Luka 1
1
1Kia Teofilo:
E vē ona iloa e koe, e tokalahi nā tino kua taumafai ke kilātou fakamaumaua ki lalo nā mea kua uma te fakatāunuku. 2Na tuhituhi e kilātou ki lalo, nā mea na fakailoa mai kia te kimātou e nā tino nae iei i te kāmataga, ma nae folafola e kilātou te fekau. 3Kua manatu ai foki la au, ona kua uma te hukehuke lelei e au o nā mea uma iēnei mai te kāmataga, ke kō tuhituhia fakalelei ki lalo nā mea iēnei mo tau afioga, 4kae ke iloa ai e koe te moni o nā mea uma kua akoako ai koe.
Kua Folafola te Fānau mai o Ioane te Papatiho
5I nā aho o Helota te Tupu o Iutea,#1.5 Iutea Ko te igoa tēnei e aofia ai te kelekele kātoa o Palehetina nae iei he ohitāulaga e igoa kia Hakalia, he tino o te vāega ohitāulaga a Apiaha, ma tana āvaga e igoa kia Elihapeta, na tupuga mai ia Alona.#1.5 Alona Ko te uho o Mohe, ma ko te ohitāulaga muamua ia o Ihalaelu #1 NT 24.10 6Nae ola kilāua i he olaga e āmiotonu i te kikila a te Atua, ma nae tauhihi lelei ki nā tūlāfono ma nā fakatonuga a te Aliki. 7Kae nae hēai he lā fānau ona ko Elihapeta nae hē manava ola, ma kua mātutua lele foki kilāua.
8I tētahi aho, ko Hakalia nae galue i tana gāluega ohitāulaga i te Mālumalu, ona kua pa te fakahologa o nā gāluega ki te vāega ohitāulaga e iei ai ia. 9Na fai te vili e vē ko te tu nae māhani ai, ma na filifilia ai ia Hakalia ke fakamū e ia nā meamanogi i luga o te fata faitāulaga. Oi na fano ai ki loto o te potu o te Mālumalu o te Aliki e takua ko te Nofoaga Paia,#1.9 Nofoaga Paia E i loto ai te fata faitāulaga, ma e nā ko nā ohitāulaga oioti te fakataga ke olo ki loto. E iei te kiepupuni nae vāelua ai te potu tēnei ma te potu nae takua ko te Nofoaga e Hili te Paia, e nofo ai te Atua oi fakamū te tāulaga meamanogi, 10ka ko te tokalahi o tagata, nae tatalo i fafo i te itūlā o nā tāulaga meamanogi.
11Oi na fakakitea ai he āgelu a te Atua kia Hakalia, e tū i te itū taumatau o te fata faitāulaga e fakamū ai nā meamanogi. 12Na teki lahi ia Hakalia, ma na ia lagona te mataku, i te ia kiteaga o te āgelu. 13Kae kua lea atu te āgelu ki ei, “Ia koe nā mataku Hakalia, auā kua lagona e te Atua tau tatalo. Ka fānau mai e Elihapeta tau āvaga, he ataliki mo koe, ma ka fakaigoa e koe kia Ioane. 14Ka fakatumulia koe i te fiafia ma te olioli, ma e tokalahi nā tino ka fiafia i tona fānau mai, 15auā ko Ioane ka kavea ma tino tāua i mua o te Aliki. E hē tatau lele ia ke inu ki he uaina, pe he mea mālohi. Ka fakatumulia ia i te Agaga Paia mai te aho e fānau mai ai, #Nūm 6.3 16ma ka ia toe fakaliliu maia te tokalahi o tagata Ihalaelu, ki te Aliki to lātou Atua. 17Ka muamua atu ia i te Aliki, ma e mākeke ma lototele, e vē ko te pelofeta ko Elia. Ka fakaliliu e ia ia loto o mātua kia lātou fānau; ka fakaliliu e ia nā tino fakalogo gatā ke toe kui i nā auala o te āmiotonu; ka tāpena e ia ia tagata o te Aliki, ke hāuniuni mo ia.”#Mal 4.5-6
18Kua lea vē atu ia Hakalia ki te āgelu, “E vēhea ona kō iloa ko te mea tēnei e taunuku? Ko au kua toeaina, ko taku āvaga foki kua lōmatua.”
