61Ahwangɔnu Aklúnɔ tɔn lɛ́ɛ ,

mi kpa Aklúnɔ, bó sɔ́ ɛ su tɛgbɛ sɔ́yi.

62Hwe kpó sun kpó e mi,