Hesekiel 43
43
Gott siene Harlichkjeit kjemt em Tempel nenn
1Dan neem hee mie wada no daut Puat aun de oostne Sied. 2Un, horch emol, doa kjeem de Harlichkjeit von Israel äa Gott vom Oosten. Un daut ruzhd soo lud aus een grootet Wota, un de Ieed wia oppjedacht von woo harlich hee wia. #Hes 1,28 3Un dise Openboarunk wia krakjt soo aus dee, aus hee kjeem toom de Staut venichten, un soo aus hee sikj mie bie däm Kebar Riefa openboaren deed. Un ekj foll opp mien Jesecht. #Hes 1,1-28; 8,1—11,24 4Un däm Harn siene Harlichkjeit kjeem derch daut oostne Puat em Tempel Jebied nenn. #Hes 10,19 5Un de Jeist hoof mie opp un brocht mie em Bennahoff nenn; un däm Harn siene Harlichkjeit feld dän Tempel gaunz opp. #2Mo 40,34; 1Kjen 8,10-11; Hes 1,28 6Un aus de Maun biesied mie stunt, hieed ekj wäm von em Tempel to mie räden. 7Un dee säd to mie: Menschensän, dit es de Städ fa mienen Troon, un hia woa ekj miene Feet hansaten. Hia woa ekj opp emma mank de Israeliten wonen. Un de Israeliten woaren nienich wada met äaren Jettadeenst, ooda met dän vestorwnen Kjarpa von eenen Kjennich, Schaund opp mienen heiljen Nomen brinjen, nich daut Volkj un uk nich de Kjennichs. #Psa 132,7-8 8De Kjennichs saden äare Schwal gaunz aun miene Schwal un äaren Akjpost gaunz aun mienen, soo daut doa bloos eene Waunt tweschen mie un an wia. Un doamet haben see mienen heiljen Nomen en onieren jebrocht met dee oppscheiselje Dinja dee see deeden. Un doawäajen krakjt hab ekj an en mienen Oaja venicht. #Hes 8,7-18 9Oba nu sellen see äa Jettadeenst un dän vestorwnen Kjarpa von eenen Kjennich wiet von mie wajchnämen; un ekj woa opp emma mank an wonen.
10Un du, Menschensän, saust de Israeliten vetalen woo de Tempel sitt un woo krakjt dee utjelajcht es, soo daut see sikj schämen met aul daut en waut see too kort komen un sikj vesindjen. #Hes 36,32 11Un wan see sikj, fa aul daut waut see jedonen haben, schämen, dan vetal an woo schmock de Tempel lat un woo krakjt dee utjelajcht es. Vetal an dän gaunzen Plon met de Puaten toom nenn un rut gonen, un uk de Väaschreften un Jesazen doatoo. Schriew daut aula ver an dol, soo daut see sikj no dän Plon un de Väaschreften rechten un doano läwen. 12Dit es dan woo daut steit met däm Tempel: Opp däm huagen Boajch saul de gaunza Hoff hechst heilich sennen. Bat hia sent de Väaschreften fa dän Tempel.
De Brauntopfa Aultoa
13Un dit es de Mot von dän Aultoa. Dit es noch wada met de lange El jemäten, dee eene Hauntbreet lenja es aus de jeweenelje El. Runtom dän Aultoa wia een Foot, eene El huach un eene El breet. Aun de Kaunt von dän Foot wia een Raunt, eene haulwe El huach. #(13-17) Hes 40,47; 2Mo 27,1-8 14Opp dän Foot saul de unjaschte Schicht sennen, twee Ellen huach un eene El von de Kaunt, wiels de meddelste Schicht saul doa nopp. Dee saul 4 Ellen huach, un noch wada eene El nenjetrocken von de Kaunt. 15Un dan saul doa daut Hieet, ooda de bowaschte Schicht, opp woont daut Opfa jebrocht woat, uk 4 Ellen huach sennen. Doa saul opp jieda eene von de bowaschte Akjen een Huarn sennen. 16Daut Hieet, wua daut Opfa jebrocht woat, saul em veakaunt, 12 Ellen aun jieda Sied sennen. 17De meddelste Schicht saul uk em veakaunt sennen. Dee saul 14 Ellen aun jieda Sied sennen, un eenen Raunt von eene haulwe El breet haben. Un de unjaschte Schicht saul uk eene El jrata aun aule Sieden sennen. Un de Trapen sellen aun de oostne Sied sennen.
18Un hee säd to mie: Menschensän, dit es waut Gott de Har sajcht: Dit sent de Väaschreften fa dän Aultoa fa dän Dach wan dee oppjestalt woat, un daut Brauntopfa doabowen jemoakt woat woaren, un daut Bloot aun däm woat naun jesprezt woaren. 19De levitische Priesta von Zadok siene Famielje sent dee, dee ver mie komen sellen om doa to deenen, sajcht Gott de Har. Jeff an eenen jungen Boll fa daut Sindopfa. #(19-21) Hes 40,46; 3Mo 4,1-12 20Un jie sellen von däm Boll sien Bloot nämen, un daut aun de vea Akjspetzen naun spretzen, aun de vea Akjen von dän Foot, un aun dän Raunt dee doa runtom es. Soo sell jie dän Aultoa rein un heilich moaken un Veseenunk fa däm moaken. 21Un jie sellen dän Boll von daut Sindopfa buta daut Heilichtum vebrennen, opp de Städ opp däm Tempel Hoff, dee doa es toom daut Sindopfa vebrennen. 22Dan aum näakjsten Dach sell jie eenen Kosenbock, aun däm kjeen Fäla es, opp opfren fa een Sindopfa un doamet dän Aultoa veseenen, soo aus aul met däm Boll. 23Wan de Aultoa ieescht veseent es, sell jie met eenen jungen Boll, dee kjeen Fäla haft, een Opfa moaken, un uk von eenen Schopsbock, dee kjeen Fäla haft. 24Dee sellen beid fa däm Harn jeopfat, un de Priesta saul Solt opp dee streien un dee aus een Brauntopfa fa däm Harn opfren. 25Fa säwen Doag sell jie aule Dach soo met eenen Kosenbock een Sindopfa moaken, un uk met eenen jungen Boll un eenen Schopsbock von de Häad, dee kjeene Fäla haben, Opfa moaken. 26Säwen Doag sell jie dän Aultoa veseenen un dän rein un heilich moaken, daut dee enjeweit es. 27Un dan vom achten Dach aun, sellen de Priestasch aule Dach opp dän Aultoa daut Brauntopfa un daut Dankopfa moaken, un dan woa ekj jenstich to junt sennen, sajcht Gott de Har.
Praegu valitud:
Hesekiel 43: PB
Tõsta esile
Kopeeri
Võrdle
Jaga
Kas soovid, et sinu esiletõstmised oleksid salvestatud kõigis sinu seadmetes? Registreeru või logi sisse
Plautdietsch Bible © 2003 Kindred Productions and United Bible Societies Association, Inc.