19Na tali mai te āgelu, “Ko au ko Kapelielu. Ko au ko he kaukauna fakapitoa a te Atua. Ko au na uga mai e te Atua ke tautala atu kia te koe, ma ke fakailoa atu te tala lelei tēnei.#Tan 8.16; 9.21 20Kikila, ona ko koe kua hē talitonu ki aku kupu iēia ka taunuku lava i te taimi kua fuafua ka fakatāunuku ai, ko koe la ka gūgū ma hē mafai ke tautala, heiloga kua pa ki te aho e taunuku ai nā mea iēnei.”
21I te taimi tēnā, ko nā tino nae fakatalitali kia Hakalia, kua māfaufau pe heā te kua tuai mai ai i loto o te potu e fai ai te tāulaga meamanogi. 22Kae i te hauga o Hakalia ki fafo, kua hē ia mafaia oi tautala atu kia te kilātou, oi na kilātou iloa ai e iei he fakaaliga na ia kitea i loto o te potu. Kua tautalalima lava ia Hakalia ki nā tino, ona kua hē ia mafaia oi tautala.
23I te umaga o tona toe aho tiute i te Mālumalu, oi na fano ai ki tona kāiga. 24Kua teka atu nā aho iēnā, oi faitama ai ia Elihapeta tana āvaga, ma e lima ia māhina na nofo ai lava i te fale, kua hē hula ki he mea. Kua lea vē ifo kia te ia lava, 25“Ko te mea tēnei kua fai e te Aliki kia te au, ona kua kikila alofa mai kia te au, ma kua ia kave kehea toku mā nae nofo ma au, i te kikila mai a nā tino!”#1.25 kave kehea… a nā tino Kāfai he fafine kua āvaga kae hē manava ola, nae iei te manatu, ko te fafine tēnā kua fakahala e te Aliki
Kua Folafola te Fānau mai o Iehu.
26I te ono o māhina talu te faitama o Elihapeta, na uga atu ai e te Atua te āgelu ko Kapelielu, ki he koga i Kalilaia e igoa kia Nahaleta, 27ma he fekau ki he tāupou kua uma te tutuhi ke fakaipoipo ki he taulealea e igoa kia Iohefa, na tupuga mai i te gafa o te Tupu ko Tavita. Ko tona igoa ko Malia. #Mat 1.18 28Kua fanatu te āgelu ki te mea nae iei ia Malia, ma lea vē atu ki ei, “Tālofa ni kia te koe, tē kua alofagia e te Atua. Ko te Aliki e fakatahi ma koe!”
29Ka ko Malia kua popole lele tona loto, ma na māfaufau mālie ifo ai, pe heā te uiga o nā kupu iēnei a te āgelu. 30Kua lea atu te āgelu ki ei, “Malia, koe nahe mataku, auā kua alofagia koe e te Atua. 31Kikila, ko koe ka faitama ma fānau mai e koe he pepe tama, ma ka fakaigoa e koe kia Iehu. #Mat 1.21 32Ka kavea ia ma tagata tāua lahi, ma ka takua ia ko te Ataliki o te Atua Hilihilikehe. Ka fai ia ma tupu e te Aliki te Atua, e vē ko tona tupuna ko Tavita,#2 Ham 7.12, 13, 16; Iha 9.7 33ma ka kavea ia ma tupu o nā lāpuna o Iakopo, ke pa ki te fakavavau; ma ko tona mālō, ka hē mafai ke uma!”
34Kua lea atu ia Malia ki te āgelu, “Ko au ko he tāupou. E vēhea la ona mafai he mea vēnā?”
35Na tali mai te āgelu, “Ka fanaifo te Agaga Paia ki ō luga, ma ko te mana o te Hilihilikehe ka fakamalumalu ifo ki ō luga. Ko te mea ia ka paia ai te tama ka fānau mai, ma ka takua ai ko te Ataliki o te Atua. 36E kē manatua ia Elihapeta, te fafine o te koutou kāiga. Kua matua lele kae kua faitama; ko te ono tēnei o ona māhina, e ui lava nae fai vēia, e hē manava ola. 37Auā e hēai he mea e fokotahi e hē mafai e te Atua.”#Ken 18.14
38Oi na lea atu ai ia Malia, “Ko au ko he kaukauna a te Aliki; ke vēnā lava ona fai kia te au, e tuha ai ma tau vāgana mai.” Oi na fano kehe ai loa te āgelu mai ia Malia.
Kua Āhiahi ia Malia kia Elihapeta
39E hēki mataloa ni aho, oi na tū ake ai ia Malia ki luga kua fano fakavave ki he kakai i he koga maugā i Iutea. 40Kua ulu atu ki te fale o Hakalia, ma na ofoalofa atu ai kia Elihapeta. 41Na lagona atu lava e Elihapeta te ofoalofa mai a Malia, oi na gāoioi ake ai foki ma te pepe i tona manava. Kua fakatumulia foki ia Elihapeta i te Agaga Paia, 42oi na kalaga leo lahi lele ai vē, “Kua hili atu tō manuia i lo fafine uma, ma ke manuia foki te tama ka fānau mai e koe! 43Ko ai nei kita, kua āhiahi mai ai te mātua o toku Aliki kia te au? 44Auā na lagona atu lava e au tau ofoalofa mai, kae gaoi ake foki te pepe i toku manava, i tona fiafia. 45Amutia koe e talitonu ko te mea na vāgana atu ai te Aliki kia te koe, ka taunuku lava!”
Ko te Pehe a Malia na Viviki ai ki te Atua
46Oi na lea vē ai ia Malia,#1 Ham 2.1-10
“E viviki ake toku loto ki te Aliki,
47ma toku agaga e fiafia i te Atua toku Fakaola,
48auā e ia manatua mai kita tana kaukauna fakatauvā! #1 Ham 1.11
E kāmata atu nei, ko augā tupulaga uma,
ka fakaamutia mai kia te au,
49auā kua fai e Tē e Hilihili te Mālohi,
nā mea lalahi mo oku.
Ko tona igoa e paia;
50ma e fakaalia tona alofa fakahao
kia te kilātou e mātataku ia te ia,
mai tēia tupulaga ki tēia tupulaga.
51Kua fālō atu tona lima mākeke
ma fakatakape nā tino e iei nā manatu
fiahili i o lātou loto.
52Kua tuku e ia ki lalo nā tupu mālolohi
mai o lātou nofoāliki,
kae hiki ki luga nā tino fakatauvā.#Iop 5.11; 12.19
53Kua fafaga mākokona e ia
nā tino fia kakaia i nā mea lelei,
kae uga kehe vē nā tino maumea
e aunoa ma he mea.
54Kua tauhi ia ki tana folafolaga
na fai ki o tātou tupuna,
ma kua hau ke fehoahoani ki tana
kaukauna ko Ihalaelu!
55Kua manatua e ia ke fakaali
tona alofa fakahao kia Apelaamo,
ma ana fānau uma ke pa ki te fakavavau!”#Ken 17.7
56Na tai tolu ia māhina na nofo ai ia Malia i te mea nae iei ia Elihapeta, oi na toe foki ai ki tona kāiga.
Ko te Fānau mai o Ioane te Papatiho.
57Kua pa ki te māhina o Elihapeta, oi na fānau mai ai e ia tana pepe, he tama. 58Kua fakalogo nā tino nae tuākoi kilātou, ma nā kāiga o Elihapeta ki te lahi o te alofa fakahao o te Atua kia Elihapeta, ma na fiafia fakatahi ai kilātou uma lele ma ia.
59I te kātoaga o te valu o aho talu te fānau mai o te pepe, oi na ōmamai ai kilātou ke pelitome te pepe, ma na fofou ke kilātou fakaigoa te pepe kia Hakalia, te igoa o tona tamana. #Lev 12.3 60Kae kua lea atu tona mātua, “Hēai; ko tona igoa ko Ioane.”
61Kua lea mai kilātou, “E hēai he tino e igoa vēnā i te koutou kāiga!” 62Oi na tautalalima atu ai nā tino kia Hakalia, pe ko ai te igoa e fofou ia ke fakaigoa ai tona ataliki.
63Kua tautalalima mai ia Hakalia, ke kavake he mea ke tuhituhi ia ki luga, oi na tuhi ai vēnei e ia ki lalo, “Ko tona igoa ko Ioane.” Na tēteki lele kilātou uma i te mea tēnei. 64I te taimi foki lava tēnā na mafai ai ke toe tautala ia Hakalia, ma na kāmata ai oi viviki ake ki te Atua. 65Ko nā tino uma i te pitonuku tēnā kua mātataku lele, ma kua halalau te tala e uiga ki nā mea iēnei ki nā itū uma o te kogāfenua maugā o Iutea. 66Ko nā tino uma lele na fakalogo ki te mea iēnei, kua māfaufau lava e uiga ki ei, ma kua lea vēia “Ko te tamaiti nei tēnei e fai ma ā, kāfai e matua?” Auā kua manino lele ko te mana o te Aliki nae i luga o te tamaiti.
Ko te Vāloaga a Hakalia
67Oi na fakatumulia ai ia Hakalia, te tamana o Ioane, i te Agaga Paia, ma na fai ai tana vāloaga e vēnei;
68“Ke vīkia te Aliki, te Atua o Ihalaelu!
Kua hau ke togiola ona tagata.
69Kua fakatū mai e ia mo kitātou
he Fakaola mākeke,#1.69 Fakaola mākeke Epelu nifohua o te fakaolataga kikila ki te 2 Ham 22.3 ma te Hal 18.2)
he lāpuna o tana kaukauna ko Tavita.
70Na folafola e ia e ala i ana pelofeta paia
i te kāloā,
71ka lāveaki e ia kitātou mai o tātou fili,
mai lima o kilātou e ita mai kia te kitātou.
72Na tākua e ia ka ia fakaalia tona
alofa fakahao ki o tātou tupuna,
ma ka ia manatua tana feagaiga paia.
73-74I tana tautōga na fai ki
to tātou tupuna ko Apelaamo,
na folafola e ia e ia lāveakia kitātou
mai o tātou fili,
ma fakataga kitātou ke tautua kia te ia
e aunoa ma he mataku,
75kae ke mafai ai kitātou ke fakapaiagia,
ma ke āmiotonu i mua o ia
i aho uma o to tātou ola.
76“Ma ko koe, taku tama,
ka takua koe ko he pelofeta
e a te Atua Hilihilikehe.
Ka muamua atu koe i te Aliki,
ke hāuni he auala mo ia,#Mal 3.1
77ma fakailoa ki ona tagata te fakaolataga,
e ala i te fakamāgaloga o a lātou agahala.
78Ko to tātou Atua e alofa fakahao ma e agamalū.
Ko ata o te tāeao kua tafa valevale i luga o kitātou,
79ke fakamāina ai kia te kilātou
e nonofo i te pōuli ma i te ata o te oti,
ke takitaki ai o tātou vae i te auala o te fīlēmū.” #Iha 9.2
80Kua tuputupu ake pea te tamaiti ma na kāmata ai kua mālohi i te tino ma i te faka-te-agaga. Ma nae nofo lava i te vao, ke pa ki te aho na kāmata ai tana gāluega mo tagata o Ihalaelu.
Currently Selected:
Luka 1: TOKU
Tõsta esile
Kopeeri
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust